ဖဲလၢ ဒၣ်အဲ ဒၣ်ကိၣ် ခ့ (Dianne Dokko Kim) ဒီးအဝၤ သ့ၣ်ညါဝဲလၢ အဖိခွါမ့ၢ် ပှၤအီၣ်တ့းစၣ် (Autism) ဖိတဂၤန့ၣ်ဒီး, ဒၣ်အဲတဂၤ ဘၣ်ယိၣ်ဘၣ်ဘီတၢ်, ဒီးဘၣ်ဂဲၤလိာ်ဝဲဒၣ်လၢ အဖိခွါဂံၢ်စၢ်ဘါစၢ်တဂၤအံၤ အသးသမူအနံၣ်အလါ ကထီန့ၢ်ဒံးအီၤသ့ၣ်သ့ၣ်န့ၣ်လီၤ. ဒၣ်အဲ ကိးထီၣ်ကစၢ်ယွၤ, ဒီးစံးဝဲဒၣ် “တၢ်ကကွၢ်ထွဲ ကဟုကယာ်အီၤအဂီၢ်, ယမ့ၢ်တအိၣ်ဘၣ်န့ၣ် ယဖိခွါတဂၤကအိၣ်မူအိၣ်ဂဲၤဝဲဒၣ်ဒ်လဲၣ်” န့ၣ်လီၤ. ကစၢ်ယွၤ မၤစၢၤအီၤ ခီဖျိလၢကတဲာ်ကတီၤန့ၢ် တၢ်ရဲၣ်တၢ်ကျဲၤလၢအမ့ၢ်, မိၢ်ပၢ်အဂုၤအဂၤတဖၣ်လၢ အဘၣ်ကွၢ်ထွဲ လုၢ်ဒိၣ်ထီၣ် ဖိဂံၢ်စၢ်ဘါစၢ်တဖၣ်န့ၣ်လီၤ. ဒၣ်အဲ အသးပူၤန့ၣ် တူၢ်ဘၣ် ခီၣ်ဘၣ် ဒ်အမၤကမၣ်တၢ်, အတၢ်လီၤတူၢ်လီၤကာ်, ဒီးအတၢ်ပျံၤတၢ်ဖုးတဖၣ်အပူၤန့ၣ် ဒ်သိး ဒၣ်အဲ ကနာ်သန့ၤအီၤအဂီၢ်, ကစၢ်ယွၤ ဟ့ၣ်ဂံၢ်ဟ့ၣ်ဘါအီၤန့ၣ်လီၤ. အကတၢၢ်န့ၣ်, လၢအလံာ် “တၢ်စူၢ်တၢ်နာ်လၢ အတဟးဂီၤ” (Unbroken Faith) အပူၤန့ၣ် “တၢ်မၤဂ့ၤ ထီၣ်က့ၤ နီၢ်သး” လၢပှၤဘၣ်ကွၢ်ထွဲလုၢ်ဒိၣ်ထီၣ် ဖိဂံၢ်စၢ်ဘါစၢ်တဖၣ်အဂီၢ်, ဒၣ်အဲဟ့ၣ်ထီၣ်ဝဲ တၢ်မုၢ်လၢ်န့ၣ်လီၤ. တုၤလၢအဖိခွါ ဒိၣ်တုာ်ခိၣ်ပှဲၤဝဲဒၣ်န့ၣ် ဒၣ်အဲ အတၢ်စူၢ် တၢ်နာ်န့ၣ် အိၣ်ဂၢၢ်ဆိးကျၢၤဒံးဝဲ အဖၢမုၢ်န့ၣ်လီၤ. ဒၣ်အဲ နာ်ဝဲဒၣ်လၢ ယွၤကကွၢ်ထွဲကဟုကယာ်အီၤ,ဃုာ်ဒီးအဖိခွါထီဘိန့ၣ်လီၤ.

ပကကွၢ်ထီၣ်ဆူ ကစၢ်ယွၤအအိၣ်အဂီၢ်, လၢပတၢ်အိၣ်မူအပူၤ, တၢ်တလီၤတံၢ်တလီၤဆဲးတဖၣ်န့ၣ် မၤကိၢ်မၤဂီၤ ပသူၣ်ပသးသ့ဝဲဒၣ် န့ၣ်လီၤ. ဒ်သိးပကပာ် ပတၢ်စူၢ်တၢ်နာ် လၢတၢ်တမံၤမံၤ, မ့တမ့ၢ် ပှၤတဂၤဂၤအလိၤ, ဃုာ်ဒီးပနီၢ်ကစၢ်ဒၣ်ဝဲအလိၤအဂီၢ်န့ၣ် တၢ်လ့ပစီ ကလီၤဘၣ်ပှၤသ့ၣ်သ့ၣ်န့ၣ်လီၤ. ဘၣ်ဆၣ်, ဒ် စံး ၉၅:၁ ပာ်ဖျါဝဲအသိး,ပသန့ၤလီၤပသးသ့ဝဲဒၣ်လၢ “ပတၢ်အုၣ်က့ၤခီၣ်က့ၤအလၢၢ်” အလိၤန့ၣ်လီၤ. လံာ်စီဆှံတတီၤအံၤ ပာ်ဖျါထီၣ် ကစၢ်ယွၤ အက့ၢ်ဂီၤသူးသ့ၣ်နီၢ်နီၢ်န့ၣ်လီၤ. အဆၢဖိ ၄-၅ ပာ်ဖျါဝဲ “ဟီၣ်ခိၣ်အတၢ်ယိာ်ပူၤ အိၣ်လၢအစုပူၤ, ဒီးကစၢၢ်ကလိအလီၢ်ထီၣ်ထီတဖၣ်န့ၣ် မ့ၢ်အတၢ်လီၤ. ပီၣ်လဲၣ်န့ၣ်မ့ၢ်အတၢ်, ဒီးတ့လီၤဝဲ, ဒီးခိန့ၣ်မၤဝဲလၢအစု” န့ၣ်လီၤ. တၢ်စူၢ်တၢ်နာ်လၢ အတဟးဂီၤအပူၤန့ၣ် ပအိၣ်မူအိၣ်ဂဲၤသ့ဝဲဒၣ် ခီဖျိလၢတၢ်ဘူၣ်ထီၣ်ဘါထီၣ် ကစၢ်ယွၤ “လၢအတ့လီၤပှၤ” န့ၣ်လီၤ. အဆၢဖိ ၇ ပာ်ဖျါဝဲလၢ “ပမ့ၢ်အတၢ်အီၣ်ဆၣ်အလီၢ်အပှၤဂီၢ်မုၢ်, အစုအသိတဖု” အဃိ, ဒ်သိးကအိၣ်ဒီးပှၤ,ဃုာ်ဒီးပှၤလၢပအဲၣ်ဘၣ်တဖၣ်အဂီၢ်, ပနာ်သန့ၤယွၤသ့ဝဲဒၣ်န့ၣ်လီၤ.