ကီၢ်အမဲရကၤ ကီၢ်ခိၣ်အသီတဖၣ် ဘၣ်အၢၣ်လီၤအီလီၤအသးလၢ ဘျီၣ်ဒိၣ်ဝံၤန့ၣ်ဒီး, တၢ်ထီၣ်မူးဧိၤပွဲဧိၤ, ဒီးတၢ်ဆဲးလီၤမံၤလၢ ထံကီၢ်အတၢ်တိာ်ကျဲၤသနူတဖၣ်, အါန့ၢ်အန့ၣ်, တၢ်မၤလၢဟးဆှဲးဝဲတန့ၢ်တသ့တမံၤန့ၣ် ဘၣ်စးထီၣ်ကတဲာ်ကတီၤဝဲဒၣ် အကစၢ်ဒၣ်ဝဲ အတၢ်သံတၢ်ပှၢ် အတၢ်ရဲၣ်တၢ်ကျဲၤန့ၣ်လီၤ. တၢ်မၤအံၤ မ့ၢ်ကျိၤကျဲတမံၤလၢ ထံကီၢ်ကဘၣ်ရဲၣ်ကျဲၤဝဲဒၣ် လၢတၢ်မၤလၤကပီၤကီၢ်ခိၣ်တဖၣ် အတၢ်အိၣ်မူ, ဖဲအဝဲသ့ၣ်သံဝဲအကတီၢ်န့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် ပှၤသံကွၢ် ကၠီး. အ့း(ရှ). ဒဘလူၢ်. ဘူး(ရှ) (George H. W. Bush) လၢ တၢ်မၤအံၤ မ့ၢ်တၢ်လီၤပျံၤလီၤဖုး, လီၤကမၢကမၣ်တမံၤဧၣ်န့ၣ်လီၤ. ဒီးအဝဲစံးဆၢဝဲလၢ “ပကဘၣ်မၤညီနုၢ်ပသး” န့ၣ်လီၤ. ပှၤကွဲးတၢ်စံၣ်စိၤတဲစိၤတဖၣ် ကကွဲးပာ်ဖျါ ကီၢ်ခိၣ်တဖၣ် အတၢ်ဟ့ၣ်သါတဖၣ်န့ၣ်လီၤ. မ့မ့ၢ်, ထံကီၢ်ခိၣ်နၢ်တဖၣ်န့ၣ်, ကဘၣ်ရဲၣ်ကျဲၤဆိဝဲဒၣ် အနီၢ်ကစၢ်, ဒီးလၢအဝဲသ့ၣ် အတၢ်ဖံးတၢ်မၤ, လုၢ်လၢ်အထူသနူတဖၣ်, ဒီးကျိၤကျဲတဖၣ်လၢ ပှၤကသ့ၣ်နီၣ်ထီၣ်အဝဲသ့ၣ်အဂီၢ်န့ၣ်လီၤ.

တၢ်သံတၢ်ပှၢ်အံၤ မ့ၢ်တၢ်လီၤသူၣ်အုးသးအုးနီၢ်နီၢ်တမံၤလၢ ပဝဲကိးဂၤဒဲး ပကဘၣ်လဲၤခီဖျိဝဲဒၣ်န့ၣ်လီၤ. စီၤပၤရှလိၤမိၤ, မ့ၢ်ပှၤဃုမၤလိ တၢ်အိၣ်မူအခီပညီ ခီဖျိတၢ်မုာ်လၤသးခုတၢ်, တၢ်ဖံးတၢ်မၤ, ဒီးတၢ်ကူၣ်သ့တဖၣ်အပူၤ, ဒီးအကတၢၢ်န့ၣ် ဃုထံၣ်သ့ၣ်ညါဝဲဒၣ်လၢ ကယဲၢ်တၢ်ခဲလၢာ်န့ၣ် မ့ၢ်တၢ်ကလီကလီအဃိ, ဒီးစံးဝဲဒၣ် “လဲၤတၢ်ဆူတၢ်သးအုးအဟံၣ်န့ၣ်ဂ့ၤန့ၢ်လဲၤတၢ်ဆူတၢ်အီၣ်တၢ်အီအဟံၣ်တက့ၢ်” (စံၣ်တဲၤ ၇:၂) န့ၣ်လီၤ. တၢ်ကီတၢ်ခဲအကတီၢ်တဖၣ် ဟ့ၣ်ထီၣ်တၢ်ထံၣ်လၢအဂ့ၤ အါန့ၢ်ဒံးတၢ်မုာ်တၢ်ခုၣ်အကတီၢ်တဖၣ်န့ၣ်လီၤ. ပမ့ၢ်ဘၣ်ကွၢ်ဆၢၣ်မဲာ် တၢ်သံအတၢ်မ့ၢ်တၢ်တီန့ၣ်ဒီး, လၢခံတၢ်ကကဲထီၣ်အသးတဖၣ်အဂီၢ်, ပကအိၣ်ကတဲာ်ကတီၤဂ့ၤထီၣ်ပသး သ့ဝဲဒၣ်န့ၣ်လီၤ. အဆၢဖိ ခံ ပာ်ဖျါအါထီၣ်ဝဲဒၣ်လၢ “(တၢ်သံ) န့ၣ် မ့ၢ်ပှၤကညီခဲလၢာ်အကတၢၢ်ဒီး ပှၤမူဝဲန့ၣ် ကပာ်ဝဲလၢအသး” န့ၣ်လီၤ. ဂ့ၤပဆိကမိၣ်ထီၣ် တၢ်ဂ့ၢ်အံၤ, ဒီးပကြၢးကတဲာ်ကတီၤပသးလၢတၢ်သံအဂီၢ်န့ၣ်လီၤ.

တၢ်ကတဲာ်ကတီၤပသးန့ၣ် ကအိၣ်ဟဲဝဲလၢ ပဒိးန့ၢ် တၢ်ပျၢ်ပတၢ်ဒဲးဘး, ခီဖျိလၢကစၢ်ယ့ၣ်ရှူး, ပှၤလၢအဒိးသံလၢပဂီၢ်, ဒီးဂဲၤဆၢထၢၣ်သမူထီၣ်က့ၤတဂၤန့ၣ်လီၤ. မ့ၢ်လၢပှၤကညီအဆိကတၢၢ်, စီၤအၤဒၣ်န့ၣ် တဒိကနၣ် ကစၢ်ယွၤအကလုၢ်အဃိ, တၢ်သံန့ၣ် ဟဲနုာ်လီၤ, ဒီးပပိာ်ထီၣ် စီၤအၤဒၣ်အခံ, ဒီးပှၤကိးဂၤဒဲးသံဝဲဒၣ်န့ၣ်လီၤ. ဘၣ်ဆၣ်, “ပှၤခဲလၢာ် ကဘၣ် တၢ်မၤမူထီၣ်က့ၤအီၤလၢခရံာ်အပူၤ” (၁ ကရံၣ် ၁၅:၂၂) န့ၣ်လီၤ.