ဖဲလၢယမ့ၢ်ပှၤသးစၢ်, ဒီးတၢ်ဂိၢ်ထီၣ်သီအကတီၢ်, ယဖံဒိးန့ၢ် ခရ့းစမၢး(စ) ကဲး(တ)လီးတဖၣ်လၢ ကၠ့ၣ်စံၣ် ပဲ(န)နံၣ် (JCPenny) အတၢ်ဆါတၢ်ပှ့ၤကျး ကိးဘျီဒဲးန့ၣ်လီၤ. လၢတၢ်သးခုဖးဒိၣ်အပူၤန့ၣ် ယကွၢ်ခူသူၣ် တၢ်ဂီၢ်ဘိးဘၣ်သ့ၣ်ညါလၢအလီၤကမၢ ကမၣ်တဖၣ်န့ၣ်လီၤ.
ခ့ခါအဆၢကတီၢ်, တၢ်ဂီၢ်ဘိးဘၣ်သ့ၣ်ညါတဖၣ် ဟဲဖျါထီၣ်ဝဲဒၣ် လၢစမးကွဲၤဒီနၢ်ဖိတဖၣ်အပူၤ ကိးမုၢ်နံၤဒဲးန့ၣ်လီၤ. တၢ်ဂီၢ်ဘိးဘၣ်သ့ၣ်ညါတဖၣ်အံၤ ဘၣ်တၢ်တ့ဒုးအိၣ်ထီၣ် တၢ်လၢပမုၢ်လၢ်သးစဲတဖၣ်, တၢ်လၢပအဲၣ်ဒိးတဖၣ်, ဒီးအိၣ်ဟဲဖျါထီၣ်အကစၢ်ဒၣ်ဝဲ (algorithmic distillation) န့ၣ်လီၤ. လၢတၢ်သ့ၣ်တဖၣ်အံၤအဃိ, ပကျဲလီၤမၢ်သ့ဝဲဒၣ်န့ၣ်လီၤ. တၢ်တယံာ်ဒံးဘၣ်န့ၣ်, တၢ်မၤကျိၤကျဲဒ်သိးအံၤန့ၣ် ဘၣ်တၢ်ကိးအီၤလၢ “ဒရံစကရိလ့” (dreamscrolling), ဒီးအခီပညီမ့ၢ်ဝဲဒၣ် ပလူၤကွၢ်ဃုတၢ်တမံၤမံၤ, ဖဲပပှ့ၤအီၤတန့ၢ်ဒံးဝဲ ဒၣ်လဲၣ်, ပဆၢပှ့ၤန့ၢ်အီၤ ဖဲတၢ်ဆၢကတီၢ်တဘျီဘျီန့ၣ်လီၤ. ဝါပိ (One Poll) အတၢ်ဃိထံ
ဃုသ့ၣ်ညါတၢ်တထံၣ်အပူၤန့ၣ် ပာ်ဖျါဝဲဒၣ်လၢ ကီၢ်အမဲရကၤပူၤ, ပှၤစူးကါ စမးကွဲၤဒီနၢ်ဖိတဖၣ် မၤလၢာ်တၢ်ဆၢကတီၢ် တနံၤန့ၣ် အစှၤကတၢၢ် ခံနၣ်ရံၣ် ခီဖျိလၢတၢ်လူၤကွၢ်ဃုဝဲဒၣ်တၢ်လၢအဝဲသ့ၣ်အဲၣ်ဒိးတဖၣ်န့ၣ်လီၤ. တၢ်ဂီၤတဖၣ်အံၤ ထုးန့ၢ်ပသူၣ်ပသး, ဒ်သိးပကဆၢမုၢ်လၢ်, ဒီးနာ်န့ၢ်တၢ်လၢ “ယမ့ၢ်အိၣ်ဒီးပိးလီဖိအံၤန့ၣ် ကဂ့ၤထဲလဲၣ်” န့ၣ်လီၤ.
တၢ်လၢအထီဒါလိာ်သးန့ၣ် လံာ်စီဆှံ ကွဲမုာ်ပှၤလၢ ပကစူးကွံာ်ညိကွံာ် တၢ်သးကွံဟီၣ်ခိၣ်အတၢ်ထူးတၢ်တီၤတဖၣ်န့ၣ်လီၤ. ၁ ပ့း ၁:၃-၄ အပူၤန့ၣ် ပကဖးဘၣ်လၢ “ယွၤ, ပကစၢ်ယ့ၣ်ရှူးခရံာ်အပၢ်, မ်အဘၣ်တၢ်ဆိၣ်ဂ့ၤတက့ၢ်. အဝဲဒၣ်, ဒ်အတၢ်သးကညီၤဒိၣ် အသိး, မၤလိၣ်ထီၣ်ကဒီးပှၤလၢ တၢ်မုၢ်လၢ်အမူအပူၤ, လၢယ့ၣ်ရှူးခရံာ် အတၢ်ဂဲၤဆၢထၢၣ်လၢတၢ်သံအဃိ, ဆူတၢ်န့ၢ်သါလၢ အတဟးဂီၤဘၣ်, ဒီးတဘၣ်အၢဘၣ်, ဒီးတလီၤညွံးဘၣ်အပူၤ” န့ၣ်လီၤ. စီၤပ့းတရူး ထိၣ်သတြီၤဝဲဒၣ် တၢ်လၢပသးဆၢမုၢ်လၢ် မၤမံသူၣ်မုာ်သးပှၤ တစိၤတလီၢ်ဖိတဖၣ် , ဒီးတၢ်ပာ်လီၤ ပတၢ်မုၢ်လၢ်လၢယွၤအတၢ်သးကညီၤအလိၤန့ၣ်လီၤ. လၢခံ ပာ်ဖျါအါထီၣ်ဝဲဒၣ်လၢ “မၤသးဒ်န့ၣ်ဒီး, မုၢ်လၢ်သပှၢ်ပှၢ် တၢ်ဘျုးတၢ်ဖှိၣ်လၢ တၢ်ကဟဲစိာ်န့ၢ်သု, ဖဲယ့ၣ်ရှူးခရံာ်ကအိၣ်ဖျါထီၣ်န့ၣ်တက့ၢ်” န့ၣ်လီၤ.
နီၢ်နီၢ်န့ၣ်, ယမ့ၢ်ပှၤလၢ အလူၤကွၢ်ဃုတၢ်လၢ စမးကွဲၤဒီနၢ်န့ၣ်လီၤ. ဘၣ်ဆၣ်, ဒ်သိးယကမၤလိန့ၢ် တၢ်နာ်သန့ၤ ကစၢ်ယွၤ အတၢ်မုၢ်လၢ်အဒိၣ်အမုၢ် တပတီၢ်ဘၣ်တပတီၢ်, ဒီးယကပာ်လီၤ ပတၢ်ဆၢမိၣ်န့ၢ်သးလီတၢ်တဖၣ် လၢယွၤအလိၤလၢာ်လၢာ်ဆ့ဆ့အဂီၢ်, ယဃ့ထုကဖၣ်ယဲလၢ ကစၢ်ယွၤ ကမၤစၢၤယၤန့ၣ်လီၤ.
