ဖၠၣ်စိမိၤသရၣ်မုၣ်ဖးဒိၣ် မိၣ်နံၤကၤ ဝၢးဝၤ (Monica Wadhwa)တဂၤ ပာ်ဖျါထီၣ်ဝဲအတၢ်ထံၣ် လၢ “နီၢ်နီၢ်န့ၣ်, တၢ်တမၤန့ၢ်တၢ်မၤနၢၤန့ၣ် အစိကမီၤဒိၣ်န့ၢ်ဒံး တၢ်မၤနၢၤတၢ်”န့ၣ်လီၤ. အတၢ်ဃုသ့ၣ်ညါမၤကွၢ်တၢ်န့ၣ် ပာ်ဖျါထီၣ်ဝဲဒၣ်လၢ, “ပှၤကညီတဖၣ်အတၢ်သူၣ်ဆူၣ်သးဆူၣ် ပှဲၤဂံၢ်ပှဲၤဘါ, ဒီးတၢ်သဆၣ်ထီၣ်သးအသဟီၣ်အဒိၣ်ကတၢၢ်အကတီၢ်န့ၣ် တမ့ၢ်လၢအဝဲသ့ၣ်မၤနၢၤတၢ်အကတီၢ်ဘၣ်.

“မ့မ့ၢ်တၢ်အကတီၢ်ဘူးထီၣ်လၢအဝဲသ့ၣ်ကမၤနၢၤတၢ်အကတီၢ်န့ၣ်လီၤ.”ပှၤတဂၤဂၤ တမၤနၢၤတၢ်အဃိ, အတၢ်ပညိၣ်မ့ၢ်တကဲထီၣ် လိၣ်ထီၣ်ဘၣ်ဖုးတမံၤန့ၣ် ဟ့ၣ်သဆၣ် ထီၣ်အီၤလၢ ခါဆူညါကအိၣ်မူအိၣ်ဂဲၤ, ဂုာ်ကျဲးစၢၤအါထီၣ်တၢ်အဂီၢ်န့ၣ်လီၤ. တၢ်အဂၤ တကပၤန့ၣ်, တၢ်မၤနၢၤတၢ် အဘီၣ်အညီတဖၣ်, ညီနုာ်လၢအမၤဆံးလီၤစှၤလီၤ နီၢ်ခိ ဂံၢ်ဘါ, ဒီးတၢ်သးအိၣ်မၤတၢ်အသဟီၣ်န့ၣ်လီၤ.

ဝၢးဝၤ အတၢ်ထံၣ်တမံၤအံၤ ဟ့ၣ်ထီၣ်တၢ်ထံၣ်ဆိကမိၣ်အသီ, လၢစီၤပီလူး ဟ့ၣ်ဒိ ပာ်ဖျါထီၣ်ဝဲလၢ လံာ်စီဆှံခံတီၤ(၁ ကရံၣ် ၉:၂၄-၂၇, ဒီး ဖံ ၃:၁၂-၁၄)အပူၤ, ထိၣ်သတြီၤဝဲ တၢ်လူၤပိာ်ခရံာ်အခံဒီးတၢ်ဃ့ၢ်သတြီၤတၢ်အဂ့ၢ်န့ၣ်လီၤ. တၢ်ဟ့ၣ်ဒိခံမံၤလိာ်န့ၣ် စီၤပီလူး ပာ်ဖျါမၤလီၤတံၢ်ဝဲလၢ တၢ်လူၤပိာ်ခရံာ်အခံ, ဒီးလၢတၢ်သးခုကစီၣ်အဂီၢ်န့ၣ် ဖံ ၃:၁၃ ပာ်ဖျါဝဲ လၢ ပှၤစူၢ်က့ၤနာ်က့ၤတၢ်ဖိတဖၣ် ကဘၣ်ဂုာ်ကျဲးစၢၤ “ယူာ်ဃီၤအသးဆူတၢ်အိၣ်လၢအမဲာ်ညါ,” ဒီးဒ် ၁ ကရံၣ် စံးဘၣ်ပှၤ “ဒ်သိးသုကန့ၢ်တၢ်ဒီး, ဃ့ၢ်ဒ်န့ၣ်သိးတက့ၢ်” န့ၣ်လီၤ.

“တၢ်စံၣ်တဲၤတဲလီၤတၢ်သးခုကစီၣ်တီတီလိၤလိၤ,” (၁ ကရံၣ် ၉:၂၃) ဒီး“တၢ်သ့ၣ်ညါ ကစၢ်ယ့ၣ်ရှူးခရံာ် (ဖံလံး ၃:၈)” တၢ်ဂ့ၢ်ခံထံၣ်န့ၣ် ပကဘၣ် ဂုာ်ကျဲးစၢၤမၤသပှၢ်တၢၢ်, ဒီးတၢ်ဂ့ၢ်ခံထံၣ်အံၤ မ့ၢ်ဝဲတၢ်အမ့ၢ်အတီနီၢ်နီၢ်လၢ, ပကစံးအီၤလၢ ပမၤလၢပှဲၤတ့ၢ်လံအဂီၢ်န့ၣ် တသ့ဝဲနီတဘျီဘၣ်န့ၣ်လီၤ. ထီဘိန့ၣ်, ပကအိၣ်ဒီးတၢ်လီၤတူၢ်လီၤကာ်န့ၣ်လီၤ. ဒ်အဆၢဖိ ၁၂ ပာ်ဖျါဝဲ “ယန့ၢ်ဘၣ်လံ” အသိး,ပစံးအီၤတသ့နီတဘျီဘၣ်န့ၣ်လီၤ.

ဘၣ်ဆၣ်, တၢ်ဂ့ၢ်ကီတအိၣ်ဘၣ်. တၢ်လၢအကါဒိၣ်ဝဲဒၣ်လၢပဂီၢ်န့ၣ် မ့ၢ်လၢပသး ကလၢၢ်ဘၣ်ဝဲဒၣ်လၢ ပဘၣ်တၢ်ထုးဘူးပှၤဆူ ကစၢ်ခရံာ်အအိၣ်န့ၣ်လီၤ. ဒ်သိးပကလူလီၤဂၢ်လီၤပသး လၢတၢ်လူၤပိာ်ထွဲအခံလၢာ်သူၣ်လၢာ်သးအဂီၢ်န့ၣ်, မ့ၢ်ဒၣ်ထဲ ကစၢ်ခရံာ် အဂံၢ်အဘါ လၢအဟ့ၣ်စိဟ့ၣ်ကမီၤပှၤ, ဒီးဟ့ၣ်သဆၣ်ထီၣ်ပှၤန့ၣ်လီၤ. အဝဲမ့ၢ်ပှၤတဂၤလၢ ကစိာ်ဆှၢပှၤဆူ တၢ်မၤနၢၤန့ၣ်လီၤ.