ကိးနံၣ်ဒဲး, ဘူးထီၣ်လၢတၢ်ကိၢ်ခါကလၢာ်ဝဲန့ၣ် ယသူၣ်လီၤဒံသၣ်အချံတဖၣ်လၢယကရၢၢ်အပူၤန့ၣ်လီၤ. တၢ်အချံန့ၣ် ပျိၣ်ထီၣ်အဒ့အလၣ်တဖၣ် ချ့သဒံးဘၣ်ဆၣ်, ပကထံၣ်ဘၣ် အသၣ်တဖၣ်န့ၣ် တၢ်ဆၢကတီၢ်န့ၣ်ယံာ်ဝဲဒၣ်န့ၣ်လီၤ. နီၢ်နီၢ်န့ၣ်, လၢတၢ်ကိၢ်ခါမုၢ်ဃ့ၢ်လီၤ တဟါန့ၣ် ဒံသၣ်အချံလၢ ယသူၣ်လီၤတဖၣ်အဂီၢ်, ယလူထံ, ဒီးအိၣ်ခိးကွၢ်တၢ်အကတီၢ်, ယသံကွၢ်လီၤက့ၤယသးလၢ မ့ၢ်ယဒံအမုၢ်တဖၣ် ကဖီထီၣ်သၣ်ထီၣ်ကစီဒီဧၣ်န့ၣ်လီၤ. ယဆိကမိၣ်ထီၣ်ယဲလၢ ဖဲယသူၣ်လီၤတၢ်အကတီၢ်, မ့ၢ်ယသူၣ်လီၤဒံသၣ်အချံတဖၣ် ကတံာ်ကဲၣ်ဆိးဧါ (မ့) ဟီၣ်ခိၣ်လၢ ယသူၣ်လီၤတၢ်န့ၣ် မ့ၢ်ယတကတဲာ်ကတီၤအီၤဂ့ၤဂ့ၤဘၣ်ဘၣ်အဃိန့ၣ်ဧါလီၤ. ဘၣ်ဆၣ်, တနံၤန့ၣ် ယထံၣ်လၢ တၢ်အဘိၣ်လါလါဖိတဖၣ်ဟဲထီၣ်ဝဲဒၣ်, ပိာ်ထွဲထီၣ်အသး တနွံဘၣ်တနွံန့ၣ်လီၤ. ဒီးလၢစှၤနွံအတီၢ်ပူၤန့ၣ် တၢ်အမုၢ်ဖိတဖၣ် သၣ်ထီၣ်ဝဲ, ဒီးပမၤအီၣ်တၢ်ဒိးတၢ်လၣ်စံၣ်ဃါ ဒီနွံန့ၣ်လီၤ.

ဘၣ်တဘျီဘျီန့ၣ် သူၣ်ဂ့ၢ်သးကျိၤ အတၢ်ဒိၣ်ထီၣ်န့ၣ် တၢ်မၤအသးဒ်သိးအံၤန့ၣ်လီၤ. တၢ်လၢပဃ့ထုကဖၣ်န့ၢ်တၢ်တဖၣ်, လၢအမ့ၢ် တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, ဒီးတၢ်အဲၣ်တၢ်ကွံတဖၣ်န့ၣ် (ကလၤတံ ၅:၂၂-၂၃) ပတထံၣ်န့ၢ်အီၤထီဘိဘၣ်. ဘၣ်ဆၣ်, ဒ်သိးပကမၤဒိၣ်ထီၣ်အါထီၣ် တၢ်ထုကဖၣ်, တၢ်မၤလိ လံာ်စီဆှံ, တၢ်ဘူၣ်ထူဘါယွၤ, တၢ်မၤဂ့ၤမၤစၢၤ ပှၤဂၤအဂီၢ်န့ၣ် ပမ့ၢ်ဃ့ ကစၢ်ယွၤ ကမၤစၢၤပှၤလၢ တၢ်ဒုးအိၣ်ထီၣ် တၢ်လၢပလိၣ်ဘၣ် တၢ်အိၣ်အသးမၤအသးတဖၣ်န့ၣ်ဒီး, သးစီဆှံ ကဒုးအိၣ်ထီၣ်ဝဲဒၣ် တၢ်ဒိၣ်ထီၣ်ထီထီၣ်န့ၣ်လီၤ.

တၢ်ဂ့ၢ်အံၤ မ့ၢ်ဝဲဒၣ် တၢ်ဂ့ၢ်မိၢ်ပှၢ်လၢ ကစၢ်ယ့ၣ်ရှူး အတၢ်ကတိၤဟ့ၣ်ဒိ ဖျါဖဲလံာ်လူၤကၣ် အဆၢဒိၣ် ၈, “ပှၤလၢအဖှံတၢ်တဂၤန့ၣ် လဲၤဖှံလီၤအတၢ်ချံ,…. ဒီးတနီၤနီၤလီၤဘၣ်ဝဲလၢကျဲအသရ့ၤ, ဒီးထိၣ်ဖိလံၣ်ဖိတဖၣ် ထၢအီၣ်ကွံာ်အီၤ” (:၅) န့ၣ်လီၤ. တၢ်ချံ “အဂၤတနီၤလီၤဘၣ်ဝဲလၢလၢၢ်ခိၣ်, ဒီးမ့ၢ်တၢ်တစီၣ်ဘၣ်သတးဒီး, တုၤအမဲထီၣ်န့ၣ် ညွံးကွံာ်ဝဲဒၣ်လီၤ. ဒီးအဂၤတနီၤလီၤဘၣ်လၢ တၤဆှုၣ်တၤမဲအကျါ, ဒီးတၤဆှုၣ်တၤမဲန့ၣ် မဲထီၣ်ဃုာ်ဒီးအီၤ, ဒီးခဲဘၢကွံာ်အီၤလီၤ” (:၆-၇). ဘၣ်ဆၣ်, “တၢ်ချံတနီၤလီၤဘၣ်ဝဲလၢ ဟီၣ်ခိၣ်ဂ့ၤ, ဒီးမဲထီၣ်ဝဲ, ဒီးအသူၣ်အသၣ်အါန့ၢ်က့ၤ
အလီၢ်တကယၤ” (:၈) န့ၣ်လီၤ.

ခီဖျိလၢ ကစၢ်ယွၤ အတၢ်မၤစၢၤပှၤအပူၤန့ၣ် မ်ပကဒုးအိၣ်ထီၣ် “ဟီၣ်ခိၣ်ညၣ်ထ့ၣ်လၢအဂ့ၤ,” ဒီးပကဒိၣ်ထီၣ်လၢယွၤအပူၤန့ၣ်တက့ၢ်.