ဖဲ ၂၀၂၀ နံၣ်န့ၣ် အလံဒၢ် (Alida) မၤကွၢ်ဝဲဒၣ် (DNA), ဒီးထံၣ်ဝဲလၢ အတၢ်ဘၣ်ထွဲ အိၣ်ဒီးပှၤတဂၤလၢ ကီၢ်အမဲရကၤ အတခီတဝာ်န့ၣ်လီၤ. လၢခံန့ၣ် အဝဲဒီးအဖိမုၣ်တဖၣ် ဃုထံၣ်ဝဲဒၣ် လၢ ၁၉၅၀ နံၣ်တဖၣ်အတီၢ်ပူၤ, တၢ်ပရၢပစၢၢ် အတၢ်ကစီၣ်တဖၣ်န့ၣ်ဒီး, သ့ၣ်ညါက့ၤဝဲလၢ ပှၤတဂၤအံၤ မ့ၢ် အလံဒၢ် အဖါတံၢ် လူဝ့း(စ) လၢ အလီၤမၢ်ယံာ်တ့ၢ်လံဝဲတဂၤန့ၣ်လီၤ. လၢအပူၤကွံာ် ၁၉၅၁ နံၣ်, ဖဲ အသးအိၣ်ဒံးဒၣ် ဃုနံၣ်ဖိအကတီၢ်န့ၣ် ဘၣ်တၢ်ဖီၣ်ဆူၣ်ပာ်ခူသူၣ်အီၤ လၢဖီကရၢၢ်အပူၤန့ၣ်လီၤ. လူဝ့း(စ) လီၤမၢ်တ့ၢ်ဝဲဒၣ် အနံၣ် နွံဆံ လဲၤပူၤကွံာ်ဝံၤ, အကတၢၢ်န့ၣ် DNA အတၢ်မၤကွၢ်အံၤ နဲၣ်ဆှၢက့ၤ အဝဲသ့ၣ်ဆူ သွံၣ်ထံအဘူးအတံၢ်တဖၣ် က့ၤပာ်ဖှိၣ်ထီၣ်အသးန့ၣ်လီၤ. အလံဒၢ် စံးဝဲဒၣ်လၢ “ပတၢ်ဂ့ၢ်ဖိအံၤ ကဲထီၣ် တၢ်မၤစၢၤသ့ဝဲဒၣ်လၢ ဒူၣ်ဖိထၢဖိအဂုၤအဂၤတဖၣ်အဂီၢ်အဃိ,… ယအဲၣ်ဒိးစံးဝဲလၢ, တဘၣ်သးဟးဂီၤ (ပျဲကွံာ်) တဂ့ၤ” န့ၣ်လီၤ.
ပကဟံးဃာ် တၢ်မုၢ်လၢ်ဆူညါအဂီၢ်, အနံၣ် နွံဆံ န့ၣ် မ့ၢ်တၢ်ဆၢကတီၢ်အယံာ်အထၢန့ၣ်လီၤ. ဖဲကစၢ်ယွၤ စံးဘၣ်တဲဘၣ်အပှၤဂီၢ်မုၢ်လၢ, “ပှၤကလုာ်တဖၣ်အံၤ ကမၤဘၤဘူၤလိၣ် အစီၤပၤအတၢ်အနံၣ်နွံဆံ” (ယံး ၂၅:၁၁) န့ၣ်ဒီး, ဝံယံးရမံယၤ, ဒီးပှၤယူဒၤဖိတဖၣ် အသးကဘၣ်ဒိဘၣ်ထံး, ဒီးကပျံၤတၢ်ဖုးတၢ်န့ၣ်လီၤ. ဘၣ်ဆၣ်, ပှၤဂီၢ်မုၢ်တဖၣ် တဒိကနၣ်ယွၤ, ဒီးတဃၣ်ကွံာ်အသးလၢ “အကျဲအၢဒၣ်ဝဲ…ဒီးလၢအမၤတၢ်အၢတဖၣ်” (:၅) အဃိ, ကဲထီၣ် တၢ်လၢအမၤဟးဂီၤအဝဲသ့ၣ်, ဒီးဆှၢပှၤဂီၢ်မုၢ်ဆူ “တၢ်ကမၢကမၣ်အလီၢ်, ဒီးတၢ်ဒုၣ်ဒွဲၣ်အလီၢ်” (:၉) န့ၣ်လီၤ. မ့ၢ်လၢပှၤဂီၢ်မုၢ်တဖၣ် တဒိကနၣ် ကစၢ်ယွၤအဃိ, လၢလံာ်ယံးရမံယၤအပူၤန့ၣ် တၢ်ကတိၤ စံၣ်ညီၣ်အဝဲသ့ၣ် အါန့ၢ်အဘျီသၢဆံန့ၣ်လီၤ. အနံၣ်နွံဆံန့ၣ် ပှၤဂီၢ်မုၢ်တဖၣ် အသးကကလၢၢ်ဘၣ်ဝဲ ဒ်တၢ်ဆၢကတီၢ်အယံာ်အထီအသိးဘၣ်ဆၣ်, ယွၤကအိၣ်ဒီး အပှၤဂီၢ်မုၢ်, ဒီးအၢၣ်လီၤအီလီၤ အပှၤဂီၢ်မုၢ်လၢ အကတၢၢ်န့ၣ် အကတီၢ်ကီခဲတဖၣ် ကလဲၤပူၤကွံာ်ဝဲဒၣ် (၂၉:၁၀) န့ၣ်လီၤ.
ဒ်ပဘၣ်ကွၢ်ဆၢၣ်မဲာ် တၢ်အကတီၢ် လၢအတၤပှၤတဖၣ်န့ၣ် ဖျါလၢကမၤအသးဆူညါထီဘိန့ၣ်ဒီး, ဒ်သိးပကနာ်သန့ၤ ကစၢ်ယွၤအဂီၢ်, ပဘၣ်ဂုာ်ဂဲၤလိာ်ဝဲဒၣ်လဲာ်, မ်ပကသ့ၣ်နီၣ်ထီၣ် ကစၢ်ယွၤအတၢ်အၢၣ်လီၤလၢ ကစၢ်ယွၤ အိၣ်ဒီးပှၤ, ဒီးအဲၣ်ပှၤ (၃၀:၁၁) န့ၣ်လီၤ. လၢတၢ်ဒိကနၣ် ကစၢ်ယွၤ, ဒီးလၢတၢ်အိၣ်ခိးကွၢ်စိတၢ်အပူၤန့ၣ် ပဃုထံၣ်န့ၢ် တၢ်မုၢ်လၢ်သ့ဝဲဒၣ်န့ၣ်လီၤ.