ထါဖိတယုၢ် စးထီၣ်ဝဲလံာ်ကျိၤလၢ “ပကအဲၣ် တၢ်သံထိးဘၣ်တၢ်တမံၤန့ၣ် မ့ၢ်တၢ်လီၤပျံၤလီၤဖုး” န့ၣ်လီၤ. လၢအပူၤကွံာ်, နံၣ်လၢ အကထိဘျဲၣ်န့ၣ် ထါဖိအံၤ ဘၣ်တၢ်ကွဲးအီၤလၢ ပှၤယူဒၤဖိ ပှၤကွဲးထါ ယူဒၤ ဟၣ်လ့ၤဝံ (Halevi), ဒီးဘၣ်တၢ်ကွဲးကျိာ်ထံအီၤ ဖဲနံၣ်ကယၤ ခံဆံ အကတီၢ်န့ၣ်လီၤ. ပှၤကွဲးထါ ပာ်ဖျါဆှဲဝဲ တၢ်ပျံၤတၢ်ဖုး “တၢ်အဲၣ်ဒီးတၢ်လီၤမၢ်,” အလီၢ်ခံန့ၣ် မ့ၢ်တၢ်မနုၤတမံၤကအိၣ်ဝဲဒၣ်လဲၣ်န့ၣ်လီၤ.
၁ မိၤရှ့ အပူၤန့ၣ် တၢ်သူၣ်အုးသးအုးမၤအသး ဖဲလၢ စီၤအၤဘြၤဟၣ် လီၤမၢ် အမါ နီၣ်စၤရါ, လၢတၢ်သံအဃိန့ၣ်လီၤ. ၁ မိၤ ၂၃:၂ ပာ်ဖျါဝဲ “ဒီးစီၤအၤဘြၤဟၣ် ဟဲဝဲဒ်သိး အကဟီၣ်, ဒီးအမဲာ်ထံကလီၤလၢအဃိ” န့ၣ်လီၤ. လံာ်စီဆှံအဆၢဒိၣ်အံၤ, ပာ်ဖျါဝဲ တၢ်တဲပူ လီၤအဲၣ်လီၤကွံ, ဒီးအလီၤသးအုးတယုၢ်, ဘၣ်ဃးဒီး နီၣ်စၤရါ, လၢလံာ်စီဆှံအပူၤ, ပှၤကညီ တဖၣ်လၢ အဘၣ်တၢ်သ့ၣ်နီၣ်ထီၣ်က့ၤ တဖၣ်အကျါတဂၤအတၢ်သံန့ၣ်လီၤ. နီၣ်စၤရါ မ့ၢ် စီၤအၤဘြၤဟၣ် အမါအတီအလိၤ, ဒီး ၁ မိၤ ၁၈:၁၁-၁၂ ပာ်ဖျါဝဲ ဒ်အမ့ၢ် ပိာ်မုၣ်သးပှၢ်တဂၤ, ဖဲအနၢ်ဟူ ကဘၣ်ကဲထီၣ် မိၢ်တဂၤအဃိ, နံၤဘၣ်ဝဲလၢအသးကံၢ်ပူၤ, ဘၣ်ဆၣ်, ဖဲအဆံးစၢ်ထီၣ် အဖိခွါ စီၤအံၤစဲးအကတီၢ်, ဘၣ်ဟီၣ်ကိးဝဲဒၣ် လၢတၢ်နးတၢ်ဖှီၣ်အပူၤန့ၣ်လီၤ.
ယိၤဟၣ် ၁၁:၃၅ ပာ်ဖျါဝဲ “ဒီးယ့ၣ်ရှူးအမဲာ်ထံလီၤ” န့ၣ် မ့ၢ်တၢ်လၢအပာ်ဖျါထီၣ် ပဝဲ ပှၤဟီၣ်ခိၣ်ဖိတဖၣ် အန့ဆၢၣ်န့ၣ်လီၤ. မ့းရှံအၤ အမဲာ်ထံမဲာ်နိ လၢစီၤလါဇရူး အသွၣ်ခိၣ်န့ၣ် ပညိၣ်ပာ်ဖျါဝဲ ယ့ၣ်ရှူး အတၢ်လီၤမၢ်န့ၣ်လီၤ. ကဘၣ်အဲၣ်တၢ်န့ၣ် မ့ၢ်တၢ်လၢအလီၤပျံၤလီၤဖုး တမံၤနီၢ်နီၢ်န့ၣ်လီၤ. ပှၤကွဲးထါဟၣ်လ့ၤဝံစံးဝဲလၢ“တၢ်အဲၣ်န့ၣ်မ့ၢ်ပှၤဟးဂီၤဖိအဂီၢ်,”ဘၣ်ဆၣ်, ပာ်ဖျါထွဲဝဲ, ဒီးယုၢ်န့ၢ်ဝဲဒၣ်အမံၤလၢ “တၢ်စီဆှံတမံၤ,” ဒီးလီၤဆီဒၣ်တၢ်, ပှၤသ့ၣ်တဖၣ် အတၢ်စူၢ်တၢ်နာ်န့ၣ်, ကလီး ၃:၃ ပာ်ဖျါဝဲ “အိၣ်ခူသူၣ်ဒီးခရံာ်လၢယွၤအပူၤ” န့ၣ်လီၤ.
ပအဲၣ်တၢ်, ဒီးပတၢ်လီၤမၢ်တဖၣ်, စးထီၣ်လၢပမါ, ပဝၤ, ပဖိတဖၣ်, ပမိၢ်ပပၢ်တဖၣ်, ပတံၤသကိးတဖၣ်, တုၤဒၣ်လဲာ် ဆၣ်ဖိကီၢ်ဖိလၢ ပအဲၣ်ဘၣ်တဖၣ်အဃိ, ပဘၣ်ဟီၣ်ဘၣ်ယဲၤ လၢတၢ်သးခုအပူၤတဖၣ်န့ၣ် မ့ၢ်ဒၣ် ပှၤဟီၣ်ခိၣ်ဖိအန့ဆၢၣ်ကဆှီဒီဖိန့ၣ်လီၤ. ဘၣ်ဆၣ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, ပတၢ်ဟီၣ်တၢ်ယဲၤန့ၣ် တယံာ်ဝဲဒၣ်ဘၣ်. မၤအသးဒ်မုၢ်တနၤအတၢ်မံမီၣ်အသိးန့ၣ်လီၤ. စံး ၃၀:၅ အပူၤန့ၣ် စီၤဒၤဝံး ကွဲးပာ်ဖျါဝဲ “မဲာ်ထံမဲာ်နိ ကအိၣ်ကဆိးတနၤ, မ့မ့ၢ်လၢမုၢ်ဆ့ၣ်ထီၣ်န့ၣ် တၢ်သူၣ်ဖှံသးညီအိၣ်ထီၣ်ဝဲ” န့ၣ်လီၤ. ပပၢ် ကစၢ်ယွၤ တစူးကွံာ်ညိကွံာ်ပှၤလၢ တၢ်မုၢ်လၢ်တအိၣ်အပူၤဘၣ်န့ၣ်လီၤ.
