ပှၤမၤစၢၤတၢ်တဖၣ် မၤသကိးတၢ် ဒ်သိးကမၤစၢၤ ပိာ်ခွါသၢဂၤလၢ အကဘီအိၣ်တုာ်ထီၣ်အသးလၢခိ, လၢကီးတဖျၢၣ်, ဖဲမဲးခရိၣ်နံရှါ (Micronesia) ကီးပာ်ဖှိၣ်န့ၣ်လီၤ. မ့ၢ်လၢ တၢ်ဆူးတၢ်ဆါရၤလီၤအသးအဃိ, ပှၤတဂၤဒီးတဂၤတၢ်ဘၣ်ထွဲလိာ်သးဘူးဘူးတံၢ်တံၢ် ဒ်သိးတအိၣ်အဂီၢ်, လိၣ်ဘၣ် တၢ်ကမၤသကိးတၢ်လၢ ကတြီဃာ်ပၢၤဃာ်တၢ်န့ၣ်လီၤ. ပှၤလၢအထံၣ် ပှၤအိၣ်လီၤဖျီၣ်လၢကီးလိၤ, အဆိကတၢၢ် မ့ၢ်ဝဲပှၤနီၣ်ကဘီယူၤတဂၤ, ဒီးဆှၢလီၤ ကွဲၤလ့လိၤတၢ်ကစီၣ်ဆူ အီးစထြ့လံယၤ အသုးကဘီ, အိၣ်ဖဲ တၢ်ကပိာ်ကပၤန့ၣ်လီၤ. ကဘီအံၤ ဆှၢလီၤ ဟဲၣ်လံၣ်ခီးပတၢၣ် ကဘီယူၤခံဆိ ဒ်သိးကဟ့ၣ်မၤစၢၤ တၢ်အီၣ်တၢ်အီ, ထံ, ဒီးကသံၣ်ကသီတၢ်ကဟုကယာ်န့ၣ်လီၤ. လၢခံန့ၣ်, ကီၢ်အမဲရကၤ အပှၤပၢၤပီၣ်လဲၣ်ကၢၢ်နံၤ ဟဲတုၤဝဲဒၣ် ဒ်သိးကကွၢ်ထံကွၢ်ဆးပှၤခံဂၤအံၤ ဒီးဟ့ၣ်တ့ၢ်ဝဲ ကွဲၤလ့လိၤတဖျၢၣ်န့ၣ်လီၤ. အကတၢၢ်န့ၣ်, မဲးခရိၣ်နံရှါ ကဘီဟးဝ့ၤဝီၤခိးတၢ်ဖိတဆိန့ၣ် ဆှၢက့ၤအဝဲသ့ၣ်ဆူ တၢ်လီၢ်လၢအဲၣ်ဒိးလဲၤဝဲန့ၣ်လီၤ.

ဖဲပမၤသကိးတၢ်န့ၣ်ဒီး ပမၤဝံၤတၢ်အါမံၤသ့ဝဲဒၣ်န့ၣ်လီၤ. ပှၤစူၢ်က့ၤနာ်က့ၤတၢ်တဖၣ် လၢဖံလံးပံၤအပူၤ မၤတၢ်အဂ့ၤကတၢၢ်, ဒ်သိးကဆီၣ်ထွဲ တၢ်မၢဖိစီၤပီလူးန့ၣ်လီၤ. နီၢ်လူၤဒံဒီးအပှၤဟံၣ်ဖိတဖၣ် တူၢ်လိာ်အီၤလၢအဟံၣ်အဂ့ၢ်န့ၣ် ဖျါဖဲ မၤ ၁၆:၁၃-၁၅ န့ၣ်လီၤ. ဖံ ၄:၂-၃ ပာ်ဖျါဝဲ စီၤကျ့မ့ၤဒီး နီၢ်အူၤအိဒံၤ ဒီးနီၢ်စူၣ်တူဃ့ၤ (ပှၤခံဂၤလၢအတဘၣ်လိာ်အသး) ဒၣ်လဲာ် မၤသကိးတၢ်ဒီး စီၤပီလူး ဒ်သိးကရၤလီၤတၢ်သးခုကစီၣ်န့ၣ်လီၤ. လၢခံန့ၣ်, ဖံ ၄:၁၄-၁၈ စံးဘၣ်ပှၤ, ဖဲစီၤပီလူး ဘၣ်တၢ်ဖီၣ်န့ၢ်အီၤ လၢရိမ့ၤအဃိာ်ပူၤန့ၣ်, တၢ်အိၣ်ဖှိၣ်ပာ်ဖှိၣ်တၢ်လၢ အလိၣ်ဘၣ်တဖၣ်ဒီး ဆှၢခီဖျိဝဲလၢ စီၤအ့းပၤဖရီးဒံတူးန့ၣ်လီၤ. ဖံ ၁:၁၉ ပာ်ဖျါဝဲလၢ တၢ်ဂ့ၢ်အကါဒိၣ်ကတၢၢ်မ့ၢ်ဝဲ, ပှၤဖံလံးပံၤဖိတဖၣ် ဘါထုကဖၣ်လၢ စီၤပီလူးအဂီၢ် လၢအတၢ်မၤကစၢ်ယွၤအတၢ်မၤအပူၤန့ၣ်လီၤ.

ပှၤစူၢ်က့ၤနာ်က့ၤတၢ်လၢပျၢၤတဖၣ် အတၢ်ပာ်ဖှိၣ်မၤသကိးတၢ်အဒိအတဲာ်အံၤ မ့ၢ်တၢ်ဟ့ၣ်သဆၣ်ထီၣ် ပှၤလၢခ့ခါအဆၢကတီၢ်အဂီၢ်န့ၣ်လီၤ. ဒ်ယွၤနဲၣ်ပှၤ, ဒီးဟ့ၣ်ဂံၢ်ဟ့ၣ်ဘါပှၤအသိး တၢ်မၤသကိးတၢ်ဒီး ဒီပုၢ်ဝဲၢ်ပှၤစူၢ်က့ၤနာ်က့ၤတၢ်တဖၣ် လၢကဃ့ဘါထုကဖၣ်, ဒီးကမၤတၢ်လၢပှၤဂၤအဂီၢ်န့ၣ် တၢ်မၤကဝံၤအါန့ၢ်ဒံး ပမၤထဲပကစၢ်ဒၣ်ဝဲန့ၣ်လီၤ. တၢ်စံးဝဲဒၣ်, “ပဝဲတဂၤစုာ်စုာ်, ပမ့ၢ်ထံဖိတလီၤစီၤန့ၣ်လီၤ. ပမ့ၢ်ပီၣ်လဲၣ်မိၢ်ပှၢ်တဘ့ၣ်ဃီ ဒ်သိသိး န့ၣ်လီၤ.”