ဒ်ဖိသၣ်တဂၤအသိး, ဖဲမုၢ်ဆါခီတၢ်အီၣ်အကတီၢ်န့ၣ် ယဖိမုၣ် အဲၣ်ဒိးလိာ်ကွဲဝဲဒီး တၢ်နုၢ်ထံလီၤသကၤ (cheese) လၢအအိၣ်ဒီးအပူၤတဖၣ်န့ၣ်လီၤ. အဝဲထီထီၣ် ခၠံး(စ) ဘ့ၣ်ဘၣ် အလွဲၢ်အဘီစၢ်လွံၢ်နၢၣ် လၢအမဲာ်သၣ်လိၤ ဒ်သိးတၢ်ကးဘၢမဲာ်ဒီးစံးဝဲလၢ, “မိမိၢ် ကွၢ်ယၤ” ဃုာ်ဒီး အမဲာ်ချံဖိတဖၣ်လၢအိၣ်ပှဲၤဒီး တၢ်သးဖှံသးဂဲၤ လၢအကွၢ်ခူသူၣ် ခီဖျိတၢ်ပူၤခံပူၤလၢ တၢ်နုၢ်ထံလီၤသကၤန့ၣ်လီၤ. ဒ်မိၢ်သးစၢ်တဂၤအသိး, တၢ်နုၢ်ထံလီၤသကၤ တၢ်ကျးဘၢမဲာ်အံၤ ပာ်ဖှိၣ်ထီၣ်ဝဲ ယသးတူၢ်ဘၣ် ခီၣ်ဘၣ်တၢ်တဖၣ်, လၢအဘၣ်ထွဲဒီးယတၢ်ဂုာ်ကျဲးစၢးတဖၣ်, ဒီးယဟ့ၣ်တၢ်လၢ တၢ်သးအိၣ်နီၢ်နီၢ်, လၢအပှဲၤဒီးတၢ်အဲၣ်, ဘၣ်ဆၣ် လၢတၢ်လီၤတိၢ်လီၤကာ်ဒိၣ်ဒိၣ်အပူၤန့ၣ်လီၤ. မ့ၢ်တၢ်လၢအလီၤဖျဲၣ်လီၤဟိ, ဒီးတမ့ၢ်တၢ်စီဆှံဘၣ်.
မ့ၢ်ပအဲၣ်ဒိးအိၣ်မူတၢ်အိၣ်မူလၢအစီဆှံဆံးအါညါလဲၣ်. တၢ်ပာ်လီၤဆီတၢ်အိၣ်မူ လၢယွၤအဂီၢ်, ဒီးဘၣ်တၢ်နဲၣ်ဖျါထီၣ် အသကဲးပဝးလၢ အလီၤဂာ်ဒီးကစၢ်ယ့ၣ်ရှူး န့ၣ်လီၤ. ဘၣ်ဆၣ် တနံၤဘၣ်တနံၤန့ၣ်, ဖျါလၢ ပတၢ်အိၣ်မူန့ၣ်တထီၣ်ဘးဆူ တၢ်စီဆှံ န့ၣ်ဘၣ်. လၢတၢ်စီဆှံအလီၢ်န့ၣ်, အိၣ်တ့ၢ်ဒၣ်ထဲ တၢ်လီၤဖျဲၣ်လီၤဟိတဖၣ်န့ၣ်လီၤ.
၂ တံၤမသ့း ၁:၆-၇ အပူၤ, စီၤပီလူး ကွဲးလံာ်ဆူ စီၤတံၤမသ့းအအိၣ်, အပျဲၢ်လၢအံးထွဲကွၢ်ထွဲဝဲ ဒီးသဆၣ်ထီၣ်အခံ ဒ်သိးကအိၣ်မူထီၣ်ဘး ဒ်အဘၣ်တၢ်ကိးအီၤဆူတၢ်စီဆှံန့ၣ်လီၤ. အဆၢဖိ ၉ န့ၣ်, စီၤပီလူး မၤဆှဲပာ်ဖျါဝဲလၢ “ယွၤအုၣ်က့ၤခီၣ်က့ၤပှၤ, ဒီးကိးပှၤလၢတၢ်ကိးအစီအဆှံ, ဒ်ပတၢ်ဖံးတၢ်မၤအသိးတမ့ၢ်ဘၣ်- မ့ၢ်ဒ်အတၢ်ကူၣ်ပာ်ဒၣ်ဝဲ” န့ၣ်လီၤ. မ့ၢ်လၢကစၢ်ယွၤအဘျုးအဖှိၣ်အဃိ တၢ်အိၣ်မူအံၤ ကဲထီၣ်အသးသ့, ဒီးတမ့ၢ်လၢ ပသကဲးပဝးအဃိဘၣ်. စီၤပီလူး ကွဲးအါထီၣ်ဝဲ, “တၢ်အဘျုးအဖှိၣ်လၢအဟ့ၣ်ပှၤ လၢယ့ၣ်ရှူးခရံာ်အပူၤလၢတၢ်လီၤထူလီၤယိာ်” န့ၣ်လီၤ. မ့ၢ်ပတူၢ်လိာ်ယွၤ အဘျုးအဖှိၣ် ဒီးအိၣ်မူလၢ တၢ်စိတၢ်ကမီၤအပျဲၢ်စီၢ်, လၢအဟ့ၣ်ဝဲန့ၣ် ကသ့ဧါ.
လၢတၢ်လုၢ်ဒိၣ်ထီၣ်ဖိတဖၣ်, လၢတၢ်ဆီဟံၣ်ဆီဃီ, လၢတၢ်ဖံးတၢ်မၤ, မ့တမ့ၢ် လၢတၢ်အဲၣ်ပှၤလၢပခိၣ်ပဃၢၤ တမံၤမံၤအပူၤန့ၣ်, မ့ၢ်လၢယွၤအဘျုးအဖှိၣ်အဃိ, ယွၤကိးပှၤလၢ တၢ်အိၣ်မူအစီအဆှံအံၤ ကဲထီၣ်သ့ဝဲဒၣ်, ဒီးတမ့ၢ်လၢ ပတၢ်ဂဲၤပျုၢ်ကျဲးစၢး လၢပတၢ်လၢတၢ်ပှဲၤအဂီၢ်အဃိဘၣ်န့ၣ်လီၤ.
