ယပၢ်ဒီးယမိၢ် ထံၣ်လိာ်အသး အဆိကတၢၢ်တဘျီန့ၣ် ဖဲပှၤမၤမူးသးဖှံ, လၢဝ့ၢ်လိဒိၣ် န့ၣ်လီၤ. လၢခံတဘျီန့ၣ် ဒ်သိးယပၢ်ကထံၣ်ဘၣ်ယမိၢ်အဂီၢ်, ပှၤတကွဲမုာ်အီၤဆူမူးသးဖှံ ဘၣ်ဆၣ်, လဲၤဝဲဒၣ်, ဒီးလၢသၢဘျီတဘျီန့ၣ် ကတဲာ်ကတီၤရဲၣ်ကျဲၤဝဲမူသးဖှံ, ဒီးကွဲမုာ်ဝဲဒၣ် ယမိၢ်န့ၣ်လီၤ. အကတၢၢ်န့ၣ် ယပၢ် လဲၤကိး-ဟးဒိးလိာ်ကွဲသိလ့ၣ်ဒီးယမိၢ်ဆူ ခိခိၣ် ပှၢ်လၢ်ကျါ, လၢအသိလ့ၣ်လီၢ်လံၤဖိ “ရိဘၢၣ် စံၣ်ဒဲ(န)” (Rover Sedan), အတၢ်လုၢ်ဒိၣ် ပှ့ၤဒိၣ်ဖိလၢအအိၣ်ဒီးအီၤန့ၣ်လီၤ.
ယမိၢ်ဒီးယပၢ်န့ၣ် ကဲထီၣ်ဝဲဒၣ် နီၢ်ဒီတၢ်အဲၣ်တီတဖၣ်ဘၣ်ဆၣ်, တၢ်ဂ့ၢ်ကီအိၣ်ထီၣ်ဝဲတမံၤန့ၣ်, မ့ၢ်လၢယမိၢ် ကဘၣ်လဲၤဝဲဆူ ကီၢ်ပံၣ်ရူ ဒ်သိးကမၤဝဲတၢ်သးခုကစီၣ်အတၢ်မၤ အဂီၢ်န့ၣ်လီၤ. ယပၢ် လဲၤဆှၢလီၤယမိၢ်ဆူကဘီယူၤသန့ၤ, ဒီးယဲၢ်လါလဲၤပူၤကွံာ်ဝံၤန့ၣ်, ယပၢ် လဲၤဝဲဆူ ပံၣ်ရူ အထံကီၢ်, ဒ်သိးကဃ့ဖျီအသးဒီးယမိၢ်န့ၣ်လီၤ. ဒီးအတၢ်ဂ့ၢ်ဖိအံၤအဂ့ၤကတၢၢ်တမံၤန့ၣ် ဒ်သိးကပှ့ၤန့ၢ် တၢ်ဒိးကဘီယူၤ လံာ်ပျဲက့အဂီၢ်, ယပၢ်ဘၣ်ဆါကွံာ် အသိလ့ၣ်ဖိလၢ အအဲၣ်ဘၣ်ဝဲတခိၣ်န့ၣ်လီၤ.
နမ့ၢ်သံကွၢ် နီၢ်မၢ်သၤဒီးစီၤလါစရူး အဒီပုၢ်ဝဲၢ်မုၣ်, နီၢ်မၤရံလၢ တၢ်လုၢ်ဒိၣ်ပှ့ၤဒိၣ်, လၢအအိၣ်ဒီးအီၤန့ၣ် ကမ့ၢ်တၢ်မနုၤလဲၣ်န့ၣ်ဒီး, ကဒုးနဲၣ်ဝဲဒၣ်နၤလၢ အသိနၢမူနၢ်ဒး (ယိၤ ၁၂:၃) န့ၣ်လီၤ. နမ့ၢ်အိၣ်ဝဲဒၣ် ဖဲမူးသးဖှံလၢ အဝဲဒီးနီၢ်မၢ်သၤ တူၢ်လိာ်မုာ် ကစၢ်ယ့ၣ်ရှူး (:၂). ဒီးထံၣ်ဘၣ် နီၢ်မၤရံ ဟံးန့ၢ် သိနၢမူနၢ်ဒး, လၢအလုၢ်ဒိၣ်ပှ့ၤဒိၣ်, ဒီးဖှူဝဲဒၣ် ကစၢ်ယ့ၣ်ရှူးအခီၣ်န့ၣ်ဒီး, လၢနီၢ်မၤရံ အဂီၢ်, ကစၢ်ခရံာ်မ့ၢ်တၢ်မနုၤတမံၤလဲၣ်န့ၣ် နကသ့ၣ်ညါနဲန့ၣ်လီၤ. ကစၢ်ယ့ၣ်ရှူး မ့ၢ်ပှၤလၢအလုၢ်အပှ့ၤဒိၣ်နီၢ်မးတဂၤ, ဒီးမ့ၢ်ပှၤအိၣ်ဒီးအလုၢ်အပှ့ၤတဂၤန့ၣ်လီၤ.
လၢယမိၢ်အဂီၢ်, ယပၢ် ဆါကွံာ်ဝဲအသိလ့ၣ်န့ၣ် တမ့ၢ်ဝဲထဲ ကပှ့ၤန့ၢ် တၢ်ဒိးကဘီယူၤ အလံာ်ပျဲက့ဖိအဂီၢ်ဧိၤဘၣ်. မ့ၢ်တၢ်ပနီၣ်တမံၤလၢ ယပၢ် ပာ်လုာ်ပာ်ပှ့ၤဝဲဒၣ် ယမိၢ်ဒိၣ်မး အဃိန့ၣ်လီၤ. ဒီးနီၢ်မၤရံ အတၢ်မၤစ့ၢ်ကီး, အခီပညီအိၣ်ဝဲဒၣ် ဒိၣ်ဒိၣ်ယိာ်ယိာ်- မ့ၢ်လၢ အဝဲကတဲာ်ကတီၤဆိ တၢ်ကခူၣ်လီၤ ကစၢ်ယ့ၣ်ရှူး အဂီၢ် (:၇) န့ၣ်လီၤ. ဒ် နီၢ်မၤရံအသိး, ပမ့ၢ်လုၢ်ထီၣ်ပာ်ထီၣ် တၢ်လၢပပာ်လုၢ်ပာ်ပှ့ၤ အဒိၣ်ကတၢၢ်တဖၣ် လၢကစၢ်ယွၤအဂီၢ်န့ၣ်ဒီး, ခီဖျိလၢတၢ်ဆဲးကပီၤဖျါက့ၤ ကစၢ်ယ့ၣ်ရှူး ဟ့ၣ်လီၤအသးသမူလၢပဂီၢ်အပူၤန့ၣ် ကမ့ၢ်ဝဲတၢ်မၤသကိးတၢ်ဒီးကစၢ်ယွၤ, လၢအတၢ်အုၣ်က့ၤခီၣ်က့ၤအတၢ်မၤအပူၤန့ၣ်လီၤ.
