လၢ အဲ(လ)ဘၢး အဲစတဲ ကသံၣ်ကသီ ခီလ့ၣ်ကၠိ အဘျီၣ်နဲၣ်ဒိၣ်တဖျၢၣ်အပူၤန့ၣ် ရူး(သ) ကီးတ့း(စ)မဲ(န), လၢအသးအိၣ်အနံၣ် ၉၀ တဂၤ, ကတိၤလီၤတၢ်အကတီၢ်, ကသံၣ်ကသီကၠိဖိတဖၣ် ဒိကနၣ်ဝဲ လၢတၢ်သူၣ်ဆူၣ်သးဂဲၤန့ၣ်လီၤ. ကၠိဖိတဖၣ် ကမၤဝံၤတၢ်မၤလိ, တုၤအဖျိထီၣ်တစု အကၠိလဲအဂီၢ်, ရူး(သ) ဘိးဘၣ်သ့ၣ်ညါဝဲဒၣ်လၢ ကဟ့ၣ်မၤဘူၣ် စ့ဒီလၣ် အကကွဲၢ် တကထိ ($1 billion), ဒီးမၤကတၢၢ်အတၢ်ကတိၤန့ၣ်လီၤ. ဖဲန့ၣ်, ကၠိဖိတဖၣ် လၢတၢ်ကမၢကမၣ်အပူၤန့ၣ် သါသဖှိထီၣ်, သူၣ်ဖှံသးညီ, ကိးပသူထီၣ်ဝဲဒၣ်န့ၣ်လီၤ. တၢ်ဟ့ၣ်မၤဘူၣ် ကသံၣ်ကသီကၠိတဖၣ်အကျါ, မ့ၢ်တၢ်ဟ့ၣ်အအါကတၢၢ်န့ၣ်လီၤ. တၢ်သံကွၢ်စံးဆၢ လၢအပိာ်ထွဲထီၣ်အခံန့ၣ် ကီးတ့း(စ)မဲ(န) ပာ်ဖျါထီၣ် တၢ်သးခု, တၢ်သူၣ်မုာ်သးမုာ်, ဒီးတၢ်လၤကပီၤ ခီဖျိဟ့ၣ်မၤဘူၣ်ဘၣ်အစ့အံၤအဃိ, နကဆိကမိၣ်နဲသ့ၣ်သ့ၣ် ဒ်အဝဲမ့ၢ်ပှၤဒိးန့ၢ် တၢ်ဟ့ၣ်တဂၤအသိးန့ၣ်လီၤ.

လံာ်တၢ်ကတိၤဒိ စံးဘၣ်ပှၤလၢ တၢ်မၤအံၤ မ့ၢ်တၢ်ဟ့ၣ်ညီတၢ် အတၢ်ကဲဘျုးအဂ့ၢ် န့ၣ်လီၤ. ပှၤလၢ “အဟ့ၣ်ညီတၢ်” တဂၤန့ၣ် ပူၤဖျဲးဝဲဒီး တၢ်ဆံးလီၤစှၤလီၤ (မ့) တၢ်ဖှီၣ်တၢ်ယာ်, ဒီးလၢတၢ်တဆၢမုၢ်လၢ်တၢ်အပူၤန့ၣ် ဃုထံၣ်န့ၢ် တၢ်ဆိၣ်ဂ့ၤတဖၣ် (၁၁:၂၄) န့ၣ်လီၤ. ဖဲပဟ့ၣ်တၢ်တမံၤမံၤဆူ ပှၤဂုၤပှၤဂၤအအိၣ်န့ၣ်ဒီး, တၢ်လၢအအိၣ်ဒီးပှၤန့ၣ် ကအါထီၣ်ဂီၢ်ထီၣ်, ဒီးတဆံးလီၤစှၤလီၤဝဲဒၣ်ဘၣ်. ကတိၤဒိ ၁၁:၂၅ စံးဘၣ်ပှၤလၢ “ပှၤလၢအဖှိၣ်ထံန့ၣ် ကဒိးဖှိၣ်ထံအကစၢ်ဒၣ်ဝဲ” န့ၣ်လီၤ. တၢ်လၢအအိၣ်ဒီးပှၤန့ၣ် ဒ်သိးပကပံာ်သံကီသံအီၤအဂီၢ်, တၢ်လ့ပစီလီၤဘၣ်ပှၤတလီၢ်လီၢ်, ဒီးပပျံၤပဘၣ်ယိၣ်တၢ်လၢ ပှၤကဟံးန့ၢ်တၢ်ခွဲးတၢ်ယာ်လၢပလိၤ, (မ့) ပတၢ်တအိၣ်တ့ၢ်ဘၣ်ဖုးနီတမံၤဘၣ်န့ၣ်လီၤ. ဘၣ်ဆၣ်, ကစၢ်ယွၤ အတၢ်မၤအကျိၤအကွၢ်န့ၣ် တဒံးသိးလိာ်အသးဒီးဟီၣ်ခိၣ်အတၢ်ထံၣ်န့ၣ်လီၤ. မ့မ့ၢ်ကစၢ်ယ့ၣ်ရှူးန့ၣ် စံးဘၣ်ပှၤလၢ “ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤအါန့ၢ်ဒိးန့ၢ်တၢ်တက့ၢ်” (မၤတၢ် ၂၀:၃၅) န့ၣ်လီၤ.

ပှၤလၢအလိၣ်ဘၣ် တၢ်မၤစၢၤတဖၣ်အဂီၢ်, ခီဖျိပတၢ်အိၣ်မူ, ဒီးပတၢ်ဂံၢ်ထံးတဖၣ်, တၢ်လၢအအိၣ်ဒီးပှၤန့ၣ် ပသးအိၣ်ဟ့ၣ်ညီတၢ်သ့ဝဲဒၣ်န့ၣ်လီၤ. မ့ၢ်ဝံၤန့ၣ်ဒီး, ပကထံၣ်ဘၣ်လၢ ပဒိးန့ၢ်ဘၣ်က့ၤတၢ်စ့ၢ်ကီးန့ၣ်လီၤ. လၢပှၤကိးဂၤဒဲးအဂီၢ်, ကစၢ်ယွၤအဘီအမုၢ်အပူၤန့ၣ် တၢ်အိၣ်ဝဲဒၣ်အါမးန့ၣ်လီၤ.