ဖဲလၢယမ့ၢ်ပိာ်မုၣ်သးစၢ်ဖိအကတီၢ်, ယအဲၣ်သးဝံၣ်ယဲ ထါတၢ်သးဝံၣ်ဖိတယုၢ်န့ၣ် မ့ၢ်ဝဲဒၣ် “ဂံၢ်တၢ်ဆိၣ်ဂ့ၤ” န့ၣ်လီၤ. ပှၤသ့ၣ်တဖၣ်လၢ “တၢ်ဆီၣ်သနံးလုၢ်ဘၢကွံာ်,” ဒီး “ဆိကမိၣ်ဝဲ တၢ်ခဲလၢာ်လီၤမၢ်ကွံာ်” တဖၣ်အဂီၢ်, ထါသးဝံၣ်ဖိတယုၢ်အံၤ ဟ့ၣ်ဂံၢ်ဟ့ၣ်ဘါအဝဲသ့ၣ်လၢ “ကဂံၢ်ထီၣ်တၢ်ဆိၣ်ဂ့ၤ, တမံၤဘၣ်တမံၤ” န့ၣ်လီၤ. နံၣ်တဖၣ်လဲၤပူၤကွံာ်ဝံၤ, ဖဲယဝၤသးဘိ အဲလၢၣ် (Alan) အသးလီၤဘှံးလီၤတီၤဝဲအကတီၢ်, မၢယသးဝံၣ်န့ၢ်အီၤ တၢ်သးဝံၣ်ဖိအံၤတလီၢ်လီၢ်န့ၣ်လီၤ. ဖဲန့ၣ်, ဒ်သိးယဝၤ ကဂံၢ်ထီၣ် အတၢ်ဆိၣ်ဂ့ၤတဖၣ်အဂီၢ်, ယမၤစၢၤအီၤန့ၣ်လီၤ. တၢ်မၤဒ်သိးအံၤန့ၣ်, ထုးယံၤကွံာ် အဲလၢၣ် အသးလၢ အတၢ်ဂဲၤလိာ်တဖၣ်, ဒီးတၢ်တနာ်န့ၢ်လီၤသးတဖၣ်, ဒီးပာ်ဖှိၣ် အတၢ်ဆိကမိၣ်လၢ ကစၢ်ယွၤ, ဒီးတၢ်စံးဘျုးစံးဖှိၣ်ယွၤ အဂ့ၢ်အကျိၤတဖၣ်န့ၣ်လီၤ.

ခီဖျိလၢတၢ်ပညိၣ်ပာ်ဖှိၣ် ကစၢ်ယွၤအစိအကမီၤ, ဒီးအတၢ်ကတဲာ်ကတီၤတဖၣ်အဃိ, ယွၤအပှၤဂီၢ်မုၢ်တဖၣ် လဲၤခီဖျိကွၢ်ဆၢၣ်မဲာ် တၢ်ကီတၢ်ခဲဒိၣ်ဒိၣ်မုၢ်မုၢ်အဂ့ၢ်န့ၣ် လံာ် ဧ့စြၤ ပာ်ဖျါထီၣ်ဝဲဒၣ်န့ၣ်လီၤ. ပှၤဂီၢ်မုၢ်တဖၣ် ဘၣ်လဲၤခီဖျိ ဘၤဘူၤလိၣ် တၢ်စိာ်မၢကဲကုၢ် အါနံၣ်အါလါဝံၤအလီၢ်ခံ, စီၤပၤ ကိရ့ၣ် ပျဲပှၤယူဒၤဖိတဖၣ် ကဟဲက့ၤဆူအံၣ်စရ့လး အထံအကီၢ်, ဒ်သိးကတ့သူၣ်ထီၣ်က့ၤ ကစၢ်ယွၤအတၢ်လုၢ်ဟံၣ် (ဧ့စြၤ ၁-၂) န့ၣ်လီၤ. ပှၤယူဒၤဖိလၢအဟဲက့ၤတဖၣ်န့ၣ် အိၣ်ဒၣ်တနီၤ (၂:၆၄) န့ၣ်လီၤ. “တၢ်မၤပျံၤမၤဖုးအဝဲသ့ၣ်လၢပှၤကီၢ်ဖိတဖၣ်” (:၃) ဒၣ်လဲာ်, ဒီးတၢ်ဖံးတၢ်မၤဖးဒိၣ်လၢအကဘၣ်မၤဝံၤဝဲအဂီၢ်န့ၣ် အဝဲသ့ၣ်ပာ်လီၤ “ယွၤအနူၢ်အခီၣ်ထံး” (၃:၁၀) န့ၣ်လီၤ. ဝံၤန့ၣ်ဒီး, ပှၤဂီၢ်မုၢ်တဖၣ် “အုၣ်တၢ်စံးထီၣ်ပတြၢၤ, တၢ်သးဝံၣ်ယွၤ, ‘အဂ့ၢ်ဒ်အံၤ, မ့ၢ်အဂ့ၤဝဲလီၤ. မ့ၢ်အဘျုးအဖှိၣ်အိၣ်ဝဲလၢ အံၣ်စရ့လးအဖီခိၣ် လီၤထူလီၤယိာ်အဂ့ၢ်လီၤ.’
ဒီးတုၤအစံးထီၣ်ပတြၢၤယွၤဒီး ပှၤဂီၢ်မုၢ်ခဲလၢာ် ကိးပသူထီၣ်လၢအသီၣ်ဖးဒိၣ်,” (၃:၁၁) န့ၣ်လီၤ.

နသးအဂံၢ်အဘါမ့ၢ်လီၤစၢ်, (မ့) နမ့ၢ်ဘၣ်ကွၢ်ဆၢၣ်မဲာ် တၢ်ကီတၢ်ခဲတဖၣ်, နကပာ်ဖျါထီၣ်အီၤလၢ နထးခိၣ်တန့ၢ်တသ့တဖၣ်န့ၣ်ဒီး, ဃၣ်ကဒါက့ၤ နသးအတၢ်ဆိကမိၣ်တဖၣ်ဆူ ကစၢ်ယွၤအအိၣ်န့ၣ်တက့ၢ်. “ဂံၢ်တၢ်ဆိၣ်ဂ့ၤ . . . ယွၤမၤတၢ်အါမးလၢနဂီၢ် နကထံၣ်,” ဒီးပှၤလၢအအဲၣ်ယွၤတဖၣ်အဂီၢ်, ကစၢ်ယွၤကမၤတၢ် အါမးဆူညါထီဘိန့ၣ်လီၤ.