ဖဲ ၂၀၁၈ နံၣ်န့ၣ်, တၢ်အိၣ်ဖှိၣ်သရၣ် တဲၣ် ဖလ့းပ့ၣ် (TAN FLIPPING) ဒိးန့ၢ်ဝဲ လ့ၣ်ယီၣ်ခီၣ်အတၢ်ဘၣ်ဒိဘၣ်ထံး, ဒီးမ့ၢ်လၢအခံခိၣ်အဃံတဲၤဖးအဃိ, ဘၣ်ထီၣ်ဝဲတၢ်ဆါဟံၣ်န့ၣ်လီၤ. ဖဲကသံၣ်သရၣ်သ့ၣ်တဖၣ် မၤကွၢ်ဝဲ စံၣ်တံၣ် စကဲၣ် (CT SCAN), ဒ်သိးကဃုသ့ၣ်ညါ တၢ်ဘၣ်ဒိဘၣ်ထံးလၢအခိၣ် ကအိၣ်သ့ၣ်သ့ၣ်ဧါအကတီၢ်န့ၣ်, ဃုထံၣ်န့ၢ်ဝဲ တၢ်ညၣ်ကိၣ်လိၣ်ဖးဒိၣ်တဖျၢၣ် လၢအခိၣ်နူၣ်အမဲာ်ညါ တကပၤန့ၣ်လီၤ. တၢ်ဃုထံၣ်န့ၢ်အံၤ မ့ၢ်လၢအထံၣ်အါထီၣ်တၢ်ညၣ်ကိၣ်လိၣ်အဆံးတဖၣ်အဃိ, တုၤဃီၤဝဲလၢ တၢ်ကူဆါယါဘျါ လၢာ်ဆၢလၢာ်ကတီၢ်, ပၣ်ဃုာ်ဒီးတၢ်ဆီတလဲ အဃံ အနူၣ်ကံၣ်န့ၣ်လီၤ. ဖလံးပ့ၣ် နာ်ဝဲလၢ “ကစၢ်ယွၤ ပျဲဝဲဒၣ်ယတၢ်ဘၣ်ဒိဘၣ်ထံး ဒ်သိးယခိၣ်နူၣ်အညၣ်ကိၣ်လိၣ် ကဘၣ်တၢ်ထံၣ်န့ၢ်အဂီၢ်န့ၣ်လီၤ”.
စီၤပီလူး တဲဘၣ် ပှၤဖံလံးပံၤဖိသ့ၣ်တဖၣ်လၢ ကစၢ်ယွၤ စူးကါတၢ်ဘၣ်ဒိဘၣ်ထံး, ဒီးတၢ်နးတၢ်ဖှီၣ်တဖၣ် လၢအလၤကပီၤအဂီၢ်သ့ဝဲဒၣ်န့ၣ်လီၤ. ဒ်သိးကဟ့ၣ်ထီၣ်တၢ်ဒီတဒၢ ပတံထီၣ်တၢ်ဂ့ၢ်မိၢ်ပှၢ်ဆူ ရိမ့ၤအစီၤပၤနံရိၤအမဲာ်ညါ, ဒီးဖဲအဘၣ်အိၣ်ခိးတၢ်အကတီၢ်န့ၣ် ပှၤရိမ့ၤတဖၣ် ဒုးဃာ်စီၤပီလူး လၢဟံၣ်ပူၤန့ၣ်လီၤ. ကဘၣ်သူၣ်အုးသးအုးတၢ်အလီၢ်န့ၣ်, စီၤပီလူး သူၣ်ခုသးခုဝဲဒၣ်န့ၣ်လီၤ. စီၤပီလူး သူၣ်ခုသးခုကသ့ဝဲဒၣ်ဒ်လဲၣ်? “အဘၣ်တၢ်စၢဃာ်လၢခရံာ်အဃိ- ဖံလံးပံၤ ၁:၁၃” န့ၣ် စီၤပီလူး တူၢ်လိာ်ဝဲ ဒ်အမ့ၢ် ခွဲးဂ့ၤယာ်ဘၣ်လီၤဆီ အဂ့ၢ်န့ၣ် ပကထံၣ်ဘၣ်ဖဲ အဆၢဖိ ၂၉ န့ၣ်လီၤ. ဝံၤန့ၣ်ဒီး, အဆၢဖိ ၁၂ န့ၣ် စီၤပီလူး ကွၢ်ထံဆိကမိၣ်က့ၤအတၢ်နးတၢ်ဖှီၣ် လၢကစၢ်ယွၤအတၢ်ထံၣ်တကပၤ, ဒီးစံးဝဲဒၣ် “တၢ်မၤအသးလၢယၤအံၤ, ကဲထီၣ်ကဒါက့ၤလံလၢတၢ်မၤစၢၤ တၢ်သးခုအကစီၣ်လံ” န့ၣ်လီၤ. တၢ်ဒုးဃာ်အီၤလၢဟံၣ်ပူၤန့ၣ် စီၤပီလူး စူးကါဝဲဒၣ် ဒ်တၢ်ခွဲးတၢ်ယာ်လၢ အကဟ့ၣ်ခီနီၤလီၤဘၣ် ခရံာ်အတၢ်သးခုကစီၣ်ဆူ ပှၤပၢၤတၢ်ဖိတဖၣ် လၢအစၢဒုးဃာ်အီၤန့ၣ်လီၤ. လၢခံကတၢၢ်, အဆၢဖိ ၁၄ ပာ်ဖျါဝဲ, ဖဲလၢအဘၣ်တၢ်စၢဃာ်အကတီၢ်န့ၣ်, ဒ်အဝဲစံၣ်တဲၤတဲလီၤ ခရံာ်တၢ်သးခုကစီၣ်, ဒီးအတၢ်ဒိတၢ်တဲာ်န့ၣ် ဟ့ၣ်ဂံၢ်ဟ့ၣ်ဘါ ပှၤစူၢ်က့ၤနာ်က့ၤတၢ်အဂၤတဖၣ်လၢ “ဒ်သိးတပျံၤဘၣ်တၢ်ဘၣ်ဒီး, ကစံၣ်တဲၤတဲလီၤ တၢ်အကလုၢ်ကထါ” န့ၣ်လီၤ.
ဖဲပဘၣ်ကွၢ်ဆၢၣ်မဲာ် တၢ်နးတၢ်ဖှီၣ်အကတီၢ်, မ်ပကနာ်သန့ၤ ကစၢ်ယွၤအတၢ်ထံၣ်, ဒီးပမ့ၢ်နာ်ယွၤ လၢတၢ်ဂ့ၢ်ကီခဲအပူၤဒၣ်လဲာ်, ကစၢ်ယွၤ ဟဲစိာ်န့ၢ် တၢ်ဂ့ၤတၢ်ဝါသ့ဝဲဒၣ်
န့ၣ်လီၤ.
