သိလ့ၣ် အလွဲၢ်ဝါဃးတခိၣ်, လၢအလဲၤဝဲလၢ အသိလ့ၣ်ကပၤန့ၣ် ကၠူ(န) (June) ကွၢ်စူၣ်ဝဲဒၣ်တပယုၢ်ဃီန့ၣ်လီၤ. ဒ်သိးကနီၣ်ဟးထီၣ်ဝဲအသိလ့ၣ်လၢ ကျဲမုၢ်ဒိၣ်အဂီၢ်, အဝဲကဘၣ်လဲခီဂာ်ကျဲအကျိၤဖိန့ၣ်လီၤ. ဘၣ်ဆၣ်, ဖဲအဂုာ်ကျဲးစၢးခီဂာ်ဝဲ သိလ့ၣ်ဝါဃးလၢအကပၤတဘျီလၢ်လၢ်န့ၣ်ဒီး, ပှၤလၢအနီၣ်သိလ့ၣ်ဝါဃးစ့ၢ်ကီး မၤချ့ထီၣ်ဝဲဒၣ် အသိလ့ၣ်န့ၣ်လီၤ. အကတၢၢ်န့ၣ်, ကၠူ(န်) နီၣ်ဖျိဝဲ သိလ့ၣ်ဝါဃးန့ၣ်လီၤ. လၢအမၤနၢၤတၢ်အကတီၢ်ဖိအံၤန့ၣ်, အသူၣ်မံအသးမံလီၤအသး ဒီးကွၢ်လီၤဝဲလၢ အသိလ့ၣ် အမဲာ်ထံကလၤအပူၤ ဒီးနံၤကမှံထီၣ်ဝဲဒၣ်န့ၣ်လီၤ. တဘျီဃီန့ၣ် အဝဲပာ်သူၣ်ပာ်သးဝဲဒၣ်လၢ အလဲၤတလၢကွံာ် ကျဲလၢကဘၣ်ပိာ်ဝဲဒၣ်န့ၣ်လီၤ.
လၢတၢ်သးအုး အတၢ်နံၤကမှံအပူၤ, အဝဲတဲက့ၤဝဲဒၣ်လၢ “မ့ၢ်လၢယသးစဲအါကဲၣ်ဆိးလၢ ကနီၣ်ခီဂာ် သိလ့ၣ်အဂၤတခိၣ်အဃိ, ကျဲလၢယကဘၣ်လဲၤပိာ်ထွဲဝဲန့ၣ် ယလဲၤတလၢကွံာ်ဝဲဒၣ်န့ၣ်လီၤ”.
ဖဲပသးအိၣ်လဲၤတၢ် လၢကစၢ်ယွၤအကျိၤအကျဲအကတီၢ်န့ၣ်, တၢ်လဲၤတပျၢ်အသးဒ်သိးအံၤန့ၣ် ကဲထီၣ်သ့ဝဲဒၣ်န့ၣ်လီၤ. ယိၤ ၅:၁၆ ပာ်ဖျါဝဲလၢ တၢ်ဘူၣ်တၢ်ဘါခိၣ်နၢ်တဖၣ် မၤအၢမၤသီကစၢ်ယ့ၣ်ရှူး, ခီဖျိလၢအတမၤထွဲ ယူဒၤအတၢ်သိၣ်တၢ်သီတဖၣ်အကတီၢ်, အဆၢဖိ ၃၉-၄၀ အပူၤန့ၣ် ဟ့ၣ်ပလီၢ်ဝဲဒၣ်, “ဒီးအဝဲသ့ၣ်န့ၣ် မ့ၢ်တၢ်လၢအအုၣ်အသးလၢယဂ့ၢ်ယကျိၤလီၤ, ဒီးသုဟဲဆူယအိၣ် ဒ်သိးသုကန့ၢ်ဘၣ်တၢ်မူန့ၣ်, သုသးတအိၣ်ဘၣ်,” မ့ၢ်လၢပှၤယူဒၤဖိတဖၣ် အတၢ်သးစဲအါတလၢဝဲလၢတၢ်မၤလိ, ဒီးတၢ်မၤလၢပှဲၤ တၢ်သိၣ်တၢ်သီတဖၣ်အဃိ, လဲၤကပာ်ဝဲ ပှၤတဂၤလၢ တၢ်သိၣ်တၢ်သီ ပာ်ဖျါဝဲဒၣ်န့ၣ်လီၤ.
လၢတၢ်ဂုာ်ကျဲးစၢး အိၣ်တီအိၣ်လိၤလၢ ယွၤအမဲာ်ညါအဂီၢ်, တၢ်ဘူၣ်တၢ်ဘါခိၣ်နၢ်တဖၣ် ပာ်ဖှိၣ်ပညိၣ်ဝဲလၢ တၢ်လူၤပိာ်ထွဲယူဒၤအတၢ်သိၣ်တၢ်သီ, ဒီးမၤလီၤတံၢ်ဝဲဒၣ်လၢ ပှၤကိးဂၤဒဲး ကလူၤပိာ်ထွဲမၤထွဲစ့ၢ်ကီးန့ၣ်လီၤ. ဒ်န့ၣ်အသိး, ပတၢ်သူၣ်ဆူၣ်သးဂဲၤလၢယွၤအဂီၢ်, ပကမၤ တၢ်အဂ့ၤတဖၣ်, လၢအမ့ၢ် တၢ်ထီၣ်သရိာ်စိၤမိၤ, တၢ်မၤလိလံာ်စီဆှံ, တၢ်ဟ့ၣ်မၤစၢၤတၢ်, ဒီးကွဲမုာ်ပှၤဂၤတဖၣ် ဒ်သိးကမၤသကိးတၢ်လၢ တၢ်မၤဂ့ၤမၤစၢၤတၢ် အတၢ်မၤတဖၣ်န့ၣ်လီၤ. ဘၣ်ဆၣ် ပမ့ၢ်သးစဲဒၣ်ထဲလၢ တၢ်မၤတဖၣ်အံၤန့ၣ်ဒီး, ပကလဲၤပူၤကွံာ်- ပှၤလၢပမၤတၢ်ဂ့ၤတဖၣ်အံၤလၢအဂီၢ်တဂၤ- လၢအမ့ၢ် ကစၢ်ယ့ၣ်ရှူးန့ၣ်လီၤ.
ကယဲၢ်ပမၤတၢ်ခဲလၢာ်န့ၣ်, မ်ပကဃ့ ကစၢ်ယွၤလၢ ကမၤစၢၤပှၤ, ဒ် ဧ့ၤ ၁၂:၂ ပာ်ဖျါဝဲအသိး “မ်ပကွၢ်ဃီၤတၢ်ဆူအအိၣ်” န့ၣ်တက့ၢ်. ယိၤ ၁၄:၆ ပာ်ဖျါဝဲလၢ ထဲကစၢ်ယ့ၣ်ရှူး တဂၤဧိၤန့ၣ် မ့ၢ် “ကျဲ, ဒီးတၢ်မ့ၢ်တၢ်တီ, ဒီးတၢ်မူ” န့ၣ်လီၤ.