ထီး(ဒ)ဘ့လ့(Todd Billing) မ့ၢ်ဝဲဒၣ် ပှၤကူၣ်သ့တဂၤလၢယွၤဂ့ၢ်ပီညါတကပၤ, ဒီးဒိးန့ၢ်ဝဲ သွံၣ်တၢ်ဆါလၢ တၢ်ယါဘျါအီၤတန့ၢ်လၢၤဘၣ်န့ၣ်လီၤ. အဝဲပာ်ဖျါဝဲဒၣ် အသးသမူ လၢအတအိၣ်ဂၢၢ်ဆိးကျၢၤအံၤ ဒ်တၢ်ကပီၤအိၣ်ဝဲလၢ တၢ်လီၢ်ဖးယံၤ, ဒၢးတဖျၢၣ်အပူၤ, လၢအဘၣ်တၢ်မၤပံာ်သံအီၤ, မ့တမ့ၢ် လၢအကပီၤပံာ်လ့ပံာ်လ့န့ၣ်လီၤ. “ဒ်ယမ့ၢ် ပၢ်တဂၤအသိး, ယအိၣ်ဒီးယဖိဆံး ၁ နံၣ်ဖိတဂၤ, ဒီး ၃ နံၣ်ဖိတဂၤန့ၣ်,ယဆိကမိၣ်ယဲလၢ ခါဆူညါ အနံၣ်အဆံတဖၣ်အတီၢ်ပူၤန့ၣ်, ယကထံၣ်ဘၣ် နဲးထံၣ်(Neti) ဒီးနသဲနံၣ်ယၢၣ် (Nathaniel)ခံဂၤ ကဒိၣ်ထီၣ်, ဒီးဒိၣ်တုာ်ခိၣ်ပှဲၤဝဲဒၣ်န့ၣ်လီၤ. ဘၣ်ဆၣ်, ယဘၣ်ကူစါယါဘျါယသးအဃိ, တၢ်ကမၤအသး အကျိၤအကျဲ ဆံးလီၤစှၤလီၤဝဲဒၣ်န့ၣ်လီၤ.”

ဖဲယဆိကမိၣ်ထီၣ် တၢ်အဒူၣ်အဆၢတဖၣ်အံၤန့ၣ်ဒီး, ဘ့လ့(Billing) ကွၢ်ထံဆိကမိၣ်က့ၤဝဲ ထါစံးထီၣ်ပတြၢၤ ၃၁:၈, လၢအပာ်ဖျါထီၣ် ကစၢ်ယွၤ ဆှၢဝဲ စီၤဒၤဝံးဆူ တၢ်လီၢ်တၢ်ကျဲဖးလဲၢ်တတီၤဒ်လဲၣ်န့ၣ်လီၤ. အဆၢဖိ ၂ န့ၣ် စီၤဒၤဝံး ပာ်ဖျါဝဲလၢ အဘၣ်တၢ်မၤကိၢ်မၤဂီၤအီၤလၢအဒုၣ်အဒါတဖၣ်ဘၣ်ဆၣ်, သ့ၣ်ညါဝဲလၢ ကစၢ်ယွၤ မ့ၢ်အလၢၢ်, တိာ်လၢအဂီၢ်, ဒီးမ့ၢ်တၢ်လီၢ်လၢအကတုၤဆူ တၢ်အုၣ်က့ၤခီၣ်က့ၤအဂီၢ်န့ၣ်လီၤ. စံး ၃၁:၁၅ အပူၤန့ၣ် ပှၤကွဲးထါစံးဝဲဒၣ်လၢ“ယဆၢယကတီၢ်တဖၣ် အိၣ်ဝဲလၢနစုပူၤ,” ဒီးပာ်ဖျါထီၣ်ဝဲ အတၢ်နာ်သန့ၤအသးလၢ ကစၢ်ယွၤ, ခီဖျိလၢထါတယုၢ်အံၤန့ၣ်လီၤ.

ဘ့လ့(Billing) လူၤပိာ်ထွဲ စီၤဒၤဝံးအကျဲ, ဒီးပာ်လီၤအတၢ်မုၢ်လၢ်လၢ ကစၢ်ယွၤ အပူၤန့ၣ်လီၤ. ပှၤကူၣ်သ့တဂၤလၢယွၤဂ့ၢ်ပီညါတကပၤ, ဝၤတဂၤ, ပၢ်တဂၤအံၤ, လၢအသးသမူအပူၤန့ၣ် ဘၣ်ကွၢ်ဆၢၣ်မဲာ်ဒီးကျဲအံၣ်အံၣ်ဖိဘၣ်ဆၣ်, အၢၣ်လီၤတူၢ်လိာ်ဝဲဒၣ်လၢ အဝဲအိၣ်ဆိးဘၣ်ဝဲလၢ တၢ်လီၢ်တၢ်ကျဲလၢအလဲၢ်န့ၣ်လီၤ. ဘၣ်မနုၤဃိလဲၣ်. မ့ၢ်လၢ ကစၢ်ယွၤမၤနၢၤတၢ်သံ ခီဖျိကစၢ်ခရံာ် လုၢ်ထီၣ်အသးသမူ, ဒီးပအိၣ်ဆိးလၢကစၢ်ခရံာ် အပူၤ, အခီပညီစံးတၢ်န့ၣ် “ပအိၣ်ဆိးဘၣ်တၢ်လီၢ်တၢ်ကျဲလၢ အလဲၢ်ကတၢၢ်, ပဆိကမိၣ် ဒၣ်လဲာ်တသ့ဘၣ်”န့ၣ်လီၤ. ဘ့လ့ တဲနၢ်ပၢၢ်ဝဲဒၣ်လၢ, “တၢ်လီၢ်လၢအလဲၢ်န့ၢ်, အလုၢ်ပှ့ၤဒိၣ်န့ၢ်ဒံး တၢ်အိၣ်မူလၢ ကစၢ်ခရံာ်အပူၤ ခီဖျိလၢသးစီဆှံန့ၣ် မ့ၢ်အိၣ်ဝဲကသ့ဒ်လဲၣ်”.

လၢတၢ်သူၣ်အုးသးအုးအပူၤန့ၣ်, ပဝဲနၤယၤစ့ၢ်ကီး ပကဟီၣ်သ့ၣ်သ့ၣ်ဘၣ်ဆၣ်, စံး ၃၁:၁,၃ ပာ်ဖျါဝဲလၢ, ပကဃ့ ကစၢ်ယွၤ လဲၤတၢ်လၢပမဲာ်ညါ, ဒီးကနဲၣ်ဆှၢပှၤ, ဒီး ပအိၣ်ကဒုလၢ ယွၤအပူၤသ့ဝဲဒၣ်န့ၣ်လီၤ. ဒ်စီၤဒၤဝံးအသိး, ပအိၣ်ဆိးဘၣ်လၢ တၢ်လီၢ် တၢ်ကျဲဖးလဲၢ်အပူၤလီၤန့ၣ် ပတဲလီၤတံၢ်သ့ဝဲဒၣ်န့ၣ်လီၤ.