ဖိသၢဂၤအမိၢ်, ဒိၣ်နၣ် (Donna) စံးဝဲဒၣ်, “မ့ၢ်လၢမိၢ်အမုၢ်နံၤန့ၣ် ဒုးသ့ၣ်နီၣ်ထီၣ်က့ၤယၤ တၢ်တလၢတလီၣ်တဖၣ်, ဒီးတၢ်မၤတကဲထီၣ်လိၣ်ထီၣ်တဖၣ် လၢယတူၢ်ဘၣ်တ့ၢ်လံ, ဒ်မိၢ်တဂၤ တူၢ်ဘၣ်ဝဲအသိးအဃိ, မိၢ်အမုၢ်နံၤန့ၣ် တဘၣ်ယသး နီတစဲးဘၣ်” န့ၣ်လီၤ. ဒိၣ်နၣ် စးထီၣ်ဝဲ မိၢ်ပၢ်အတၢ်ဖံးတၢ်မၤန့ၣ် အိၣ်ဒီးတၢ်မုၢ်လၢ်လၢအထီတဖၣ်န့ၣ်လီၤ. ဘၣ်ဆၣ်, တၢ်မၤအသးနီၢ်နီၢ်န့ၣ် တထီၣ်ဘးဝဲဒၣ် ဒ်အမုၢ်လၢ်တ့ၢ်ဝဲအသိးဘၣ်. အဝဲပာ်ဖျါဝဲဒၣ် “လၢယဂီၢ်, တၢ်မၤလၢ ယမၤတ့ၢ်တဖၣ်ခဲလၢာ်အကျါ, မိၢ်အတၢ်မၤန့ၣ် မ့ၢ်တၢ်မၤအကီအခဲကတၢၢ်, ဒီးယဖိအကျါတဂၤန့ၣ် မၤတံာ်တာ်ယသးဒိၣ်ဒိၣ်အါအါ” န့ၣ်လီၤ.
ဖဲကစၢ်ယွၤ ဃုထၢ နီၢ်လ့ၤအၤ ဒ်ပှၤအံၣ်စရ့လးဖိတဖၣ် အမိၢ်အခိၣ်အနၢ်အကတီၢ်, အဖိတဂၤဘၣ်တဂၤအဂီၢ်, နီၢ်လ့ၤအၤ ကအိၣ်ဒီး တၢ်မုၢ်လၢ် အဒိၣ်အထီတဖၣ်လီၤန့ၣ် ပကသမၢအီၤအဂီၢ် အလီၢ်တအိၣ်ဘၣ်. ၁ မိၤ ၂၉:၃၂-၃၅ ပာ်ဖျါဝဲလၢ အဝဲဃုၢ်န့ၢ် အဖိအခီၣ်ထံး လွံၢ်ဂၤတဖၣ်အမံၤန့ၣ် လီၤပလိာ်အသးဒီးအတၢ်ဘၣ်ကွၢ်ဆၢၣ်မဲာ်အကီအခဲ တဖၣ်န့ၣ်လီၤ. ဘၣ်ဆၣ်, လံာ်စီဆှံ အတၢ်ပာ်ဖျါ တၢ်ဂ့ၢ်တဃံတလၤတဖၣ်အပူၤန့ၣ်, အဖိတဖၣ် ဖျါဝဲဒၣ်လၢ ပှၤအၢပှၤသီတဖၣ်အလီၢ်န့ၣ်လီၤ. ၁ မိၤ ၃၄:၂၄-၃၀ န့ၣ် အဖိတနီၤမၤကမၣ်တၢ် ဒ်ပှၤမၤသံတၢ်တဖၣ်, ဒီးအဖိတနီၤန့ၣ် ၁ မိၤ ၃၇:၁၇-၂၈ ပာ်ဖျါဝဲ ဒ်အမ့ၢ် ပှၤကူၣ်ကၤကုၢ်တဖၣ်န့ၣ်လီၤ. အဆၢဒိၣ် ၃၈, လံာ်စီဆှံ အတၢ်ကွဲးလၢ အတဖျါဃံဖျါလၤအပူၤန့ၣ် ပာ်ဖျါဝဲဒၣ် နီၢ်လ့ၤအၤ အဖိခွါ စီၤယူၤဒၤ ဒ်ပှၤဟးဂီၤဖိတဂၤအသိးန့ၣ်လီၤ.
တၢ်ကဒုးအိၣ်ထီၣ် မ့းရှံအၤ, ကဟဲခီဖျိလၢ နီၢ်လ့ၤအၤ အစၢၤအသွဲၣ်ဃုာ်ဒီးစီၤယူၤဒၤဒၣ်လဲာ်န့ၣ် မ့ၢ်မတၤတဂၤ ကလီၤဂာ်ဒီးကစၢ်ယွၤတဂၤ ကအိၣ်ဝဲဒၣ်လဲၣ်. ကစၢ်ယွၤ တ့ဒုးအိၣ်ထီၣ် တၢ်အုၣ်က့ၤခီၣ်က့ၤ အတၢ်ရဲၣ်တၢ်ကျဲၤ, လၢတၢ်မၤအသးအကီအခဲကတၢၢ်အပူၤ, ဒီးခီဖျိပှၤကညီလၢ ပှၤတမုၢ်လၢ်, ဆိကမိၣ်အအါကတၢၢ်တဖၣ်အအိၣ်န့ၣ်လီၤ.
တၢ်ဂ့ၢ်အံၤစ့ၢ်ကီး ဒိၣ်နၣ် မၤလိန့ၢ်ဘၣ်ဝဲဒၣ်န့ၣ်လီၤ. ဒ်အဘၣ်ကွၢ်ဆၢၣ်မဲာ်တ့ၢ်ဝဲ တၢ်ကဲမိၢ်ပၢ်အတၢ်ဖံးတၢ်မၤ အတၢ်တၤတဖၣ်, ဒီးတဃုထံၣ်န့ၢ်ဝဲ တၢ်စံးဆၢနီတမံၤဘၣ်. ဃုထံၣ်န့ၢ်ဝဲဒၣ်ထဲ “ကဘၣ်လဲၤဆူညါ, ဒီးဃ့ထုကဖၣ်တပယူၢ်ဃီ” န့ၣ်လီၤ. ဒီးဖိလၢ အမၤတံာ်တာ်အမိၢ်အသး ဒိၣ်ဒိၣ်အါအါတဂၤ, ခဲကနံၣ်အံၤ, ဒိၣ်တုာ်ခိၣ်ပှဲၤ, ဒီးအဲၣ်ဝဲဒၣ်, ယူးယီၣ်ပးကဲ ဝဲဒၣ်အမိၢ်န့ၣ်လီၤ. လၢတၢ်ကွၢ်ဆိကမိၣ်ကဒါက့ၤအပူၤန့ၣ် ဒိၣ်နၣ် တဲဝဲဒၣ် “ဘၣ်သ့ၣ်သ့ၣ်, တၢ်ဆှၢလီၤဖိတဂၤအံၤဆူယအိၣ်, ဒ်သိးယွၤကသိၣ်လိန့ၢ်ယၤ တၢ်တမံၤမံၤဘၣ်ဃးဒီးယနီၢ်ကစၢ်ဒၣ်ယဲ, ဒီးတၢ်တမံၤမံၤဘၣ်ဃးဒီးယကစၢ်ယွၤန့ၣ်လီၤ.
