ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ကြၢးပာ်သူၣ်ပာ်သးတၢ်ထုကဖၣ် ဒ်အမ့ၢ် တၢ်လၢ အကါဒိၣ်နီၢ်နီၢ်, ဖဲအဒုးနီၢ်သးတၢ်ဒုးတၢ်ယၤတဖၣ်အကတီၢ်န့ၣ်လီၤ. ဘၣ်ဆၣ် တၢ်မ့ၢ် ဃ့ထုကဖၣ် လၢတၢ်သူၣ်တဆးသးတဆးအပူၤန့ၣ်ဒီး ကမ့ၢ်တၢ်လီၤပျံၤလီၤဖုးဒိၣ်မး တမံၤန့ၣ် ပိာ်မုၣ်လၢကီၢ်စဲၣ် ဖလီၣ်ရံၣ်ဒၣ် (Florida) တဂၤ ထံၣ်သ့ၣ်ညါဝဲန့ၣ်လီၤ. အဝဲမ့ၢ်ဃ့ထုကဖၣ်တၢ်န့ၣ် ဘံၣ်ဃးအမဲာ်ချံန့ၣ်လီၤ. ဘၣ်ဆၣ် မုၣ်တနံၤ ဖဲအနီၣ်သိလ့ၣ်ဒီးဃ့ထုကဖၣ်တၢ်အဆၢကတီၢ်, (ဘံၣ်ဃးအမဲာ်ချံအဃိ) တထံၣ်ထွဲ တၢ်ဘၣ်အိၣ်ကတီၢ် အတၢ်ပနီၣ်အဃိ, လဲၤခီဂာ်ဘၣ်ဝဲကျဲဂာ်တဲာ်န့ၣ်လီၤ. အဝဲအိၣ်ပတုာ် အသိလ့ၣ်တချုးအဃိ, အသိလ့ၣ်န့ၣ် တပိာ်ထွဲကျဲမုၢ်ခိၣ်လိၤလၢၤဘၣ်, ဟးဖျိးဆူဟံၣ်တဖျၢၣ် အကရၢၢ်ပူၤန့ၣ်လီၤ. အဝဲကျဲးစၢး ဂုာ်ဟးထီၣ်က့ၤဝဲလၢ ဟံၣ်ကရၢၢ်တပံၢ်တဖၣ်အဖီခိၣ် ဘၣ်ဆၣ် မၤဝဲတန့ၢ်လၢၤဘၣ်. အနီၢ်ကစၢ် တၢ်ဘၣ်ဒိဘၣ်ထံး တအိၣ်ဘၣ်ဆၣ်, ဒိးန့ၢ်ဝဲဒၣ် ပၢၤကီၢ် အတၢ်ယၢၤထီၣ် လၢအနီၣ်သိလ့ၣ် လၢတၢ်တပလီၢ်သးအပူၤ, ဒီးတၢ်မၤဟးဂီၤ ပှၤအစုလီၢ်ခီၣ်ခိၣ်န့ၣ်လီၤ. သိၣ်ဒူလၢအဒုးတၢ် ခီဖျိတၢ်ထုကဖၣ်တဂၤအံၤ လဲၤကပာ်ကွၢ်ကပာ်ဝဲ တၢ်ဂ့ၢ်မိၢ်ပှၢ် “ဆိးသီတက့ၢ်” လၢ အ့ဖ့းစူး ၆:၁၈ အပူၤအဃိန့ၣ်လီၤ.
အ့ဖ့းစူး ၆ အပူၤန့ၣ် ပာ်ဖျါထီၣ် ယွၤအကတီၤအလၢအပှဲၤအကျါ ဒ်ကတီၤတနီၤအသိး, တၢ်မၢဖိစီၤပီလူး ကွဲးတ့ၢ်နုာ်ဃုာ် ကတီၤခံထံၣ်လၢအကတၢၢ်န့ၣ်လီၤ. တၢတထံၣ်မ့ၢ်ဝဲ, ပကဘၣ်ဒုး နီၢ်သးအတၢ်ဒုး ခီဖျိလၢတၢ်ထုကဖၣ်န့ၣ်လီၤ. တၢ်အံၤအခီပညီမ့ၢ်ဝဲ ဃ့ထုကဖၣ်တၢ်လၢ သးစီဆှံအပူၤ – သန့ၤနသးလၢ ယွၤအစိအကမီၤန့ၣ်လီၤ. တကတီၢ်ဃီန့ၣ် နာ်သန့ၤသး လၢယွၤအတၢ်နဲၣ်ဆှၢ, ဒီးစံးဆၢမၤဆၢ ယွၤအတၢ်ထိၣ်ဟူးထိၣ်ဂဲၤ- အဆၢဖိ ၁၈ စံးဘၣ်ပှၤ “ဘါထုကဖၣ်တၢ်လၢ ကယဲၢ်တၢ်ဘါထုကဖၣ်, ဒီးတၢ်ဃ့ကညးကိးအကတီၢ်ဒဲး” န့ၣ်လီၤ. ခံမံၤတမံၤမ့ၢ်, စီၤပီလူးဟ့ၣ်ဂံၢ်ဟ့ၣ်ဘါပှၤလၢ “ဆိးသီတက့ၢ်” န့ၣ်လီၤ. မၢ် ၁၃:၃၃ ပာ်ဖျါဝဲ နီၢ်သးအတၢ်ဆိးသီန့ၣ် မၤစၢၤပှၤကသ့လၢ တၢ်အိၣ်ကတဲာ်ကတီၤသးလၢ ယ့ၣ်ရှူး အတၢ်ဟဲက့ၤအဂီၢ်, ဒီးမၢ် ၁၄:၃၈ ပာ်ဖျါဝဲ, တၢ်မၤနၢၤတၢ်လ့ပစီ, ဒီးအ့း ၆:၁၈ စံးဝဲ ဘါထုကဖၣ်တၢ်လၢ ပှၤစူၢ်က့ၤနာ်က့ၤအဂၤသ့ၣ်တဖၣ်အဂီၢ်န့ၣ်လီၤ.
ဒ်ပဘၣ်ဒုး နီၢ်သးအတၢ်ဒုးတဖၣ် ကိးမုၢ်နံၤဒဲးအဃိ, မ် “ထုကဖၣ်ဒီးဆိးသီ” န့ၣ်ကမ့ၢ်ကျိၤကျဲတမံၤ, လၢပတၢ်အိၣ်မူအပူၤ- လၢတၢ်ဒုးတြီဆၢ တၢ်အၢတၢ်သီအစိၤကမီၤ ဒီးဆဲးဖျိကွံာ် တၢ်ခံးတၢ်နၤ လၢကစၢ်ခရံာ်အတၢ်ကပီၤန့ၣ်တက့ၢ်.
