ဖဲတၢ်ဘှီမၤဂ့ၤက့ၤ ကီၢ်စဲၣ် ကဲ(န)ထၢးကံၣ် (Kentucky) အခၢၣ်သး, ပှၤလဲၤခီဂာ်တၢ်ဝဲၤလီၢ်တဖၣ်န့ၣ်ဒီး, ဒ်သိးပှၤလဲၤတၢ်က့ၤတၢ်ဖိတဖၣ်ကသ့ၣ်ညါဝဲအဂီၢ်, ပှၤဘၣ်မူဘၣ်ဒါတဖၣ် အဲၣ်ဒိးမၤလီၤတံၢ်ဝဲန့ၣ်လီၤ. တၢ်ပနီၣ်လၢအတဖျါဂ့ၤဂ့ၤ (မ့) ဒ်ညီနုၢ်တၢ်ဘိးဘၣ် သ့ၣ်ညါတၢ်အလီၢ်န့ၣ်, အဝဲသ့ၣ်တ့ဒုးအိၣ်ထီၣ် ထးကမိာ်ဒိၣ်ခံ (thumbtack) ဖးဒိၣ်, လၢအကစီၤထီၣ်ထီကအိၣ်ဝဲဒၣ် ခံဆံခံ-ခီၣ်ယီၢ် တထံၣ်န့ၣ် ဖဲတၢ်နုာ်လီၤ ဟးထီၣ်တၢ်သူၣ်ထီၣ်အတြဲၤအလိၤန့ၣ်လီၤ. ထးကမိာ်ဒိၣ်ခံဖးဒိၣ်အံၤ ကဲထီၣ် တၢ်ကွဲးနီၣ်တမံၤလၢ ဟီၣ်ခိၣ်ချၢ, ဒ်အမ့ၢ်တၢ်ပနီၣ်လၢ ပှၤလဲၤတၢ်က့ၤတၢ်ဖိတဖၣ်, လဲၤပူၤကွံာ်တန့ၢ်တသ့တမံၤန့ၣ် ပှၤကသမၢအီၤအဂီၢ်, အလီၢ်တအိၣ်ဘၣ်န့ၣ်လီၤ.

ဖဲဝံဒၤနံးယ့လး ၆ အပူၤန့ၣ်, ဒ်သိးကစၢ်ယွၤ ကထုးန့ၢ် ပှၤဂီၢ်မုၢ်အသးအဂီၢ်, စူးကါဝဲဒၣ် တၢ်လၢပှၤသမၢအီၤတန့ၢ်တသ့တမံၤ, မ့ၢ်လၢ စီၤဒၤနံးယ့လး ဃုထၢထီဒါ စီၤပၤ ဒၤရယါဝ့ၣ် အတၢ်ဟ့ၣ်လီၤအကလုၢ်အဃိ, ဘၣ်တၢ်တ့ၢ်လီၤကွံာ်အီၤဆူ ခ့ယုၢ်အပူၤဝံၤန့ၣ်ဒီး, ခီဖျိလၢတၢ်ဃ့ထုကဖၣ် ကစၢ်ယွၤ (:၁၀-၂၃) တပယုာ်ဃီအပူၤန့ၣ် ယွၤ မၤပူၤမၤဖျဲးအီၤ လၢတၢ်လီၤလိၢ်လီၤလးအပူၤန့ၣ်လီၤ. မ့ၢ်လၢဝံတဂၤအံၤ, “သန့ၤအသးလၢ အကစၢ်” (:၂၃) အဃိ, အိၣ်မူဘၣ်ဝဲန့ၣ်လီၤ. ဝံၤ, စီၤပၤဒၤရယါဝ့ၣ် ဘိးဘၣ်သ့ၣ်ညါဝဲလၢ- စီၤဒၤနံးယ့လး အကစၢ်န့ၣ် တလီၤဂာ်ဒီး ပှၤမၤဒဲဖိ, ပှၤပၤရၣ်ဖိ အတၢ်ဂီၤတၢ်ဖီၣ် တဖၣ်လၢ အသးသမူတအိၣ်- မ့ၢ် “ကစၢ်လၢအမူဝဲ, ဒီးအိၣ်ဝဲလီၤထူလီၤယိာ်” (:၂၆) န့ၣ်လီၤ. ထဲအဝဲတဂၤဧိၤ, “အုၣ်က့ၤခီၣ်က့ၤတၢ်, ဒီးမၤပူၤဖျဲးတၢ်, ဒီးမၤတၢ်ပနီၣ်လီၤလး, ဒီးတၢ်လီၤလိၢ်လီၤလးလၢမူခိၣ်, ဒီးလၢဟီၣ်ခိၣ်” (:၂၇) န့ၣ်လီၤ. စီၤပၤလၢ အဘါတၢ်ဂီၤတၢ်ဖီၣ်တဂၤ, အၢၣ်လီၤဝဲ ကစၢ်ယွၤအစိကမီၤ, ဒီးအတၢ်သ့တၢ်လၢာ်အဃိ, တၢ်အံၤမ့ၢ် တၢ်လီၤဆီတမံၤန့ၣ်လီၤ. ဒ် “ယွၤအထးကမိာ်ဒိၣ်ခံ” ဖးဒိၣ်လၢ အဟ့ၣ်တၢ်ပနီၣ်တမံၤအသိး, ကစၢ်ယွၤ အစိကမီၤ အတၢ်မၤန့ၣ်, တၢ်ပျဲပျၢ်ကပာ်ကွံာ်အီၤတသ့ဘၣ်န့ၣ်လီၤ.

ဘၣ်တဘျီဘျီ, ကစၢ်ယွၤ ထုးန့ၢ်ပသူၣ်ပသး, ဒ်အမၤတၢ်လၢအကါဒိၣ်တမံၤမံၤ, တၢ်လၢပသမၢအီၤတသ့ (:၂၇), တၢ်မၤပူၤဖျဲးတၢ်လၢ အလဲၤတလၢကွံာ်န့ဆၢၣ်, တၢ်ဟ့ၣ် မၤစၢၤတၢ်ဘၣ်ဆၢဘၣ်ကတီၢ်, ဒီးတၢ်လဲလိာ်လၢသူၣ်လၢသးတဖၣ်န့ၣ်လီၤ. ဖဲပဆိးသီ အိၣ်ခိးကွၢ်တၢ်အကတီၢ်န့ၣ်, ယွၤမၤတၢ်ကစုဒုန့ၣ်လီၤ. မုၢ်တနံၤအံၤ, လၢတၢ်နာ်သန့ၤလီၤပသးလၢယွၤ, ဒီးအစိဒိၣ်အကမီၤထီ (:၂၃) အပူၤန့ၣ် မ်ပကအိၣ်ဒီးတၢ်ကမၢကမၣ်လၢ ကစၢ်ယွၤ အတၢ်မၤလၢပပူၤ, ဒီးလၢပခိၣ်ပဃၢၤဝးဝးန့ၣ်တက့ၢ်.