ဖဲ ၁၉၄၂ နံၣ် တၢ်ဂိၢ်ထီၣ်သီအကတီၢ်န့ၣ်, မုၢ်အိၣ်ဘှံးနံၤတၢ်ဘူၣ်တၢ်ဘါဝံၤဝဲဒၣ် လၢထံကီၢ် ကလံၤစိး တၢ်ဘါသရိာ်ဖိတဖျၢၣ်န့ၣ်ဒီး, ယပၢ်ဒီးအဒီပုၢ်ဝဲၢ်တဖၣ် ဟဲက့ၤဟးဝဲဒၣ်ဆူ အဟံၣ်, လၢအအိၣ်ဘူးဒီးတၢ်ဘါသရိာ်န့ၣ်လီၤ. မ့မ့ၢ်အဝဲသ့ၣ်အပၢ်န့ၣ် အိၣ်တ့ၢ်ဝဲဒၣ်လၢတၢ်ဘါသရိာ်န့ၣ်လီၤ. ဖဲအပၢ်ဟဲက့ၤခီဂာ် တၢ်လူၢ်ဖိလုာ်ဘၢဝဲဒီးမူခိၣ်ဖီတဖၣ်, ဒီးဟဲက့ၤတုၤဆူ အစံာ်ပျီဟံၣ်ဖိန့ၣ်ဒီး, အပၢ်ဟီၣ်ဝဲဒၣ်န့ၣ်လီၤ. မ့ၢ်လၢအပၢ်သ့ၣ်ညါ ဖဲ(လ) ဟါဘၢၣ် (Pearl Harbor) ကဘီသန့ အတၢ်ဟးဂီၤအဂ့ၢ်, ခီဖျိလၢပှၤယပၣ်ဖိ အကဘီယူၤတဖၣ် ဟဲတ့ၢ်လီၤမ့ၣ်ပိၢ်အဃိ, အဖိခွါတဖၣ်,ဃုာ်ဒီးယပၢ်န့ၣ်- ကဘၣ်လဲၤဝဲဒၣ်ဆူ တၢ်ဒုးပျီ န့ၣ်လီၤ. ယပၢ် သ့ၣ်နီၣ်ထီၣ်က့ၤ တၢ်အကတီၢ်ဖိ ခဲလၢာ်ခဲဆ့ လီၤတံၢ်လီဆဲးထီဘိန့ၣ်လီၤ.

တၢ်ဂ့ၢ်အိၣ်စဲထီအသး လၢပသးအတၢ်သ့ၣ်ညါအပူၤဒ်သိးအံၤန့ၣ် ပှၤဃိထံဃုသ့ၣ်ညါတၢ်တဖၣ် ကိးဝဲလၢ “တၢ်သ့ၣ်နီၣ် အိၣ်စဲထီဃာ်အသးလၢ ပသးကံၢ်ပူၤ” န့ၣ်လီၤ. ဆိကမိၣ်ထီၣ်နဲ သးသမူတဖၣ် အတၢ်လီၤမၢ်ဖးဒိၣ်အမုၢ်နံၤ ၉/၁၁ အဂ့ၢ်, (မ့) မုၢ်တနံၤလၢ နလီၤမၢ် နဘူးနတံၢ်တဂၤဂၤအဂ့ၢ်န့ၣ်တက့ၢ်. နတၢ်လဲၤခီဖျိလၢ အမၤသးခုနၤအဒိၣ်ကတၢၢ်အဂ့ၢ်စ့ၢ်ကီး, ဆိကမိၣ်ထီၣ်နဲတက့ၢ်.

ဆိကမိၣ်ထီၣ်နဲ တၢ်သ့ၣ်နီၣ်တဖၣ်လၢ ကစၢ်ယ့ၣ်ရှူးအပျဲၢ်အဘီၣ်တဖၣ် အသးကံၢ်ပူၤန့ၣ်တက့ၢ်. အပျဲၢ်အဘီၣ်တဖၣ် ထံၣ်ဘၣ်ဝဲ တၢ်လီၤလိၢ်လီၤလးတမံၤဘၣ်တမံၤ န့ၣ်လီၤ. လၢတၢ်တပာ်သူၣ်ပာ်သးအပူၤန့ၣ် တၢ်ဂ့ၢ်ကီဖးဒိၣ်ဟဲလီၤဘၣ်အပျဲၢ်အဘီၣ်တဖၣ်န့ၣ်လီၤ. ဘၣ်ဆၣ်, ကစၢ်ယွၤ အဖိခွါန့ၣ် ဘၣ်တၢ်ဖီၣ်န့ၢ်အီၤ, ဒီးဘၣ်တၢ်ပျၤထီမၤသံအီၤလၢထူၣ်စုညါအလိၤဝံၤ, ဂဲၤဆၢထၢၣ်သမူထီၣ်က့ၤဝဲဒၣ်န့ၣ်လီၤ. ပှၤမၤကဒၤလ့ၣ်ဖိ နီၢ်မၤရံ က့ၤဝဲဒၣ်ချ့ချ့, ဒီးစံးဘၣ်တဲဘၣ်အပျဲၢ်အဘီၣ်တဖၣ်လၢ, “သါထံၣ်ဘၣ် ကစၢ်” (ယိၤ ၂၀:၁၈) န့ၣ်လီၤ. လၢတၢ်ပျံၤတၢ်ဖုးအပူၤန့ၣ် အပျဲၢ်အဘီၣ်တဖၣ် အိၣ်ခူသူၣ်ဝဲဒၣ်အဖၢမုၢ်န့ၣ်လီၤ. တချုးလၢ ကစၢ်ယ့ၣ်ရှူး ဟဲဒီးဆၢထၢၣ် (ယိၤ ၂၀:၁၉) လၢအပျဲၢ်အဘီၣ်တဖၣ်အကျါန့ၣ် တၢ်ကစီၣ်လၢ အဝဲသ့ၣ်နၢ်ဟူဝဲန့ၣ် တနာ်ဝဲ (လူၤ ၂၄:၁၁) ဘၣ်န့ၣ်လီၤ. ဝံၤန့ၣ်ဒီး, အပျဲၢ်အဘီၣ်တဖၣ် အသးခုထီၣ်ဒိၣ်ဒိၣ်ကလဲာ် (:၂၀) န့ၣ်လီၤ.

တၢ်အကတီၢ်ဖိ ဒ်သိးအံၤတဖၣ်အကျါတနီၤန့ၣ် စီၤယိၤဟၣ် ကွဲးနီၣ်ပာ်ဖျါဝဲလၢ, “ဒီးဒ်သိးသုကနာ်လၢ ယ့ၣ်ရှူးမ့ၢ်ခရံာ်, ယွၤအဖိခွါ, ဒီးသုနာ်တၢ်သတးဒီး, ဒ်သိးသုကန့ၢ်ဘၣ် တၢ်မူလၢအမံၤဒီး, တၢ်အံတဖၣ် ဘၣ်ကွဲးအသး” (:၃၁) န့ၣ်လီၤ. “တၢ်သ့ၣ်နီၣ် အိၣ်စဲထီဃာ်အသးလၢ ပသးကံၢ်ပူၤ” န့ၣ် မ့ၢ်တၢ်လၢအအိၣ်ဂၢၢ်ဆိးကျၢၤလီၤဆီ လၢတၢ်လီၤထူလီၤယိာ်အပူၤန့ၣ်လီၤ.