ရိၣ်စံၣ် (Rosie) အတၢ်အိၣ်ဖျဲၣ်ဆၢက့ၤအမူးန့ၣ် မ့ၢ်တၢ်လၢပှၤသးပ့ၤနီၣ်အီၤတသ့ဘၣ်န့ၣ်လီၤ. တၢ်အီၣ်တၢ်အီတဖၣ် ဝံၣ်ဝဲဘဲဝဲ, လၢတၢ်သူၣ်ဖှံသးညီအပူၤ ပှၤကတိၤနံၤတၢ်တဖၣ်လၢစီၢ်နီၤခိၣ်, ဒီးအလံၤခွါ ဝဲၢ်ကိဖိတဂၤ အတၢ်ဟဲပာ်ဖျါထီၣ်အသးန့ၣ် မ့ၢ်တၢ်အဂ့ၤကတၢၢ်လၢအဂီၢ်န့ၣ်လီၤ. ဘၣ်ဆၣ်, တၢ်အဂ့ၤတဖၣ်အံၤ တၢ်မ့ၢ်ထိၣ်သတြီၤလၢ အဖိခွါခံဂၤအတၢ်ဟ့ၣ်မၤလၤကပီၤအီၤန့ၣ်ဒီး, မ့ၢ်တၢ်အဆံးအစှၤတဖၣ်န့ၣ်လီၤ. ရိၣ်စံၣ် အတၢ်တ့တၢ်ဖျီန့ၣ် တအိၣ်ဂၢၢ်ကျၢၤဘၣ်ဆၣ်, ဒ်အမ့ၢ် မိၢ်ထဲတဂၤဧိၤအသိး, အတၢ်သ့တၢ်ဘၣ် လီၤဆီတဖၣ်န့ၣ် ကဲဘျုးဝဲဒၣ်အဖိခွါခံဂၤအဂီၢ်န့ၣ်လီၤ. အဝဲသ့ၣ်စံးပတြၢၤမၤလၤကပီၤ ဝဲဒၣ်အမိၢ်န့ၣ်, ဒုးနဲၣ်ဖျါထီၣ်ဝဲဒၣ် ကယဲၢ်တၢ်ခဲလၢာ်, လၢတၢ်အံးထွဲကွၢ်ထွဲမၤလၢၦဲၤ အဝဲသ့ၣ်အတၢ်လိၣ်တဖၣ် အမိၢ်မၤဝဲဒၣ်ဒ်လဲၣ်အဂ့ၢ်န့ၣ်လီၤ. အဖိခွါအဆံးတဂၤ အတၢ်ကတိၤ “ယမိၢ်န့ၣ် မ့ၢ်ပိာ်မုၣ်လၢအပျံၤယွၤတဂၤ” န့ၣ် ပာ်ဖျါထီၣ်ဝဲဒၣ် ရိၣ်စံၣ် အတၢ်အိၣ်မူအဂ့ၤကတၢၢ်, လၢအဝဲသ့ၣ်အဂီၢ်န့ၣ်လီၤ.

လၢဟံၣ်လၢဃီ တၢ်ကူၣ်သ့ ဟဲခီဖျိလၢ တၢ်ပျံၤယွၤ မ့ၢ်တၢ်ဒ်လဲၣ်န့ၣ် ၦၤလၢအဖးလံာ်စီဆှံတဖၣ် ကထံၣ်ဘၣ်ဝဲလၢ လံာ်ကတိၤဒိ ၃၁:၁ဝ-၃၁ အပူၤန့ၣ်လီၤ. တၢ်ပျံၤယွၤ (:၃ဝ) စံးတၢ်န့ၣ်တၢ်ယူးယီၣ်ယွၤ လၢတၢ်ဆီၣ်လီၤသး, ဒီးသဆၣ်ထီၣ်ၦၤဂၤ ဒ်သိးကကဲထီၣ် ၦၤနာ်န့ၢ်ဘၣ်အီၤ (:၁၁-၁၂), ဂုာ်ကျဲးစၢၤ ဃုဖံးဃုမၤတၢ်, ဒီးပၢဆှၢရဲၣ်ကျဲၤကျိၣ်စ့ဂ့ၤဂ့ၤဘၣ်ဘၣ် (:၁၃-၁၉)န့ၣ်လီၤ. ဒီးဖဲပိာ်မုၣ်လၢအကူၣ်တၢ်သ့တဂၤ မ့ၢ်အိၣ်ဒီးတၢ်ပာ်သူၣ်ပာ်သး လၢအမ့ၢ် “ဟံၣ်ဃီမ့ၢ်တၢ်အဆိကတၢၢ်” (:၂၁-၂၈) စံးတၢ်န့ၣ် တမ့ၢ်ဝဲထဲ “အနီၢ်ကစၢ်ဒၣ်ဝဲအဟံၣ်တဖျၢၣ်ဧိၤ” အဂီၢ်ဘၣ်. ၦၤလၢအတမ့ၢ်အပှၤဟံၣ်ဖိဃီဖိတဖၣ်အတၢ်လိၣ်န့ၣ် ဃုထံၣ်မၤလၢၦဲၤဝဲအဃိ, ပှၤဂုၤပှၤဂၤတဖၣ် အသးဘၣ်သူၣ်ဘၣ်သးလၢအီၤ (:၂ဝ) န့ၣ်လီၤ.

ဒ် ရိၣ်စံၣ် အသိးႇ ပိာ်မုၣ်လၢအပျံၤယွၤသ့ၣ်တဖၣ်အတၢ်အိၣ်မူက့ၢ်ဂီၤန့ၣ် တမ့ၢ်တၢ်လၢ ၦၤတပာ်သူၣ်ပာ်သးအဝဲသ့ၣ်ဘၣ်. လီၤဆီဒၣ်တၢ်, အၦၤဟံၣ်ဖိဃီဖိတဖၣ်န့ၣ် သ့ၣ်ညါဝဲဒၣ် အဝဲသ့ၣ်အဂ့ၢ် (:၂၈) န့ၣ်လီၤ. ၦၤအိၣ်ဆိးဝဲဒီးအဝဲသ့ၣ်အဘူးကတၢၢ်သ့ၣ်တဖၣ် ဖဲအသးဝံၣ်စံးထီၣ်ပတြၢၤအဝဲသ့ၣ်န့ၣ်ဒီး, တမ့ၢ်တၢ်လၢအလီၤကမၢကမၣ်တမံၤဘၣ်န့ၣ်လီၤ. မ့ၢ်နအဲၣ်ဒိးကဲထီၣ် ၦၤပိာ်ကစၢ်ယ့ၣ်ၡူးအခံလၢ အပျံၤယွၤတဂၤန့ၣ်ဧါ. ဘၣ်မနုၤအဃိ, နတဃ့ ကစၢ်ယွၤအတၢ်မၤစၢၤန့ၣ်လဲၣ်. ဒီးလၢတၢ်ကီတၢ်ခဲအကတီၢ်အပူၤဒၣ်လဲာ်, တၢ်လၢနဃ့တဖၣ် ကစၢ်ယွၤမ့ၢ်စံးဆၢနၤန့ၣ်ဒီး, တဘၣ်ကမၢကမၣ်နဲတဂ့ၤ.