ဘၣ်ဖဲမုၢ်တနၤ, လၢတၢ်ဘါယွၤသရိာ်န့ၣ် ဖဲယသိၣ်လိ ကၠိဖိတဖု လၢအတမ့ၢ်ဒံးဘၣ်ပှၤစူၢ်က့ၤနာ်က့ၤတၢ်ဖိတဖၣ်, တကးဒ်ဘၣ်န့ၣ် အဝဲသ့ၣ် နံၤဘၣ်ဖၣ်လဲ တၢ်စူၢ်တၢ်နာ်ကစၢ်ယ့ၣ်ရှူးခရံာ်န့ၣ်လီၤ. အကတီၢ်ဖဲန့ၣ် ကၠိဖိတဂၤ နဲၣ်စုနဲၣ်ခီၣ်ဝဲ တၢ်ဒုးနဲၣ် အရၢၢ်အစၢၢ်, ဒီးထုထီၣ်အပျ့ၤ, ဒီးပာ်ဖျါထီၣ် အတၢ်မၤတရီတပါတၢ်န့ၣ်လီၤ.

တနၣ်ရံၣ်လဲၤပူၤကွံာ်ဝံၤ, ကၠိဖိတဖၣ်ဟးထီၣ်လၢ တၢ်သိၣ်လိအဒၢးပူၤ, ဒီးပဆ့ၣ်နီၤအိၣ်သကိးလၢယဝဲၤဒၢး, အိၣ်ဘူးဝဲဒၣ်လၢ ကျဲမုၢ်ဒိၣ်အကပၤန့ၣ်လီၤ. အကတီၢ်ဖဲန့ၣ်ပှၤလၢအနီၢ်ကစၢ်ဒိၣ်, ဒီးအဂံၢ်ဘါဆူၣ်တဂၤ, ဟဲနုာ်လီၤဆူၣ်ဆူ ယဝဲၤဒၢးအပူၤန့ၣ်လီၤ.ယၤဒီးယကၠိဖိသ့ၣ်တဖၣ်န့ၣ် ပတသ့ၣ်ညါအီၤဘၣ်. အဝဲအီသံးမူၤ, ဒီးမၤဆူၣ်မၤစိးယၤလၢတၢ်သူၣ်ဒိၣ်သးဖျိးအပူၤန့ၣ်လီၤ. ယကတိၤတၢ်ဒီးအီၤဂ့ၤဂ့ၤဘၣ်ဘၣ်ဒၣ်လဲာ်, အဝဲအဲၣ်ဒိးဃု တၢ်အ့ၣ်လိာ်ဆိးက့လိာ်သးဒီးယၤန့ၣ်လီၤ. ဒီးအဝဲစံးဘၣ်ယၤလၢ “ယကမၤသံယၤ” န့ၣ်လီၤ. ဖဲန့ၣ်, ယစးထီၣ် ဃ့ထုကဖၣ်န့ၢ်တၢ်လၢအဂီၢ်, လၢယကလုၢ်ဖးဒိၣ်အပူၤန့ၣ်ဒီး, ပှၤလၢအဟဲမၤစၢၤ ယတၢ်သိၣ်လိ, ယတံၤသကိး ကၠီ (John) တဂၤ, ဃ့ထုကဖၣ်သကိးတၢ်ဒီးယၤန့ၣ်လီၤ. ဖဲလၢပဃ့ထုကဖၣ်ဝံၤ, အတၢ်ပာ်သူၣ်ပာ်သးန့ၣ် ဆီတလဲအသး, ဒီးဖိးဟုဖိးဃာ်ယၤဃံးဃံးဝံၤမး, က့ၤဟးထီၣ်ဝဲဒၣ်လၢ ယဝဲၤဒၢးန့ၣ်လီၤ.

ဒ်သိးကၠိဖိတဖၣ်လၢ အိၣ်ခိးကွၢ်ဝဲဒၣ် တၢ်မၤအသးတဖၣ်, အသးကဆီတလဲအဂီၢ်, ယွၤစူးကါအကတီၢ်ဖိအံၤ, ဒီးဒုးသ့ၣ်နီၣ်က့ၤပှၤလၢ “အဂ့ၢ်ဒ်အံၤ, တမ့ၢ်ဘၣ်ပကနိဒီးတၢ်သွံၣ်ဒီးတၢ်ဖံးတၢ်ညၣ်ဘၣ်, မ့ၢ်လၢတၢ်အခိၣ်, ဒီးတၢ်အစိအကမီၤ, ဒီးအအံၤတဃၣ် အတၢ်ခံးအကစၢ်, တၢ်နါအိၣ်လၢအလီၢ်တဖၣ်” (အ့း ၆:၁၂) န့ၣ်လီၤ. မုၢ်ကီၤလံၢ်, ဒီးအအံၤတဃၣ် အတၢ်ခံးအကစၢ် မ့ၢ်မၤပျံၤမၤဖုးပှၤဒၣ်လဲာ်, ကစၢ်ယွၤ ကဒီဒၣ်ဒီတဒၢပှၤ, ခီဖျိတၢ်ထုကဖၣ်, ဒီးဟ့ၣ်လီၤပှၤကျိၤကျဲ, ဒ်သိးပကဂဲၤဆၢထၢၣ်အိၣ်ဃိကလာ်ကသ့အဂီၢ်န့ၣ်လီၤ.

ပနီၢ်ကစၢ်ဒၣ်ဝဲ ပဂံၢ်ပဘါမ့ၢ်ဆံးမ့ၢ်စှၤဘၣ်ဆၣ်, ခီဖျိတၢ်ဃ့ထုကဖၣ် “မၤတၢ်ခဲလၢာ်လၢတၢ်ထုကဖၣ်အပူၤ, ဒီးဃ့ကစၢ်ယွၤအတၢ်မၤစၢၤတက့ၢ်. ထုကဖၣ်ကိးဆၢကိးကတီၢ်ဒဲးဒ်ကစၢ်ယွၤအသးဆှၢသုအသိးတက့ၢ်…. ထုကဖၣ်ထီဘိလၢ ယွၤအပှၤစီဆှံခဲလၢာ်အဂီၢ်တက့ၢ်” (အ့း ၆:၁၂ ခ့ခါ-ကညီစှီၤကျိာ်). ဒ်သိးပကအိၣ်ဘူးဒီးအီၤအဂီၢ်, ကစၢ်ယွၤကမၤစၢၤပှၤန့ၣ်လီၤ.