ပိၢ်မုၣ်အံၤ ကွၢ်ဝဲယမဲာ်သၣ်, ဒီးစံးဘၣ်ယၤ, “နတၢ်နးတၢ်ဖှီၣ်န့ၣ် တဘၣ်ဒုးကဲထီၣ်အီၤ တၢ်ကလီကလီတဂ့ၤ” န့ၣ်လီၤ. ယသးအတၢ်ဆိကမိၣ် က့ၤကဒါဝဲဆူ အပူၤကွံာ်န့ၣ်, ဖဲယဘၣ်ဟ့ၣ်တၢ်ကစီၣ်လၢ တၢ်သ့ၣ်နီၣ်ထီၣ်က့ၤအတၢ်ဘူၣ်တၢ်ဘါ, ဘၣ်ထွဲဒီးသိလ့ၣ်နုာ်လီၤဘျၢၣ် ပိၢ်မုၣ်အံၤ အဖိခွါ, ဒီးသံလဲၤပူၤကွံာ်ဟီၣ်ခိၣ်အဂီၢ်န့ၣ်လီၤ.ပိၢ်မုၣ်အံၤ ကတိၤတၢ်မနုၤလဲၣ်န့ၣ် ကသ့ၣ်ညါဝဲဒၣ်န့ၣ်လီၤ. အဝဲသ့ၣ်ညါတ့ၢ်ဝဲ တၢ်နးတၢ်ဖှီၣ်အဂ့ၢ်န့ၣ်လီၤ. ဘၣ်ဆၣ်, ဒ်သိးတၢ်နးတၢ်ဖှီၣ်အံၤ ကကဲထီၣ် တၢ်မၤလၤကပီၤယွၤ, ဒီးကကဲထီၣ် တၢ်မၤစၢၤ ပှၤဂၤအဂီၢ်, ယွၤ စူးကါဝဲတၢ်နးတၢ်ဖှီၣ်န့ၣ်, ပိာ်မုၣ်အံၤ သ့ၣ်ညါဝဲစ့ၢ်ကီးန့ၣ်လီၤ. ဒ်တၢ်လၢ တံၤသကိးပိာ်မုၣ်အံၤ မၤဝဲအဂ့ၤကတၢၢ်အသိးန့ၣ်လီၤ. ဒ်ယဘၣ်ကွၢ်ဆၢၣ်မဲာ် ခဲစဲၣ်တၢ်ဆါ နးနးကျံၤကျံၤအကတီၢ်, ဖဲယနၢ်ဟူ အတၢ်ကတိၤတဖၣ်န့ၣ်ဒီး, ကဲထီၣ်တၢ်မၤမုာ်ထီၣ်က့ၤယၤ, ဒီးတၢ်န့ၢ်ဂံၢ်န့ၢ်ဘါလၢယဂီၢ်န့ၣ်လီၤ. အဝဲဒုးသ့ၣ်နီၣ်က့ၤယၤလၢ ယွၤ နၢ်ဟူ ယတၢ်ကိး ပသူထီၣ်တၢ်ဒီးယတၢ်သူၣ်အုးသးအုး, ဒီးယွၤအိၣ်ဒီးယၤ လၢယတၢ်နးတၢ်ဖှီၣ်အပူၤ, ဒ်သိးကမၤစၢၤပှၤဂၤလၢ ကျိၤကျဲ အသီအဂီၢ်, ယွၤ ကစူးကါယတၢ်နးတၢ်ဖှီၣ်သ့ၣ်သ့ၣ်န့ၣ်လီၤ.

စီၤမိၤရှ့ သ့ၣ်ညါစ့ၢ်ကီးဝဲလၢ ကစၢ်ယွၤ အိၣ်ဆိးဝဲလၢအပှၤဂီၢ်မုၢ်တဖၣ် အတၢ်နးတၢ်ဖှီၣ်အပူၤအဂ့ၢ်န့ၣ် ၂ မိၤ ၃:၇ ပာ်ဖျါဝဲ, “ဒီးယွၤစံးဝဲဒၣ်, ယထံၣ်တ့ၢ် ယပှၤဂီၢ်မုၢ်လၢ အအိၣ်လၢအဲၤကူပတူးအပူၤ အတၢ်နးတၢ်ဖှီၣ်သပှၢ်တၢၢ်, ဒီးယနၢ်ဟူအတၢ်ကိးပသူကိး ပသီ… အဂ့ၢ်ဒ်အံၤ, ယသ့ၣ်ညါအသူၣ်ကိၢ်အသးဂီၤ”န့ၣ်လီၤ. ပှၤအံၣ်စရ့လးဖိတဖၣ်န့ၣ် လီၤဂာ်ဒီးပှၤ, အသးကကလၢၢ်ဘၣ်ဝဲလၢ ဖဲပဘၣ်နးဘၣ်ဖှီၣ်အကတီၢ်, ပတူၢ်ဘၣ်ခီၣ်ဘၣ်ထဲ ပကစၢ်ဒၣ်ဝဲန့ၣ်လီၤ. ဘၣ်ဆၣ်, အဆၢဖိ ၈-၉ ပာ်ဖျါဝဲ, ယွၤ မၤဂၢၢ်မၤကျၢၤအပှၤဂီၢ်မုၢ်လၢ အဝဲအိၣ်ဒီးတၢ်ရဲၣ်တၢ်ကျဲၤလၢ“ကအုၣ်က့ၤခီၣ်က့ၤ အပှၤဂီၢ်မုၢ်တဖၣ်,” မ့ၢ်လၢယွၤ နၢ်ဟူ “တၢ်ကိးပသူကိးပသီ” လၢ အပှၤဂီၢ်မုၢ် အသးကံၢ်ပူၤန့ၣ်လီၤ. ဒ်သိးကမၤအါထီၣ် အပှၤဂီၢ်မုၢ် အတၢ်စူၢ်တၢ်နာ်, ဒ်သိးကမၤနၢၤ အဒုၣ်အဒါ, ဒီးဒ်သိးအပှၤဂီၢ်မုၢ် ကမၤလၤမၤကပီၤအီၤအဂီၢ်, ယွၤကစူးကါဝဲဒၣ် အဝဲသ့ၣ် အတၢ်နးတၢ်ဖှီၣ်သပှၢ်တၢၢ်န့ၣ်လီၤ.

ထါစံးထီၣ်ပတြၢၤ ၉၀ အပူၤ, မ့ၢ်ထါထဲဒၣ်တယုၢ်, လၢအဘၣ်ဃးဒီး စီၤမိၤရှ့ဧိၤ န့ၣ်, အဆၢဖိ ၁၀ ပာ်ဖျါဝဲလၢ “ပနံၣ်တဖၣ် အမုၢ်နံၤန့ၣ်,…. ဟဲစိာ်န့ၢ်ဒၣ်ပှၤ တၢ်ကိၢ်တၢ်ဂီၢ်, ဒီးတၢ်သူၣ်အုးသးအုး” ဒၣ်လဲာ်န့ၣ်, ဖဲအဆၢဖိ ၁၄ န့ၣ် ဘိးဘၣ်သ့ၣ်ညါဝဲလၢ, ယွၤ “မၤပှဲၤပှၤလၢ အတၢ်အဲၣ်ဂၢၢ်ကျၢၤ ကိးမုၢ်ဂီၤဒဲး, လၢပတၢ်အိၣ်မူတစိၤဒၣ်ပှၤ” (ခ့ခါ စှီၤကျိာ်)န့ၣ်လီၤ. လၢအတၢ်အဲၣ်တၢ်ကွံအပူၤန့ၣ် ကစၢ်ယွၤ တဒုးကဲထီၣ် ပတၢ်နးတၢ်ဖှီၣ်လၢ တၢ်ကလီကလီဘၣ်, ပဝဲနၤယၤစ့ၢ်ကီး တကြၢးလၢ ပဒုးကဲထီၣ် ပတၢ်နးတၢ်ဖှီၣ်လၢ တၢ်ကလီကလီဘၣ်န့ၣ်လီၤ.