ခိၣ်နူာ်မၤတၢ်ဒ်လဲၣ်အဂ့ၢ်န့ၣ် ခိၣ်နူာ်စဲအ့ၣ်ပီညါ ဒုးသ့ၣ်ညါနၢ်ပၢၢ်ၦၤဒိၣ်ဒိၣ်ယိာ်ယိာ်ဘၣ်ဆၣ်, ၦၤစဲအ့ၣ်ဖိတဖၣ် အၢၣ်လီၤတူၢ်လိာ်ဝဲ, တၢ်လၢအဝဲသ့ၣ် သ့ၣ်ညါနၢ်ပၢၢ် ခိၣ်နူာ်အဂ့ၢ်န့ၣ်, အိၣ်ဒံးဒၣ် အခီၣ်ထံးအပတီၢ်သီသီန့ၣ်လီၤ. ခိၣ်နူာ်အက့ၢ်အဂီၤ အတကွီၢ်, ခိၣ်နူာ်မၤတၢ်ဒ်လဲၣ်, ဒီးခိၣ်နူာ်တၢ်လီၢ်ကဝီၤလၢ အစံးဆၢ, မၤဆၢခိၣ်ဃၢၤ တၢ်အိၣ်သးႇ တၢ်လၢအထိၣ်ဂဲၤထီၣ် ပစ့ၣ် (senses) တၢ်သ့ၣ်ညါတဖၣ်, တၢ်လၢအဒုးအိၣ်ထီၣ် တၢ်ဟူးတၢ်ဂဲၤတဖၣ်, ဒီးပၢၤဃး သးအတၢ်ဟူးဂဲၤတဖၣ်န့ၣ်လီၤ. ဘၣ်ဆၣ် တုၤအကတီၢ်အံၤဒၣ်လဲာ် တၢ်သ့ၣ်တဖၣ်အံၤ အတၢ်ဘၣ်ထွဲခီဆၢလိာ်သးယၢ်ခီယၢ်ခီန့ၣ် ဒုးအိၣ်ထီၣ် တၢ်သကဲးပဝာ်, တၢ်ထံၣ်သ့ၣ်ညါ, ဒီးတၢ်တိၢ်နီၣ်ဖံးဃာ်တဖၣ် ဒ်လဲၣ်န့ၣ် အဝဲသ့ၣ်တသ့ၣ်ညါနၢ်ပၢၢ်ဝဲဒံးဘၣ်. ကစၢ်ယွၤ စုအတၢ်ဘၣ်တ့အဂ့ၤကတၢၢ်လၢ အလီၤလး, ဒီးတၢ်ကနၢ်ပၢၢ်ဘၣ်အီၤကီဒိၣ်မး, လၢအမ့ၢ် ၦၤကညီအံၤ ကဲဝဲတၢ်လီၤကမၢကမၣ်လၢအအိၣ်ခူသူၣ် တုၤခဲကနံၣ်အံၤန့ၣ်လီၤ.
စီၤဒၤဝံး အၢၣ်လီၤတူၢ်လိာ်ဝဲ ၦၤကညီအနီၢ်ခိအတၢ်လီၤလးတဖၣ်န့ၣ်လီၤ. စံး ၁၃၉:၁၃ အပူၤန့ၣ်, လၢတၢ်မၤလၤကပီၤ ယွၤအစိကမီၤအဂီၢ်, တၢ်အုၣ်အသးန့ၣ် ဟဲခီဖျိယွၤပၢဆှၢတၢ်အစိကမီၤ လၢန့ဆၢၣ်တၢ်မၤအသးခဲလၢာ်အဖီခိၣ်, ဒီးအဝဲစူးကါ တၢ်ကတိၤဟ့ၣ်ဒိ, “နဒုးကဲထီၣ်ယၤလၢ ယမိၢ်အဟၢဖၢပူၤလီၤ” အံၤန့ၣ်လီၤ.အဆၢဖိ ၁၄ အပူၤ ကွဲးဝဲ, “တၢ်တ့လီၤယၤ အိၣ်ဒီး ပျံၤတၢ်အလီၢ်, ဒီးကမၢကမၣ်တၢ်အလီၢ်လီၤ. … နတၢ်မၤတဖၣ်လီၤလးဝဲန့ၣ် ယသ့ၣ်ညါသပှၢ်ပှၢ်လီၤ” န့ၣ်လီၤ. ၦၤလၢပျၢၤတဖၣ် ထံၣ်ဝဲ ဖိသၣ်တဂၤအတၢ်ဒိၣ်ထီၣ် လၢအမိၢ်အဟၢဖၢပူၤ ဒ်အမ့ၢ်တၢ်လီၤကမၢကမၣ် (ကွၢ် စံၣ်တဲၤ ၁၁:၅) န့ၣ်လီၤ. ပမ့ၢ်အိၣ်ဒီးတၢ်သ့ၣ်ညါအဆၢ ဘၣ်ထွဲဒီး ၦၤကညီ အနီၢ်ခိလၢအလီၤလး, သဘံၣ်ဘုၣ်ကီခဲဒၣ်လဲာ်, စံး ၁၃၉:၁၇-၁၈ အပူၤန့ၣ် စီၤဒၤဝံး ယူးယီၣ်ပာ်ကဲ, ဒီးကမၢကမၣ် လၢယွၤအတၢ်မၤလီၤလး ဒီးယွၤအတၢ်အိၣ်ဖျါန့ၣ်လီၤ.
ၦၤကညီအနီၢ်ခိ အတၢ်လီၤကမၢကမၣ်, ဒီး တၢ်ကနၢ်ပၢၢ်ဘၣ်အီၤကီအံၤ လီၣ်ဖျါ ထီၣ်ပကစၢ်ယွၤ လၢအဒိၣ်ဝဲ, ဒီးအၦဲၤတုာ်တဂၤ အစိအကမီၤ, ဒီးအတၢ်ပၢဆှၢန့ၢ်တၢ်န့ၣ်လီၤ. ပဟ့ၣ်ဆၢက့ၤအီၤတၢ်သ့ဝဲဒၣ်ထဲ တၢ်စံးထီၣ်ပတြၢၤအီၤႇ တၢ်ယူးယီၣ်ပာ်ကဲ, ဒီးလၢတၢ်ကမၢကမၣ်ဧိၤန့ၣ်လီၤ.