ဘရိၣ်နံၣ် ဝဲ (Bronnie Ware) လၢအမ့ၢ် ပှၤအံးထွဲကွၢ်ထွဲပှၤဆါလၢအကသံဘူးတ့ၢ်လံတဖၣ်တဂၤန့ၣ် ဃုထံၣ်န့ၢ်ဝဲဒၣ်, လၢပတၢ်အိၣ်မူအပူၤ, ပတပာ်ဖျါထီၣ်တၢ်ဂ့ၢ် ဘၣ်ဃးဒီး ပမၤလၢာ်တၢ်ဆၢကတီၢ်လၢ တၢ်လူၤဃုမၤန့ၢ်တၢ်တဖၣ်အဂ့ၢ်န့ၣ်လီၤ. ဘရိၣ်နံၣ် သံကွၢ် ပှၤဆါတဖၣ် လၢတၢ်ပညိၣ်အပူၤ, “နမ့ၢ်ဒိးန့ၢ်ခွဲးယာ် လၢခံတဘျီန့ၣ်ဒီး, တၢ်တမံၤမံၤလၢ နမၤဝံၤတ့ၢ်လံတဖၣ်န့ၣ် မ့ၢ်နကမၤက့ၤအီၤ လီၤဆီန့ၢ်ဒံးအပူၤကွံာ်ဧါ”န့ၣ်လီၤ. ပှၤဆါလၢအကသံဘူးတ့ၢ်လံတဖၣ် အတၢ်စံးဆၢလၢ အလီၤဂာ်လိာ်သးတဖၣ်အကျါ, ဘရိၣ်နံၣ်ကွဲးနီၣ်ရဲၣ်လီၤ တၢ်ဂ့ၢ်လၢအဝဲသ့ၣ် ပီၢ်ယၢ်လီၤက့ၤအသးအအါအတၢၢ်, ယဲၢ်ထံၣ်န့ၢ်လီၤ. (၁) ယဆၢယဲဒၣ် ယကအိၣ်ဒီးတၢ်သးဒူလၢ ယကအိၣ်မူပာ်ဖျါထီၣ် ယတၢ်မ့ၢ်တၢ်နီၢ်နီၢ်တဂၤ, (၂) ယဆၢယဲဒၣ်လၢ ယတဂုာ်ဖံးတၢ်မၤတၢ်ဆူၣ်ဆူၣ်လၢၤဘၣ်. (၃) ယဆၢယဲဒၣ်ယကအိၣ်ဒီးတၢ်သးဒူလၢ ယကပာ်ဖျါထီၣ် ယသးတူၢ်ဘၣ်ခီၣ်ဘၣ်တၢ်တဖၣ်ဖျိဖျိဖျါဖျါ. (၄) ယဆၢယဲလၢ ထီဘိန့ၣ် ယကရ့လိာ်ဘၣ်ထွဲလိာ်သးဒီးယတံၤသကိးတဖၣ်, ဒီး (၅) ယဆၢယဲဒၣ်လၢ ယကအိၣ်မူမၤအါထီၣ်တၢ်သူၣ်ဖှံသးညီ လၢယတၢ်အိၣ်မူအပူၤန့ၣ်လီၤ.
ဘရိၣ်နံၣ် ဝဲ အတၢ်ကွဲးနီၣ်ရဲၣ်လီၤတၢ်တမံၤအံၤ ဒုးသ့ၣ်နီၣ်က့ၤပှၤ ကစၢ်ယ့ၣ်ရှူး အတၢ်ကတိၤဟ့ၣ်ဒိ ဖျါဖဲ လံာ်လူၤကၣ် အဆၢဒိၣ် ၁၂ န့ၣ်လီၤ. လူၤ ၁၂:၁၈-၁၉ ပာ်ဖျါဝဲဒၣ် ပှၤထူးပှၤတီၤတဂၤ စံးလီၤအသးလၢ, ကအိၣ်ဘှံးလၢအတၢ်ဖံးတၢ်မၤ, ကအီၣ်အီ, ဒီးကမုာ်လၤသးခုဝဲအတၢ်အိၣ်မူ တုၤအသံတစုအဂီၢ်န့ၣ်, ပာ်လီၤအသးလၢကတ့ထီၣ် ဘုဖီဖးဒိၣ်တဖၣ် ဒ်သိးကပာ်ဖှိၣ် အတၤသူတၤသၣ်တဖၣ်န့ၣ်လီၤ. ဘၣ်ဆၣ်, ဖဲအကတီၢ်ဖိအံၤန့ၣ်, အဆၢဖိ ၂၀ ပာ်ဖျါဝဲလၢ ယွၤ ဃ့က့ၤ အသးသမူ, ဒီးကိးအီၤလၢ တၢ်ကတိၤအဆူၣ်အကိၤ “ပှၤဟးဂီၤဖိ,” ဒီးတၢ်သံကွၢ်လၢအလီၤပျံၤတထံၣ်ပိာ်ထွဲထီၣ်အခံ, “တၢ်ဖိတၢ်လံၤလၢ နကတီၤပာ်န့ၣ်, ကကဲလၢမတၤတဂၤအတၢ်လဲၣ်” န့ၣ်လီၤ.
ပတၢ်သံတၢ်ပှၢ်လၢအတအိၣ်ဒီးတၢ်ပီၢ်ယၢ်လီၤက့ၤသးန့ၣ် ကဲထီၣ်ဝဲကသ့ဧါ. ပကသ့ၣ်ညါအီၤလီၤတံၢ်လီၤဆဲးအဂီၢ် ကီခဲဝဲဒၣ်န့ၣ်လီၤ. ဘၣ်ဆၣ်, တၢ်လၢပဂ့ၤ သ့ၣ်ညါဝဲဒၣ်န့ၣ်, လံာ်စီဆှံ ပာ်ဖျါဝဲ ဆှဲဆှဲဖိ, တၢ်ပာ်ဖှိၣ်ပာ် ပစုလီၢ်ခီၣ်ခိၣ်တဖၣ်လၢပကစၢ်ဒၣ်ဝဲအဂီၢ်န့ၣ် မ့ၢ်တၢ်အကတၢၢ်, တၢ်ပူၤဖျဲးကျဲတအိၣ်ဘၣ်. ဒီးတၢ်ထူးတၢ်တီၤနီၢ်နီၢ် အိၣ်ဟဲခီဖျိလၢ တၢ်အိၣ်မူဘျူးလီၤအသးလၢ ကစၢ်ယွၤန့ၣ်လီၤ.
