ဖဲလၢနံၣ်ကယၤ တဆံခွံ အကတီၢ်ဆိတဖၣ်န့ၣ်, တၢ်သိၣ်တၢ်ဘျၢတဖၣ် တြီဃာ်ဝဲ ပှၤသူဖံးဖိ, ဒီးပှၤဟဲနုာ်လီၤအိၣ်ဆိးလၢ ကီၢ်အမဲရကၤ တဖၣ် လၢတၢ်ဒိးလဲ, မ့တမ့ၢ် ကပှ့ၤဟီၣ်ခိၣ်, ဒီးဟံၣ်ဃီတဖၣ်လၢ ခိၣ်ရိၣ်နၢ်ဒိၣ် အဝ့ၢ်, လၢ ခဲလံၣ်ဖိနံယၤ ကီၢ်စဲၣ် န့ၣ်လီၤ. တချုးလၢတၢ်ပာ်ဂၢၢ်ပာ်ကျၢၤ တၢ်သိၣ်တၢ်သီလၢ အဆီၣ်သနံးတၢ်တဖၣ် အကတီၢ်န့ၣ်, ပှၤသူဖံးဖိ ကၢး သီၣ်မစၢၣ် (Gus Thompson) လၢအမ့ၢ်ပှၤ(အိၣ်ဖျဲၣ်ဝဲ ဒ်ကုၢ်တဂၤအသိးန့ၣ်) ပှ့ၤဝဲဟီၣ်ခိၣ်, ဒီးတ့ထီၣ်ဝဲဒၣ် ဟံၣ်ဃီလၢ အတူၢ်လိာ် ပှၤကဒိးလဲအိၣ်ဆိးတၢ်တဖၣ်အဂီၢ်လၢ ခိၣ်ရိၣ်နၢ်ဒိၣ် အဝ့ၢ်န့ၣ်လီၤ. ဖဲ ၁၉၃၉ နံၣ်န့ၣ်, ကၢး ဟ့ၣ်ဒိးလဲလီၤအဟံၣ်ဆူ ပှၤအ့ရှၤဖိ အဟံၣ်ဖိဃီဖိတဒူၣ်, အကတၢၢ်န့ၣ်, ဆါလီၤကွံာ်ဝဲဒၣ် အဟီၣ်ခိၣ်ဆူ ပှၤတဖၣ်အအိၣ်န့ၣ်လီၤ. ဃိးဆံယဲၢ်နံၣ်ဃၣ်ဃၣ် လဲၤပူၤကွံာ်ဝံၤန့ၣ်ဒီး, ဒ်သိးကမၤစၢၤ ပှၤသူဖံး ဖၠၣ်စိမိၤ ကၠိဖိတဖၣ်အဂီၢ်, ပှၤအ့ရှၤဖိ အဒူၣ်ဖိထၢဖိအကျါဟံၣ်ဖိဃီဖိတနီၤ ဟ့ၣ်မၤဘူၣ်ဝဲဒၣ် ကျိၣ်စ့တနီၤ, ဒိးန့ၢ်ဝဲ ခီဖျိလၢတၢ်ဆါလီၤဟီၣ်ခိၣ်လီၢ်အံၤန့ၣ်လီၤ. အဝဲသ့ၣ် ကျဲးစၢၤဝဲဒၣ် ဒ်သိးတၢ်ကယုၢ်န့ၢ် စၣ်ဒံၣ်ယ့ကိၣ် (San Diego) ကီၢ်စဲၣ် အဖၠၣ်စိမိၤ အတၢ်သူၣ်ထီၣ်တဖျၢၣ်လၢ ကၢး ဒီးအမါ အဲမၣ် (Emma) အမံၤန့ၣ်လီၤ.
လံာ် ၃ မိၤရှ့ စ့ၢ်ကီး ပာ်ဖျါဝဲဒၣ် တၢ်မၤဂ့ၤပှၤဂၤအခီပညီန့ၣ် မ့ၢ်မနုၤလဲၣ်န့ၣ်လီၤ. ၂ မိၤ ၂၅:၃၅ န့ၣ် ယွၤ မၤလိာ်ဝဲ အပှၤဂီၢ်မုၢ်လၢ “ဒီးပှၤအံၣ်စရ့လးဖိကဒဲကဒဲ လၢအအိၣ်ဘူးဒီးသုတဂၤဂၤ မ့ၢ်ဖှီၣ်လီၤယာ်လီၤဒီးမၤစၢၤလီၤက့ၤအသးတသ့ဘၣ်န့ၣ်, သုကဘၣ်လုၢ်အီၣ်အီၤ, ဒ်သုလုၢ်အီၣ်ပှၤတခီဘီမုၢ်ဖိတဂၤအသိး, ဒ်သိးအကအိၣ်မူဒီးသု ကသ့အဂီၢ်န့ၣ်လီၤ.” လီၤဆီဒၣ်တၢ်ပှၤလၢအလိၣ်ဘၣ်တၢ်တဖၣ်အဂီၢ်, ကစၢ်ယွၤ နဲၣ်လိ ပှၤဂီၢ်မုၢ် ဒ်သိးကမၤဂ့ၤမၤစၢၤလိာ်သးကဒဲကဒဲ, ဒီးတီတီလိၤလိၤန့ၣ်လီၤ. အဆၢဖိ ၃၆ ပာ်ဖျါဝဲလၢ “တၢ်ပျံၤ” ယွၤအလီၢ်န့ၣ်, အဝဲသ့ၣ် ကဘၣ်မၤဂ့ၤမၤစၢၤ ပှၤလၢအလီၤဃံၤဝဲလၢ တၢ်အကတီၢ်ကီခဲအပူၤ, ဒီးမၤစၢၤလီၤက့ၤအသးတသ့ဘၣ်တဖၣ်အဂီၢ်န့ၣ်လီၤ. အဆၢဖိ ၃၅ ပာ်ဖျါဝဲ ပှၤအံၤစရ့လးဖိတဖၣ်ကဘၣ်အံးထွဲကွၢ်ထွဲ ပှၤဖှီၣ်ဖိယာ်ဖိတဖၣ် ဒ်အံးထွဲကွၢ်ထွဲ “ပှၤတခီဘီမုၢ်ဖိ, ဒီးပှၤတမှံၤတဖၣ်” လၢတၢ်တူၢ်လိာ်မုာ်, ဒီးလၢတၢ်အဲၣ်တၢ်ကွံအပူၤန့ၣ်လီၤ.
မ့ၢ်လၢ ကၢး သီၣ်မစၢၣ်ဒီးအမါ မၤစၢၤတ့ၢ် ဟံၣ်ဖိဃီဖိတဒူၣ်လၢ အလီဆီဒီး အဝဲသ့ၣ်အဃိ, တၢ်လၢအမၤန့ၢ်က့ၤဝဲမ့ၢ်, ဟံၣ်ဖိဃီဖိတဒူၣ်အံၤ ကဲထီၣ်ကဒါက့ၤ တၢ်ဆိၣ်ဂ့ၤလၢ ပှၤဂုၤပှၤဂၤတဖၣ်အဂီၢ်န့ၣ်လီၤ. ပကလီၣ်ဖျါထီၣ် ယွၤအတၢ်အဲၣ်ဆူ ပှၤလၢအလိၣ်ဘၣ်တဖၣ်အဂီၢ် မ့ၢ်လၢကစၢ်ယွၤမၤစၢၤပှၤအဃိ, မ်ပကမၤလဲၢ်ထီၣ်ယွၤအတၢ်သးကညီၤဆူ ပှၤအလိၣ်ဘၣ်တဖၣ်အအိၣ်န့ၣ်တက့ၢ်.
