အလဲထြီန့း (electronic) ခီပနံၣ်တခါအကစၢ် အဲဒရဲး(စ) (Andres) တဂၤ, အပှၤမၤတၢ်ဖိတဖၣ်လၢ “အဆါန့ၢ် နီၣ်ထိၣ်ဒိလၢအဂ့ၤလီၤဆီ” တဖၣ် ကလဲၤဟးကသုၣ်ဝဲလၢ ပီၣ်လဲၣ်နံၤတၢ်အိၣ်ဘှံးအိၣ်သါအလီၢ်, လၢမုၢ်တနံၤအဂီၢ်န့ၣ်လီၤ. အဲဒရဲးစ် လဲၤကိးဝဲဒၣ် အဖိခွါ ပှၤနွံနံၣ်ဖိ ကၠ့မံၣ် (Jimmy) စ့ၢ်ကီးန့ၣ်လီၤ. တချုးလၢအဝဲသ့ၣ်စးထီၣ်လဲၤတၢ်, ဖဲပှၤထီၣ်ဆူ သိလ့ၣ်လိၤအကတီၢ်, လၢတၢ်သူၣ်ဆူၣ်သးဂဲၤအပူၤန့ၣ်အဝဲဖီၣ်ဃာ် အပၢ်အစုန့ၣ်လီၤ. လၢတၢ်မၤလီၤနံၤတၢ်အဂီၢ်, ပှၤမၤတၢ်ဖိအကျါတဂၤသံကွၢ်အီၤလၢ, “နကလဲၤသကိးတၢ်ဒီးပှၤဧါ. နဆါန့ၢ်တၢ်န့ၣ် အိၣ်ဝဲဒၣ်ထဲလဲၣ်” န့ၣ်လီၤ. ကၠ့မံၣ် စံးဆၢဝဲဒၣ် “တအိၣ်နီတစဲးဘၣ်,” ဒီးကွၢ်ထီၣ် အပၢ်ဝံၤ, စံးကဒီး ဝဲဒၣ်လၢ, “ယပၢ်ပျဲ ယကလဲၤသကိးတၢ်” န့ၣ်လီၤ.

မ့ၢ်လၢအပၢ်ဟ့ၣ်ဝဲဒၣ် တၢ်လဲၤအပှ့ၤ လၢအဂီၢ်အဃိ, ဒ်သိးကလဲၤဟးလိာ်ကွဲ, ဟးကသုၣ်ဒီးပှၤဂၤအဂီၢ်န့ၣ် တလိၣ်လၢ ကၠ့မံၣ် ကဘၣ်မၤတၢ်ဘၣ်န့ၣ်လီၤ. ဒ်ပမ့ၢ်ဝဲဒၣ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိးန့ၣ်, ဒ်သိးပကလဲၤနုာ်ဝဲဆူ မူခိၣ်ဘီမုၢ်အဂီၢ်, ပတသန့ၤလီၤပသးလၢ ပတၢ်မၤအဂ့ၤအဝါတဖၣ်အလိၤ, ဒ်တၢ်လိၣ်အဂံၢ်ထံးတမံၤအသိးဘၣ်န့ၣ်လီၤ. အဂ့ၢ်ဒ်အံၤ, ကစၢ်ယွၤ ဟ့ၣ်ပှၤကျဲ ခီဖျိလၢ ကစၢ်ယ့ၣ်ရှူး အတၢ်သံ, ဒီးအတၢ်ဂဲၤထၢၣ်သမူထီၣ်က့ၤ, လၢပဂီၢ်အဃိန့ၣ်လီၤ. “တၢ်ဒဲးဘးအဘူးအလဲန့ၣ် မ့ၢ်တၢ်သံ” (ရိမ့ၤ ၆:၂၃), ဒီးကစၢ်ယ့ၣ်ရှူး အသွံၣ်န့ၣ် မ့ၢ် “တၢ်ဟ့ၣ်အပှ့ၤ” လၢကမၤထူၣ်ဖျဲးပှၤဒီးပဒ့ၣ်ကမၢ်လၢကစၢ်ယွၤန့ၣ်လီၤ. အ့းဖ့း ၁:၇ စံးဘၣ်ပှၤ, “လၢအဝဲဒၣ်အပူၤ ပအိၣ်ဒီးတၢ်ပှ့ၤက့ၤပှၤလၢအသွံၣ်, တၢ်ပျၢ်ပတၢ်ကမၣ် လၢတၢ်ဒဲးဘး” န့ၣ်လီၤ. “ဒ်သိးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤ တဂ့ၤဒီး, ကန့ၢ်ဘၣ်တၢ်မူအထူအယိာ်” (ယိၤ ၃:၁၆) အဂီၢ်, ကစၢ်ယ့ၣ်ရှူး အိးထီၣ်ကျဲန့ၣ်လီၤ. ကစၢ်ခရံာ် အတၢ်မၤ, ဒီးပစူၢ်က့ၤနာ်က့ၤ အတၢ်မၤတမံၤအံၤန့ၣ် ပျဲပှၤလၢပကအိၣ်ဒီးအီၤလီၤစိၤလီၤထီန့ၣ်လီၤ.

ဖဲပစူၢ်က့ၤနာ်က့ၤ ကစၢ်ယ့ၣ်ရှူး ဒ်အမ့ၢ်တၢ်အုၣ်ခီၣ်ကစၢ်တဂၤန့ၣ်, ပကဲထီၣ် ကစၢ်ယွၤ အဖိတဖၣ်န့ၣ်လီၤ. တၢ်အံၤမ့ၢ်ဝဲဒၣ် “ယွၤအဘျုးအဖှိၣ်အလၤကပီၤ, လၢယွၤဟ့ၣ်ကလီပှၤ” (အ့းဖ့း ၁:၆) န့ၣ်လီၤ. ဒ် ကၠ့မံၣ် အသိး, ပကွၢ်ထီၣ်ဆူ ပပၢ်အိၣ်လၢမူခိၣ်, ဒီးလၢတၢ်နာ်ကျၢၤမုဆှုအပူၤန့ၣ် ပစံး “အဝဲပျဲပလဲၤသကိး” သ့ဝဲန့ၣ်လီၤ.