ဘၣ်တနံၤ, လၢတၢ်ဘါသရိာ်န့ၣ်, ယဘၣ်တူၢ်လိာ်မုာ် ဟံၣ်ဒူၣ်ဃီထၢတဒူၣ်လၢ အဟဲရ့လိာ်သးဒီးပတၢ်အိၣ်ဖှိၣ်န့ၣ်လီၤ. ယတီၤလီၤလၢ အဖိမုၣ်ဆံးဖိ ဆ့ၣ်နီၤဝဲလၢ ကဟၣ်ခးဆ့ၣ်နီၤ (Wheel Chair) အကပၤ, ဒီးယဒုးသ့ၣ်ညါအီၤလၢ ယထွံၣ်ဖိ ခါလံၣ် (Callie), ဒီးယပတြၢၤ အမဲာ်ထံကလၤ ဂီၤဝါဖိ, ဒီးအခီၣ်ဖံးဘူးဖိ(boot) အတၢ်ဃံတၢ်လၤန့ၣ်လီၤ. ဖိမုၣ်ဆံးဖိအံၤ တစံးဆၢယၤဘၣ်ဆၣ်, အတၢ်နံၤကမှံၤဖိန့ၣ် စံးဘၣ်ယၤလၢ ပစံးကတိၤသကိးတၢ်အဃိ သးခုဝဲဒၣ်န့ၣ်လီၤ. ဖိသၣ်မုၣ်ဆံးဖိအတဂၤ ဟဲသုးဘူးအသး, ဒီးတကွၢ်ဝဲယတံၤသကိးအသီဖိအမဲာ်ဘၣ်, ဒီးစံးကသွံဝဲဒၣ်ယၤ, “တဲဘၣ်အီၤလၢ ယအဲၣ်အဆ့ကၤဖိ” န့ၣ်လီၤ. ယစံးဘၣ်အီၤ, “တဲဘၣ်အီၤနနီၢ်ကစၢ်ဒၣ်နဲတက့ၢ်. အဝဲမ့ၢ်ပှၤသူၣ်ဂ့ၤ သးဝါဒ်သိးနၤ” န့ၣ်လီၤ. ပစံးကတိၤရ့လိာ်သးဒီးပတံၤသကိးအသီန့ၣ် မ့ၢ်တၢ်လၢအညီထဲလဲၣ်န့ၣ်, ယတဲနၢ်ပၢၢ်အီၤလၢ တံၤသကိးဖိတဂၤအံၤ စံးကတိၤသကိးတၢ်တဒ်သိးလိာ်အသးဒီးပှၤဘၣ်ဆၣ်, ဖဲပကွၢ်အီၤ, ဒီးခီဖျိပတၢ်နံၤကမှံဖိန့ၣ် အသးကကလၢၢ်ဘၣ်ဝဲလၢ အဝဲဘၣ် တၢ်တူၢ်လိာ်မုာ်အီၤ, ဒီးဘၣ်တၢ်အဲၣ်အီၤန့ၣ်လီၤ.
လၢလံာ်စီဆှံအပူၤ, ဒီးလၢဟီၣ်ခိၣ်ချၢအံၤ, ပှၤကညီတဖၣ်န့ၣ် မ့ၢ်လၢတၢ်ထံၣ်အီၤ ဒ်ပှၤလၢအတဒ်သိးဒီးပှၤဂၤအဃိ, ဘၣ်တၢ်လဲၤကပာ်ကွံာ် အဝဲသ့ၣ်န့ၣ်လီၤ. ဘၣ်ဆၣ်, ပကစၢ်ယွၤ လၢအဒိၣ်အမုၢ်တဂၤန့ၣ် မၤလၤကပီၤ ပတၢ်လီၤဆီတဖၣ်, ဒီးကွဲမုာ်ဝဲဒၣ်ပှၤ, ဒ်သိးပကရ့လိာ်သးဒီးအီၤ,ဃုာ်ဒီးအဒူၣ်ဖိထၢဖိန့ၣ်လီၤ. စံး ၁၃၈:၁ န့ၣ်, စီၤဒၤဝံး စံးဝဲဒၣ်,“ယကစံးထီၣ်ပတြၢၤနၤ လၢယသးဒီဖျၢၣ်ညါ, လၢကစၢ်သ့ၣ်တဖၣ်အမဲာ်ညါန့ၣ် ယကသးဝံၣ်ထီၣ်နၤ” န့ၣ်လီၤ. အဆၢဖိ ၆ န့ၣ် စီၤဒၤဝံး စံးကဒီးဝဲ, “ယွၤအိၣ်ဝဲလၢ တၢ်ထီၣ်ထီဘၣ်ဆၣ်ဒီး, ကွၢ်လီၤပှၤလၢအဆီၣ်လီၤအသး” န့ၣ်လီၤ.
ကစၢ်ယွၤ, အိၣ်ဝဲလၢ တၢ်ထီၣ်ထီ, ဒီးစီဝဲဆှံဝဲတဂၤန့ၣ်, ကွၢ်လီၤပှၤ, လၢအတ့လီၤ ပာ်လီၤပှၤတဖၣ်, လၢတၢ်အဲၣ်တၢ်သးကညီၤအပူၤ, လီၤဆီဒၣ်တၢ် ဖဲလၢပဆီၣ်လီၤပသးအကတီၢ်န့ၣ်လီၤ. ဖဲပဃ့ကစၢ်ယွၤ ဒ်သိးကမၤစၢၤပှၤလၢ ပကကွၢ်, ဒီးမၤဂ့ၤမၤစၢၤပှၤဂၤ လၢတၢ်အဲၣ်တၢ်သးကညီၤအပူၤန့ၣ်ဒီး, ကမ့ၢ်ဒၣ် ပမၤလီၤတံၢ် ပမ့ၢ်ပှၤလၢအလီၤအလၤအပတီၢ်ဖုၣ်ဘၣ်ဆၣ်, ပဘၣ်တၢ်အဲၣ်ပှၤအဃိ, ပစံးဘျုးစံးဖှိၣ်က့ၤ ကစၢ်ယွၤ သ့ဝဲဒၣ်န့ၣ်လီၤ.