ဖဲပတ့ထီၣ် ပဟံၣ်န့ၣ်, ပဟံၣ်အိၣ်သူၣ်လီၤအသး, လၢလၢၢ်ဖိပြံအကျဲအကတၢၢ် ကပံာ်ဟီၣ်ခိၣ်လီၤဟိ အလီၢ်အကျဲန့ၣ်လီၤ. ပလိၣ်ဘၣ် တပံၢ်, တၢ်မုၢ်, ဒီးသ့ၣ်တပှိာ်ဖိတဖၣ် ဒ်သိးကဂ့ၤဝဲကြၢးဝဲဒီး အီၣ်ရံၣ်ကိ(န) (Oregon) ကစၢၢ်တၢ်လူၢ်တဖၣ်အခီၣ်ထံး, အိၣ်ဝးတရံး လၢပဟံၣ်န့ၣ်လီၤ. ဖဲယဟံးထီၣ် ပိးလီတဖၣ် လၢယကမၤ တၢ်ကတဲာ်ကတီၤ ဟီၣ်ခိၣ်တပံၢ်ဂၢၤအံၤန့ၣ်ဒီး, ယဆိကမိၣ်ထီၣ်က့ၤ တၤသၣ်လီၢ်လၢ အအိၣ်ခိးဝဲဒၣ် ပှၤကညီ, ဖဲ ၁ မိၤ ၂:၅ အပူၤ, “ကယဲၢ်တၢ်မဲတၢ်မါလၢပှၢ်လၢ်ကျါ လၢအတချုးအိၣ်ဒံးဘၣ်လၢဟီၣ်ခိၣ်ပူၤ, ဒီးကယဲၢ်ဘုဧိၤဟုဧိၤလၢပျီပူၤလၢအတချုးမဲထီၣ်ဒံးဘၣ်, … ဒီးပှၤကညီလၢ အကမၤဟီၣ်ခိၣ်တအိၣ်ဘၣ်နီတဂၤဘၣ်” န့ၣ်လီၤ.

တၢ်ဘၣ်တ့အဂ့ၢ်, ဖျါဖဲ ၁ မိၤ ၁:၄,၁၀,၁၂,၁၈,၂၁,၂၅,၃၁ အပူၤန့ၣ် ပကထံၣ်ဘၣ် ကစၢ်ယွၤ ကွၢ်ထံက့ၤ အတၢ်ဘၣ်တ့ တဘျီဘၣ်တဘျီ, ဒီးစံးဝဲဒၣ်လၢ, “ဂ့ၤဝဲ” မ့တမ့ၢ် “ဂ့ၤဒိၣ်မး” န့ၣ်လီၤ. ဘၣ်ဆၣ်, တၢ်မၤအံၤတလၢပှဲၤဒံးဘၣ်န့ၣ်လီၤ. ၁ မိၤ ၁:၂၈ ပာ်ဖျါဝဲလၢ ဒ်သိးစီၤအၤဒၣ်ဒီးနီၢ်အံၣ်အူ ကမၤတၢ်အံးထွဲကွၢ်ထွဲ ယွၤအတၢ်ဘၣ်တ့အဂီၢ် ကဘၣ်သူၣ်လီၤဖျးလီၤဟီၣ်ခိၣ်အံၤန့ၣ်လီၤ. ကစၢ်ယွၤ အတၢ်ပညိၣ်လၢ အဝဲသ့ၣ်ခံဂၤအဂီၢ်န့ၣ် တမ့ၢ်ကဘၣ်အိၣ်မုာ်အိၣ်ပၢၤဝဲ တၢ်လီၢ်တၢ်ကျဲလၢ အတဆီတလဲနီတဘျီဘၣ်. မ့မ့ၢ်ကဘၣ်အိၣ်ဆိးဝဲဒၣ် တၢ်လီၢ်တၢ်ကျဲလၢ အလိၣ်ဘၣ်တၢ်အံးထွဲကွၢ်ထွဲ, ဒီးတၢ်ဂုာ်ထီၣ်ပသီထီၣ်န့ၣ်လီၤ.

လၢတၢ်အခီၣ်ထံးလံၤလံၤန့ၣ်, ဒ်သိးပှၤကညီတဖၣ် ကမၤသကိးတၢ်ဒီးအီၤလၢ အတၢ်ဘၣ်တ့အပူၤအဂီၢ်, ကစၢ်ယွၤ ကွဲမုာ်ဝဲဒၣ်န့ၣ်လီၤ. တၢ်ကွဲမုာ်အံၤန့ၣ် ယွၤမၤဝဲဒၣ် လၢဧ့ၤဒ့ၣ်တၤသၣ်အလီၢ်, ဒီး ၂ ကရံၣ် ၅:၁၇ စံးဘၣ်ပှၤ, ခီဖျိလၢပစူၢ်က့ၤနာ်က့ၤ ကစၢ်ခရံာ်န့ၣ်ဒီး, ကစၢ်ယွၤ ကွဲမုာ်ပှၤ ဒ်သိးပကမၤသကိးတၢ်ဒီးအီၤ လၢ “တၢ်ဘၣ်တ့အသီ” အပူၤန့ၣ်လီၤ. ခီဖျိလၢတၢ်အုၣ်က့ၤခီၣ်က့ၤအဃိ, ပတမ့ၢ်ပှၤလၢပှၤပှဲၤဒံးဘၣ်. ရိမ့ၤ ၁၂:၂ အပူၤန့ၣ် ဒ်တၢ်မၤဖိ စီၤပီလူး စံးဝဲအသိး “ဒီးသုတအိၣ်ဒီးပှၤအအံၤတဃၣ်ဖိအက့ၢ်အဂီၤတဂ့ၤ” န့ၣ်လီၤ. ဖဲပလူၤပိာ်ထွဲ တၢ်အိၣ်မူလၢ အဘၣ်ယွၤအသးန့ၣ်ဒီး, ရိမ့ၤ ၈:၂ စံးဘၣ်ပှၤလၢ ကစၢ်ယွၤမၤတၢ်ဒီးပှၤ ဒ်သိး “ပကလီၤဂာ်ဒီးအဖိခွါအက့ၢ်အဂီၤ” န့ၣ်လီၤ.

တၢ်ကွၢ်ထွဲကဟုကယာ် ဟီၣ်ခိၣ်မ့ၢ်ဂ့ၤ, တၢ်ကွၢ်ထွဲကဟုပယာ် ပတၢ်အိၣ်မူအသီလၢကစၢ်ခရံာ်အပူၤမ့ၢ်ဂ့ၤ, ဒ်သိးပတၢ်ကတဲာ်ကတီၤ မၤဂုာ်ထီၣ်ပသီထီၣ်အဂီၢ်, ကစၢ်ယွၤ ဟ့ၣ်လီၤပှၤတၢ်ဟ့ၣ်လၢပလိၣ်ဘၣ်န့ၣ်လီၤ.