ဖဲ ၂၀၂၄ နံၣ်, လၢကီၢ်နီၣ်ဝ့ ဒူသဝီတဖျၢၣ်န့ၣ် ပှၤသဝီဖိတဖၣ် ဆီထီၣ်တၢ်ဒုးနဲၣ်သိလ့ၣ် အတၢ်ပနီၣ်တမံၤ လၢအဟ့ၣ်ဂံၢ်ဟ့ၣ်ဘါ ပှၤခီဂာ်သိလ့ၣ်အကျဲတဖၣ် ဒ်သိးကခီဂာ်ဝဲဒၣ်ကျဲ လၢတၢ်မၤနံၤမၤအ့အပူၤန့ၣ်လီၤ. တၢ်ကွၢ်စိမ့ၢ်ဝဲဒၣ်လၢ တၢ်ကဒုးအိၣ်ထီၣ် တၢ်နံၤတၢ်အ့အပတီၢ်ဖိတဖၣ် လၢ ပှၤခီဂာ်ကျဲလၢ ပှၤမၤနံၤမၤအ့တၢ်တဖၣ်, ဒီးပှၤလၢအထံၣ်ဘၣ်အဝဲသ့ၣ်တဖၣ်အဂီၢ်, ဒ်သိးကမၤသူၣ်ဖှံ သးညီထီၣ် မုၢ်နံၤတဖၣ် လၢပှၤတဂၤဘၣ်တဂၤအဂီၢ် န့ၣ်လီၤ. တဖျးမဲာ်အတီၢ်ပူၤ, တၢ်လီၤနံၤလီၤအ့တဖၣ်န့ၣ် ကဲထီၣ်တၢ်ဟ့ၣ်ဂံၢ်ဟ့ၣ်ဘါ ဖုၣ်ကိာ်ဖိလၢ ပှၤသူၣ်အုးသးအုးတဖၣ်အဂီၢ်န့ၣ်လီၤ.

လံာ်စီဆှံပာ်ဖျါထီၣ်ဝဲလၢ ပအိၣ်ဒီးတၢ်ကီတၢ်ခဲ, ဒီးတၢ်နးတၢ်ဖှီၣ်အဆူၣ်အကိၤ အကတီၢ်တဖၣ်, လၢအဒုးကဲထီၣ် တၢ်သးဟးဂီၤ, ဒီးတၢ်သူၣ်အုးသးအုးလၢပဂီၢ်န့ၣ်လီၤ. လံာ်သးသယုၢ်တၢ်, ဒီးထါစံးထီၣ်ပတြၢၤအါယုၢ်တဖၣ် ပာ်ဖျါထီၣ်ဝဲဒၣ် တၢ်ဘၣ်ဒိဆါ ဒ်သိးအံၤတဖၣ်န့ၣ်လီၤ. ဘၣ်ဆၣ်, လၢတၢ်အိၣ်အသးကိးမံၤဒဲးအပူၤန့ၣ်, တၢ်လၢအဟဲစိၢ်န့ၢ် တၢ်သးခုလၢအအိၣ်စံာ်အိၣ်ကျၢၤ, လၢအမ့ၢ်-ယွၤအတၢ်အိၣ်ဒီးပှၤန့ၣ် လံာ်စီဆှံ ဒုးနဲၣ်စ့ၢ်ကီးဝဲဒၣ်န့ၣ်လီၤ. ထါစံးထီၣ်ပတြၢၤ ၁၆ န့ၣ် စီၤဒၤဝံး ကွဲးပာ်ဖျါဝဲဒၣ် တၢ်ထံၣ်စိခါဆူညါတၢ်အိၣ်မူအိၣ်ဂဲၤဒီးကစၢ်ယွၤ လီၤထူလီၤယိာ်အဂ့ၢ်န့ၣ်လီၤ. ကစၢ်ယ့ၣ်ရှူး အတၢ်သံ, ဒီးအတၢ်ဂဲၤဆၢထၢၣ်သမူထီၣ်က့ၤဝံၤအလီၢ်ခံ, ခ့ခါအဆၢကတီၢ်, ပဝဲနၤယၤပှၤလၢအအိၣ်မူအိၣ်ဂဲၤသ့ၣ်တဖၣ်, ခဲကနံၣ်အံၤဒၣ်လဲာ်, ခီဖျိလၢသးစီဆှံန့ၣ် ပသ့ၣ်ညါဝဲဒၣ်လၢ ကစၢ်ယွၤ အိၣ်ဒီးပှၤန့ၣ်လီၤ.

တၢ်မၤလီၤနံၤတၢ်, ဒီးတၢ်နံၤတၢ်အ့တဖၣ်န့ၣ် မ့ၢ်ဒၣ်တၢ်တစိၢ်ဖိဘၣ်ဆၣ်, ဖဲလၢတၢ်ကီတၢ်ခဲအကတီၢ်န့ၣ် မၤဖှံထီၣ်ပသူၣ်ပသးသ့ဝဲဒၣ်န့ၣ်လီၤ. ဘၣ်ဆၣ်, ဒ်သိး ပကလဲၤခီဖျိကလၢၢ်ဘၣ် တၢ်သးခုလၢအအိၣ်စံာ်အိၣ်ကျၢၤ, လၢဟံးဃာ်ပၢၤဃာ်ပှၤ လၢပတၢ်အိၣ်မူအပူၤ, တၢ်လၢအမၤဘၣ်ဒိဆါပှၤ နးနးကျံၤကျံၤ အဆၢကတီၢ်တဖၣ်အဂီၢ်န့ၣ် အဆၢဖိ ၁ စံးဘၣ်ပှၤလၢ ပကဘၣ် “သန့ၤပသး” လၢကစၢ်ယွၤ, ဒီးအဆၢဖိ ၇ ပာ်ဖျါဝဲ ယွၤလၢအဟ့ၣ်ကူၣ်, ဒီးသိၣ်လိပှၤတဂၤအလိၤန့ၣ်လီၤ. ကစၢ်ယွၤ တစူးကွံာ်ညိကွံာ်ပှၤနီတဘျီဘၣ်. လၢအလီၢ်န့ၣ်, အဆၢဖိ ၁၂ စံးဘၣ်ပှၤလၢ ယွၤ “ကဘိးဘၣ်သ့ၣ်ညါပှၤလၢတၢ်မူအကျဲ.” ဒီး “ကမၤလၢထီၣ်ပှဲၤထီၣ်ပှၤဒီးတၢ်သူၣ်ခုသးခု” န့ၣ်လီၤ.