ဖဲ ၂၀၂၄ နံၣ်န့ၣ်, ပှၤမၤပနံာ်ကၤ, ဒီးကဲဒိၣ်ဝဲဒၣ် အကကွဲၢ်လၢအကထိ, ရီဘၢး ဟ့ ကၠူနယၢၣ် (Robert Hale Jr.) တဂၤ စံးကတိၤလီၤတၢ်ဆူ ဖၠၣ်စိမိၤ ဖျိကၠိဖိ အဂၤ ၁၂၀၀, ဒီးစံးဝဲဒၣ် “တၢ်ဂုာ်ကျဲးစၢၤ အကတီၢ်ဒ်သိးအံၤန့ၣ်, သဆၣ်အါထီၣ်ဝဲဒၣ် တၢ်လၢပလိၣ်ဘၣ်တဖၣ်, လၢအမ့ၢ် တၢ်ဟ့ၣ်ခီဟ့ၣ်နီၤ, တၢ်ကဟုကယာ်, ဒီးတၢ်သးအိၣ်ဟ့ၣ်ညီတၢ်န့ၣ်လီၤ. ယၤဒီးယမါ, ပအဲၣ်ဒိးဟ့ၣ်နီၤလီၤသု တၢ်ဟ့ၣ်လီၤဆီ ခံမံၤန့ၣ်လီၤ. တၢ်အခီၣ်ထံးတမံၤန့ၣ် ပတၢ်ဟ့ၣ်လီၤဆီဆူ သုဂီၢ်, ဒီးတၢ်ခံမံၤတမံၤန့ၣ် တၢ်ဟ့ၣ်လီၤဆီ လၢအမ့ၢ်တၢ်ဟ့ၣ်ညီတၢ်” န့ၣ်လီၤ. စံးကတိၤဝဲဝံၤ, လၢတၢ်တဆိကမိၣ်အပူၤန့ၣ် ဖျိကၠိတဖၣ် ဒိးန့ၢ် လံာ်ဒၢခံဖျၢၣ်- လံာ်ဒၢတဖျၢၣ်စူၢ်စူၢ်အပူၤန့ၣ် စ့ အိၣ်ဝဲဒၣ် ဒီလၣ် ယဲၢ်ကယၤန့ၣ်လီၤ. ဖျိကၠိတဂၤအဂီၢ် လံာ်ဒၢတဖျၢၣ်, ဒီးအိၣ်တ့ၢ်တဖျၢၣ်န့ၣ် ပှၤလၢအလိၣ်ဘၣ်တဂၤဂၤအဂီၢ်န့ၣ်လီၤ.
ရီဘၢး ဟ့ အကျိၣ်စ့ဒီးအစုလီၢ်ခီၣ်ခိၣ်ဒိၣ်ဒိၣ်အါအါန့ၣ် မ့ၢ်တၢ်လၢအပျဲအီၤလၢကဟ့ၣ်ခီနီၤလီၤတၢ်ဒ်သိးအံၤ, ဒီးတမ့ၢ်မၤဝဲထဲ တၢ်တဘျီဧိၤအဂီၢ်ဘၣ်. တၢ်သးအိၣ်ဟ့ၣ်ညီတၢ်န့ၣ် တမ့ၢ်ဝဲထဲဒၣ် ပှၤအိၣ်ဒီးကျိၣ်စ့အါအါဂီၢ်ဂီၢ်တဖၣ်ကဘၣ်မၤဝဲဒၣ်န့ၣ်ဘၣ်. လၢပျၢၤ, ပှၤစူၢ်က့ၤနာ်က့ၤ ကစၢ်ယ့ၣ်ရှူး လၢမၤက့ၤဒနံ အလီၢ်ကဝီၤတဖၣ် ဟ့ၣ်ခီဟ့ၣ်နီၤလီၤဝဲဒၣ် အတၢ်ထုးတၢ်တီၤတဖၣ်, ဒ်သိးကမၤလၢပှဲၤ ပှၤစူၢ်က့ၤနာ်က့ၤတၢ်တဖၣ်လၢ ဝ့ၢ်ယရူၤရှလ့ၣ် အတၢ်လိၣ်တဖၣ်အဂီၢ်န့ၣ်လီၤ. ၂ ကရံၣ် ၈:၂ န့ၣ် စီၤပီလူး ပာ်ဖျါဝဲဒၣ် ပှၤမၤက့ၤဒနံဖိတဖၣ် အဂ့ၢ်လၢ “အဝဲသ့ၣ်ဘၣ်တၢ်မၤကွၢ်အီၤဖးဒိၣ် လၢတၢ်နးတၢ်ဖှီၣ်အဖၢမုၢ်ဒီး, အတၢ်သးခုဒိၣ်ဝဲ, ဒီးဒ်အတၢ်ဖှီၣ်တၢ်ယာ်ယိာ်ဝဲအသိးန့ၣ်, မၤဘူၣ်တၢ်လၢအအါထူးထူးတီၤတီၤ” န့ၣ်လီၤ. အဆၢဖိ ၃-၄ န့ၣ် အဝဲသ့ၣ်, မ့ၢ်လၢ “အသးအိၣ်ပာ်မၤဝဲဖဲအသ့, အခိၣ်တလိာ်အါန့ၢ် အသ့တၢ်တက့ၢ်လီၤ. ဒီးဃ့ကညးပှၤအါအါကလဲာ်လၢတၢ်ဘျုး, ဒီးတၢ်မၤဃုာ်ဘၣ်ဃးဒီးတၢ်မၤစၢၤ ပှၤစီဆှံတမံၤအံၤ” န့ၣ်လီၤ.
တၢ်ဒိးန့ၢ် ကစၢ်ယွၤအဘျုးအဖှိၣ်အါအါကလဲာ် ခီဖျိလၢကစၢ်ယ့ၣ်ရှူးန့ၣ် ပှၤမ့ၢ်သ့ၣ်ညါပာ်ပနီၣ်ဝဲဒၣ်န့ၣ်ဒီး, အဝဲသ့ၣ် စံးဆၢမၤဆၢ စုလၢအအဲၣ်ဟ့ၣ်ညီတၢ်ဆူ ပှၤလၢအလိၣ်ဘၣ်တၢ်တဖၣ်အအိၣ် သ့ဝဲဒၣ်န့ၣ်လီၤ. ခီဖျိလၢကစၢ်ယွၤ အတၢ်မၤစၢၤ, ဒ်ပှၤတဂၤစံးဝဲဒၣ်လၢ လံာ်မၤတၢ် ၂၀:၃၅ အပူၤ, “ဟ့ၣ်တၢ်န့ၣ်ဘၣ်တၢ်ဆိၣ်ဂ့ၤအါန့ၢ်, ဒိးန့ၢ်တၢ်တက့ၢ်” အသိး, မ်ပကအိၣ်မူပိာ်ထွဲ ဟ့ၣ်မၤစၢၤတၢ်န့ၣ်တက့ၢ်.
