ဘၣ်ဖဲတနံၣ်န့ၣ်, တချုးယဖိခွါအတၢ်လိာ်ကွဲပြၢတၢ်တဘျီစးထီၣ်ဝဲန့ၣ် ယအၢၣ်လီၤတူၢ်လိာ်ယဲလၢ ယကသးဝံၣ်တၢ်သးဝံၣ်တယုၢ်န့ၣ်လီၤ. ယသးဝံၣ်တ့ၢ်လံလၢအနွံတဖၣ် အနွံ, ဒီးယတိၢ်နီၣ် တၢ်သးဝံၣ်န့ၢ်လံန့ၣ်လီၤ. လၢတၢ်န့ၣ်အဃိ, ဖဲယလဲၤဟးနုာ်လီၤဆူ တၢ်လိာ်ကွဲအပျီပူၤဃုာ်ဒီး ပှၤပြၢတၢ်ခံဖုရဲၣ်လီၤအသး လၢယကပၤ တခီစုာ်စုာ်အကတီၢ်, ယဘံၣ်လီၤယမဲာ်, ဒီးဃ့ဘါထုကဖၣ်တၢ်န့ၣ်လီၤ. ဖဲယစးထီၣ် သးဝံၣ်အခီၣ်ထံးစှၤကျိၤဝံၤန့ၣ်ဒီး, ယတသ့ၣ်နီၣ်ထီၣ်က့ၤ တၢ်သးဝံၣ်လၢခံတကျိၤလၢၤဘၣ်အဃိ, ယသးလီၤကတုၤဝဲဒၣ်န့ၣ်လီၤ. ပှၤပိာ်ခွါလၢယလီၢ်ခံန့ၣ် တဲန့ၢ်ယၤလံာ်မဲာ်ဖျၢၣ် လၢယသးပ့ၤနီၣ်တဖၣ် ကသွံဒံဖိန့ၣ်လီၤ. တုၤမ့ၢ်ယနၢ်ဟူ အတၢ်ဒုးသ့ၣ်နီၣ်စၢၤက့ၤယၤတၢ်န့ၣ်ဒီး, တၢ်သးဝံၣ်အဖျၢၣ်လၢ အအိၣ်လီၤတဲာ်တ့ၢ်တဖၣ်ခဲလၢာ်န့ၣ်, ယသးဝံၣ်ထီၣ်ဒိၣ်ဒိၣ် လၢတၢ်နာ်န့ၢ်လီၤသးအပူၤန့ၣ်လီၤ.
ဘၣ်တဘျီဘျီန့ၣ် ပဝဲကိးဂၤဒဲး ပလိၣ်ဘၣ်တၢ်မၤစၢၤစှၤထံၣ်န့ၣ်လီၤ. ဖဲ ယိၤ ၁၄:၁၅ အပူၤန့ၣ်, ကစၢ်ယ့ၣ်ရှူး တဲနၢ်ပၢၢ်ပှၤလၢ ပအဲၣ်အီၤ ခီဖျိလၢပဒိကနၣ်အီၤန့ၣ်လီၤ. ဒီးအဆၢဖိ ၁၇ န့ၣ် အဝဲအၢၣ်လီၤဝဲလၢ ကဃ့ပၢ်ယွၤ, ဒ်သိးကဟ့ၣ်ပှၤ ပှၤမၤစၢၤတၢ်လၢအမ့ၢ် “သးလၢအဘၣ်ဃးဒီးတၢ်မ့ၢ်တၢ်တီ” န့ၣ်လီၤ. ကစၢ်ယ့ၣ်ရှူးစံးဝဲဒၣ် “ဟီၣ်ခိၣ်ဖိတူၢ်လိာ်အီၤတသ့ဘၣ်. အဂ့ၢ်ဒ်အံၤ, တထံၣ်ဘၣ်အီၤ, ဒီးတသ့ၣ်ညါဘၣ်အီၤဘၣ်. မ့မ့ၢ်သုဝဲသ့ၣ်အံၤ သုသ့ၣ်ညါအီၤလီၤ. အဂ့ၢ်ဒ်အံၤ, အိၣ်ဝဲဆိးဝဲဒီးသု, ဒီးကအိၣ်ဝဲလၢသုပူၤ” န့ၣ်လီၤ. အဆၢဖိ ၂၅ ပာ်ဖျါဝဲ, ဖဲလၢကစၢ်ယ့ၣ်ရှူး အိၣ်မူအိၣ်ဂဲၤဒီးအပျဲၢ်အဘီၣ်တဖၣ်အကတီၢ်, သိၣ်လိတ့ၢ်အပျဲၢ်အဘီၣ်တဖၣ်အါမံၤဘၣ်ဆၣ်, ဖဲအဆၢဖိ ၂၆ န့ၣ် ကစၢ်ယ့ၣ်ရှူး စံးဝဲဒၣ် “ပှၤမၤစၢၤတၢ်, သးစီဆှံလၢပၢ်မၢလီၤအီၤလၢယမံၤ, အဝဲဒၣ်ကသိၣ်လိသုလၢတၢ်ခဲလၢာ်, ဒီးကဒုးသ့ၣ်နီၣ်ထီၣ်က့ၤသုလၢ တၢ်လၢယစံးဘၣ်တဲဘၣ်သုခဲလၢာ်” န့ၣ်လီၤ.
ဖဲပဃ့ထုကဖၣ်, ဖးလံာ်စီဆှံအကတီၢ်, ဒ်သိးပကသ့ၣ်ညါအခီပညီ, ပကနၢ်ပၢၢ်အီၤ, ဒီးပကစူးကါယွၤအတၢ်ကူၣ်သ့အဂီၢ်, သးစီဆှံကမၤစၢၤပှၤန့ၣ်လီၤ. သးစီဆှံကစၢ်အတၢ်ပၢဆှၢပှၤန့ၣ် ကဘၣ်လိာ်ဖိးဒ့လိာ်အသးဒီးကစၢ်ယွၤအကလုၢ်အကထါထီဘိ,ဒီးတကတီၢ်ဘၣ်တကတီၢ်န့ၣ် မ့ၢ်တၢ်ဒုးသ့ၣ်နီၣ်ပှၤတမံၤ လၢတၢ်နဲၣ်ဆှၢပှၤ, မၤမုာ်ထီၣ်က့ၤပှၤ, ဒီးဆီတလဲကွံာ်ပှၤလၢတၢ်အဲၣ်အပူၤန့ၣ်လီၤ.
