အဲစဲး ဝး (Isaac Watts) မ့ၢ် ပှၤမံၤဟူသၣ်ဖျါတဂၤ, လၢအကွဲးဝဲ ထါသးဝံၣ်, “ထူၣ်ဖျၢၣ်လီၤလး” (When I Survey the Wondrous Cross) န့ၣ်လီၤ. ဖဲအကွဲးဝဲဒၣ် ထါတၢ်သးဝံၣ်အဖျၢၣ်အဂီၢ်, စူးကါဝဲ ထါအက့ၢ်အဂီၤ ဘၣ်ဃးဒီးတၢ်ဂ့ၢ်လၢအထီဒါလိာ်အသး, “ယတၢ်လုၢ်ဒိၣ်ပှ့ၤဒိၣ်တဖၣ်, ယပာ်လၢတၢ်ကလီကလီ,” ဒီး “ကယဲၢ်ယတၢ်ပာ်ထီၣ်ထီသးတဖၣ်, တမ့ၢ်တၢ်နီတမံၤလၢၤဘၣ်” ဒ်သိးဒီးကပာ်ဖျါထီၣ်တၢ်ဂ့ၢ်မိၢ်ပှၢ်လၢ အထီဒါလိာ်သးန့ၣ်လီၤ. တၢ်ကွဲးဒ်သိးအံၤတဖၣ်န့ၣ် တၢ်ကိးအီၤလၢ “ထါအတၢ်ဂ့ၢ်လၢ အထီဒါလိာ်အသး” (oxymorons), တၢ်အဒိဒ်သိး, “မ့ၢ်တၢ်ဂ့ၤအၢအၢသီသီ,” ဒီး “သဒီၣ်ဖိလၢအဒိၣ်အသွါ” တဖၣ်န့ၣ်လီၤ. လၢ ဝး (Watt) အထါတၢ်သးဝံၣ် လံာ်မဲာ်ဖျၢၣ်တဖၣ်န့ၣ် မ့ၢ်တၢ်လီၤဆီဒိၣ်ဒိၣ်ယိာ်ယိာ်န့ၣ်လီၤ.

ကစၢ်ယ့ၣ်ရှူး စူးကါဝဲ တၢ်ဂ့ၢ်ထီဒါလိာ်သးတဖၣ် တလီၢ်လီၢ်န့ၣ်လီၤ. မး ၅:၃ အပူၤန့ၣ် ကစၢ်ယ့ၣ်ရှူး စံးဝဲဒၣ်, “ပှၤလၢအသးဖှီၣ်တဖၣ်န့ၣ် ဘၣ်ဆိၣ်ဂ့ၤဝဲလီၤ” ဒီးအဲၣ်ဒိးဒုးသ့ၣ်ညါဝဲဒၣ်, ပှၤလၢအတၢ်မုၢ်လၢ်တအိၣ်တဖၣ်န့ၣ် ကဒိးန့ၢ်ဘၣ်တၢ်အါန့ၢ်ဒံးအမုၢ်လၢ်တ့ၢ်လံဝဲန့ၣ်လီၤ. နၤမ့ၢ်ဂ့ၤ, ယၤမ့ၢ်ဂ့ၤ, ပှၤလၢပအဲၣ်ဘၣ်တဂၤဂၤ မ့ၢ်သံလဲၤပူၤကွံာ်ပှၤန့ၣ်ဒီး, ပသးကဘၣ်ဒိဘၣ်ထံး, ဒီးဖဲပသူၣ်အုးသးအုးအကတီၢ်, ဖဲ မး ၅:၄ န့ၣ်, ကစၢ်ယ့ၣ်ရှူး စံးဘၣ်ပှၤလၢ ပကဘၣ် “တၢ်မၤမုာ်ထီၣ်က့ၤပှၤ” န့ၣ်လီၤ. ကစၢ်ခရံာ် ဒုးနဲၣ်ဝဲဒၣ်လၢ ဟီၣ်ခိၣ်အတၢ်သိၣ်တၢ်ဘျၢတဖၣ်န့ၣ် တဘၣ်တၢ်စူးကါအီၤလၢ ယွၤအဘီအမုၢ်ဘၣ်န့ၣ်လီၤ.

တၢ်ကတိၤတၢ်ဂ့ၢ်ထီဒါလိာ်သးတဖၣ် ဒုးသ့ၣ်ညါပှၤ တၢ်အိၣ်မူလၢခရံာ်အပူၤန့ၣ် ကမၤနၢၤလဲၤတလၢကွံာ် တၢ်လၢပမုၢ်လၢ်ဆိကမိၣ်ပာ်ဝဲတဖၣ်ခဲလၢာ်, ဒီးပဝဲလၢအတမ့ၢ်, “တၢ်နီတမံၤ” တဖၣ်န့ၣ် တၢ်ကအဲၣ်လီၤဆီပှၤ ဒ် “ပှၤတဂၤဂၤ” အသိးန့ၣ်လီၤ. လၢသ့ၣ်ဖျၢၣ်ထူၣ်စုညါအလိၤ ကစၢ်ခရံာ်ပာ်ဖျါထီၣ် တၢ်ဂ့ၢ်ထီဒါလိာ်အသး လၢပထံၣ်န့ၢ်အီၤသ့တမံၤ, လၢအမ့ၢ် “ခိၣ်သလုးတၤဆှုၣ်” န့ၣ်လီၤ. အဲစဲး ဝဲး စူးကါ တၢ်ဒုၣ်ဒွဲၣ်ပယွဲတၢ် အတၢ်ပနီၣ် “တၢ်အဲၣ်လီၤဆှုဒီးတၢ်သးအုး, တၢ်သးအုးဒီးတၢ်အဲၣ်ဖးဒိၣ်အိၣ်ဖျါနီၢ်ကီၢ်, တၤဆှုၣ်ကဲထီၣ် ခိၣ်သလုးလုၢ်ဒိၣ်ပှ့ၤဒိၣ်,”အံၤ, ဒီးကွဲးဒုးအိၣ်ထီၣ် ထါတၢ်သးဝံၣ်အဃံအလၤတယုၢ်န့ၣ်လီၤ. ပသူၣ်ပိၢ်သးဝးလၢ ထါအလံာ်မဲာ်ဖျၢၣ်တဖၣ်အပူၤ, ဒီးထါအကတၢၢ်တကျိၤ စံးဘၣ်ပှၤ, “အတၢ်အဲၣ်ဒိၣ်ယိာ် စီဝဲဆှံဝဲအဃိ, ကြၢးဟ့ၣ် ယသး, နီၢ်ခိ, ယတၢ်ကိးမံၤ” န့ၣ်လီၤ. ”