ပပၢ်အဂီၢ်, ပဟံၣ်ဖိဃီဖိတဖၣ် ပမၤတၢ်သ့ၣ်နီၣ်ထီၣ်က့ၤတၢ်ဘါ ဖဲထံကျိနံၤဝံၤအလီၢ်ခံ, ဒ်သိးကကဲထီၣ်တၢ်မၤစၢၤလၢ ပကသ့ၣ်နီၣ်ထီၣ်က့ၤအီၤအဂီၢ်န့ၣ်, ပထၢန့ၢ် လၢၢ်ဖိတဖၣ်တဂၤတဖျၢၣ်စုာ်စုာ်န့ၣ်လီၤ. အတၢ်အိၣ်မူန့ၣ် လီၤဂာ်ဝဲဒၣ် ဒ်တၢ်လိာ်ကွဲသုးခ့ဘ့ၣ်ဘၣ် (checkerboard) အသိး, အိၣ်ဒီးတၢ်မၤနၢၤဒီးတၢ်ဃၣ်ကွံာ်တဖၣ်ဘၣ်ဆၣ်, တၢ်အိၣ်လၢယပၢ်အသးပူၤန့ၣ် ပသ့ၣ်ညါလၢ မ့ၢ်ဒၣ်ပှၤန့ၣ်လီၤ. ယစုဘိဖိတဖၣ် ပလၢၢ်ဘၣ် လၢၢ်ဘျ့ အမဲာ်ဖံးခိၣ်, ဒီးဒုးသ့ၣ်နီၣ်က့ၤယၤ ဒ်သိးယကဖိးဟုဃာ်အီၤဘူးဘူးတံၢ်တံၢ်န့ၣ်လီၤ.
လံာ်လူၤကၣ် ၁၉ ပာ်ဖျါထီၣ် ကစၢ်ယ့ၣ်ရှူး အတၢ်လဲၤနုာ်ဆူဝ့ၢ်ယရူၤရှလ့ၣ်အပူၤ လၢတၢ်မၤနၢၤ, ဖဲပှၤကမျၢၢ်တဖၣ်ဟံးန့ၢ် သ့ၣ်စူၣ်ပလိၣ်အဒ့တဖၣ်ဒီးဝံၢ်ဝၢ်ဝဲ, ဒီးကိးသတြီဝဲ “မ်အအုၣ်က့ၤခီၣ်က့ၤ ခဲကနံၣ်အံၤတက့ၢ်,” ဒီး အဆၢဖိ ၃၈ န့ၣ် ပှၤဂီၢ်မုၢ်ကိးပသူထီၣ်ဝဲလၢတၢ်သးခု, “စီၤပၤလၢ အဟဲလၢယွၤအမံၤတဂၤန့ၣ်, မ်အဘၣ်ဆိၣ်ဂ့ၤတက့ၢ်” (ကွၢ် ယိၤ ၁၂:၁၂-၁၃) န့ၣ်လီၤ. ကစၢ်ယ့ၣ်ရှူး စံးလီၤအသးလၢအမ့ၢ် ခရံာ် (မ့းရှံအၤ) န့ၣ် ပှၤဖၤရံၤရှဲတဖၣ် ထံၣ်ဝဲဒ်အမ့ၢ် တၢ်စံးကတိၤမၤကမၣ်ယွၤအဃိ, အဝဲသ့ၣ် မၢ ကစၢ်ယ့ၣ်ရှူး ဒူအပျဲၢ်အဘီၣ်တဖၣ် ဒ်သိးကအိၣ်ဘှ့ၣ်အိၣ်ဘှီၣ်အဂီၢ်န့ၣ်လီၤ. အဆၢဖိ ၄၀ န့ၣ် ကစၢ်ယ့ၣ်ရှူး စံးဆၢဝဲလၢ “ပှၤတဖၣ်န့ၣ် မ့ၢ်အိၣ်ဘှီၣ်ဝဲဒီးလၢၢ်တဖၣ်န့ၣ် ကကိးပသူထီၣ်” န့ၣ်လီၤ.
လၢၢ်တဖၣ် ကကိးပသူထီၣ်ဝဲဒၣ်လၢ ကျိၤကျဲအါဘိန့ၣ်လီၤ. အတၢ်အဲၣ်ဘၣ်ပှၤအပူတဖၣ်အပူၤန့ၣ် ကစၢ်ယွၤ စူးကါတ့ၢ်ဝဲ လၢၢ်တဖၣ်န့ၣ်လီၤ. တၢ်စိးပျၤဃာ် တၢ်မၤလိာ်အထံၣ်တဆံ အလၢၢ်ဘ့ၣ်ဘၣ်ခံဘ့ၣ်လၢ ၂မိၤ ၃၄:၁ အပူၤန့ၣ်, စံးဘၣ်ပှၤလၢ ပကဘၣ်အိၣ်မူအိၣ်ဂဲၤဒ်လဲၣ်န့ၣ်လီၤ. ဖဲ ယိၤရှူ ၄:၈-၉ အပူၤ, တၢ်ပာ်ဖှိၣ်ဆီထီၣ် တၢ်သ့ၣ်နီၣ်အလၢၢ်တဖၣ်လၢ ထံကျိယၢ်ဒ့ၣ်အနံၤ, ဒီးအခၢၣ်သးန့ၣ် မ့ၢ်တၢ်မၤသ့ၣ်နီၣ်ထီၣ် ယွၤအတၢ်ကတဲာ်ကတီၤဒီး အတၢ်တီတၢ်လိၤဆူ ပှၤအံၣ်စရ့လး စၢၤသွဲၣ်သီတဖၣ်အဂီၢ်န့ၣ်လီၤ. ဖဲ မး ၂၇:၅၉-၆၆ ဒီး လူၤ ၂၄:၂ ပာ်ဖျါထီၣ်ဝဲ လၢၢ်လၢအဘၣ်တၢ်တလ့ၣ်အီၤ ဒ်သိးတၢ်ကကးတံာ် ကစၢ်ယ့ၣ်ရှူးအနီၢ်ခိန့ၣ် မ့ၢ်ဝဲဒၣ်လၢၢ်တဖျၢၣ်ဃီလၢ အဘၣ်တၢ်တလ့ၣ်ကွံာ်အီၤ, ဒ်သိးကဒုးနဲၣ် ကစၢ်ဂဲၤဆၢထၢၣ်သမူထီၣ်က့ၤအဂီၢ်န့ၣ်လီၤ. ယိၤဟၣ် ၁၁:၂၅ အပူၤန့ၣ် ပဝဲခဲလၢာ် “နၢ်ဟူ” ဘၣ်လၢၢ်တဖျၢၣ်အံၤ လၢအမၤသ့ၣ်နီၣ်ထီၣ်က့ၤပှၤ ကစၢ်ယ့ၣ်ရှူးအတၢ်ကတိၤ, လၢအမ့ၢ် “ယမ့ၢ်တၢ်ဂဲၤဆၢထၢၣ်က့ၤဒီးတၢ်မူလီၤ” န့ၣ်လီၤ.
လၢတၢ်စံးထီၣ်ပတြၢၤ တၢ်အဲၣ်ပပၢ်သးဘိယွၤအဂီၢ်, ဒိကနၣ်လၢၢ်တဖၣ် အတၢ်ကိးပသူ, ဒီးကိးပသူထီၣ်နကလုၢ်ဒၣ်နဲ,ဃုာ်ဒီးလၢၢ်သ့ၣ်တဖၣ်န့ၣ်တက့ၢ်.
