ဖဲ ၂ဝ၁ဝ နံၣ်န့ၣ်, ၦၤစူၢ်က့ၤနာ်က့ၤ ကစၢ်ယ့ၣ်ရှူး ကအိၣ်ဝဲဒၣ် လွံၢ်ကထိဃၣ်ဃၣ်န့ၣ် ပာ်ဖှိၣ်ထီၣ်အသးလၢအၣ်ဖရံးကး-ကလံၤထံး ထံကီၢ်, ခ့း(ဖ) အဝ့ၢ်(Cape Town, South Africa) န့ၣ်လီၤ. တၢ်အိၣ်ဖှိၣ်ဖးဒိၣ်တဘျီအံၤန့ၣ်, ခရံာ်တၢ်အိၣ်ဖှိၣ်တဖၣ်လၢ ထံကီၢ် ၁၉၈ ဘ့ၣ် အပှၤခၢၣ်စးတဖၣ် ဟဲပာ်ဖျါထီၣ်အသး, ဒီးစးထီၣ်လၢ ကစၢ်ယ့ၣ်ၡူး ဟဲလီၤလၢ ဟီၣ်ခိၣ်ချၢ, အနံၣ် ၂၀၀၀ အတီၢ်ပူၤန့ၣ် တၢ်ပာ်ပနီၣ်အီၤသ့လၢ ခရံာ်အတၢ်အိၣ်ဖှိၣ်ဖိတဖၣ် ဟဲပာ်ဖှိၣ်ရိဖှိၣ်အသး အအါကတၢၢ်န့ၣ်လီၤ.

မ့ၢ်လၢ ၦၤစူၢ်က့ၤနာ်က့ၤတၢ်ဖိတဖၣ်ခဲလၢာ် ကဟဲပာ်ဖှိၣ်ထီၣ်အသး, အမုၢ်တနံၤန့ၣ်ကအိၣ်ဝဲဒၣ် ဖဲတၢ်အိၣ်ဖှိၣ်ဖးဒိၣ်, လၢအတလိၣ် ပှၤအခၢၣ်စးတဖၣ်န့ၣ်လီၤ. စီၤယိၤဟၣ် အတၢ်ထံၣ်လၢညါခီ အိၣ်ဟဲဝဲလၢယွၤန့ၣ် ပာ်ဖျါထီၣ်ဝဲႇ “ယထံၣ်တၢ် ဒီးကွၢ်ကွၢ်, ၦၤဂီၢ်မုၢ်ဖးဒိၣ်လၢ ၦၤဂံၢ်ထီၣ်တသ့ဘၣ်နီတဂၤဘၣ်န့ၣ်, ဟဲလၢကယဲၢ်ၦၤကလုာ်, ဒီးကယဲၢ်ၦၤအဒူၣ်, ဒီးကယဲၢ်ၦၤဂီၢ်မုၢ်, ဒီးကယဲၢ်ၦၤကတိၤတၢ်အကျိာ် အကလုာ်ကလုာ်အကျါသ့ၣ်တဖၣ်န့ၣ် ဆၢထၢၣ်လၢလီၢ်ပစိာ်အမဲာ်ညါဒီးသိဖိအမဲာ်ညါ,……. ဒီးကိးပသူထီၣ်လၢ အကလုၢ်သီၣ်ဖးဒိၣ်, ဒီးစံးဝဲဒၣ်, မ်တၢ်အုၣ်က့ၤခီၣ်က့ၤအိၣ်ဒီး ပကစၢ်လၢ အဆ့ၣ်နီၤလၢ လီၢ်ပစိာ်အဖီခိၣ်, ဒီးသိဖိန့ၣ်တက့ၢ်.” (လီၣ်ဖျါ ၇:၉-၁ဝ)

ပထံလီၢ်ကီၢ်ပူၤ တၢ်အိၣ်ဖှိၣ်တဖၣ်န့ၣ် တမ့ၢ်လၢကဆဲးကပီၤဖျါထီၣ် ပှၤကညီ အတၢ်လီၤဆီလိာ်သးတဖၣ်လၢ ယွၤအဘီမုၢ်အထူအယိာ်အပူၤ ထီဘိဘၣ်. တၢ်ဂ့ၢ်အံၤ, ဘၣ်တဘျီဘျီန့ၣ် ကမ့ၢ်ဝဲဒၣ် တၢ်ဂ့ၢ်တၢ်ကျိၤအစၢတဖၣ်လၢ ပဟံးဃာ်ပၢဆှၢတန့ၢ်တသ့, ဒီးလၢတၢ်ဆၢကတီၢ်အဂၤတဖၣ်န့ၣ် ပအဲၣ်ဒိးဘူၣ်သကိးဘါသကိးတၢ်ဒီးၦၤလၢအဖျါ လီၤဂာ်ဒီးၦၤ, လၢအမ့ၢ် လုၢ်လၢ်တၢ်ဆဲးတၢ်လၤႇ ပှၤကညီတစိၤဘၣ်တစိၤႇ ထံဂ့ၢ်ကီၢ်ဂ့ၢ်, ဒီးမုၢ်ကျိၤဝဲၤကွာ် အတၢ်ရ့လိာ်ဘၣ်ထွဲလိာ်သးႇ လၢအဒ်သိးလိာ်သးတဖၣ်န့ၣ်လီၤ.

ဘၣ်ဆၣ်, ဖဲပတူၢ်လိာ်, ဒီးလူၤဃုထံၣ်န့ၢ် ကစၢ်ယွၤ အတၢ်ဟ့ၣ်သါ တၢ်ဃံတၢ်လၤလၢအလီၤဆီလိာ်သးတဖၣ်ဆူ အဖိအလံၤတဖၣ်အဂီၢ်န့ၣ်ဒီး, ကမ့ၢ်ဒၣ်ပမၤလၤကပီၤ ယွၤန့ၣ်လီၤ. တၢ်သ့ၣ်တဖၣ် ကဟ့ၣ်ထီၣ်ၦၤ ဒ်သိးပကသ့ၣ်ညါဆိ တၢ်လီၤဆီလိာ်သးအဂ့ၢ်, ဖဲပပာ်ဖှိၣ်ထီၣ်ပသးလၢမူခိၣ်ဘီမုၢ်, ဒီးကစၢ်ယ့ၣ်ရှူး လုၢ်ထီၣ်အသးသမူန့ၣ် ၦၤလၢအစူၢ်က့ၤနာ်က့ၤအီၤတဖၣ် ကဘူၣ်ထီၣ်ဘါထီၣ်အီၤအကတီၢ်န့ၣ်လီၤ.