လၢ ကီၢ်ကၠဲမနံၣ်န့ၣ် တၢ်ဘျၣ်တဖၣ် ဟုၣ်ဝဲဒၣ် သိလ့ၣ်အိၣ်ဃုာ်ဒီး တၢ်ခုၣ်အဒၢး, ဒီးအကိပူၤ ကိၣ်ခၠီးကလဲးအိၣ်ဝဲ (chocolate) ကအါန့ၢ် ၂၀ တၣ် (20 tons) န့ၣ်လီၤ. ကိၣ်တဖၣ်အံၤ အပှ့ၤကလံၤလီၤဝဲလၢ ဒီလၣ် ၈၀,၀၀၀ န့ၣ်လီၤ. ပၢၤကီၢ် တဖၣ် ဘိးဘၣ်သ့ၣ်ညါဝဲဒၣ် ဖဲပှၤမ့ၢ်ဆါကိၣ်အါအါဂီၢ်ဂီၢ် ခီဖျိကျိၤကျဲလၢပှၤတညီနုၢ်ဆါတၢ်န့ၣ်ဒီး ပှၤကဘၣ်ဒုးသ့ၣ်ညါတဘျီဃီန့ၣ်လီၤ. ပှၤလၢအဟုၣ်ကိၣ်တၢ်ဆၢအါအါဂီၢ်ဂီၢ်အံၤ ဖဲအဘၣ်တၢ်ဖီၣ်န့ၢ်, ဒီးဘၣ်တၢ်လိာ်ကွီၢ်အဝဲသ့ၣ်န့ၣ်ဒီး ကဘၣ် ကွၢ်ဆၢၣ်မဲာ် တၢ်အစၢလၢအခၣ်, ဒီးအတလီၤသးမံ သပှၢ်ကတၢၢ်န့ၣ်လီၤ.
လံာ်ကတိၤဒိ မၤဂၢၢ်မၤကျၢၤ တၢ်သိၣ်တၢ်သီအံၤလၢ ကတိၤ ၂၀:၁၇ အပူၤ “ကိၣ်ကဘျံးကဘျၣ်န့ၣ် ဆၢဝဲလၢ ပှၤကညီအဂီၢ်လီၤ. ဘၣ်ဆၣ်ဒီး လၢအလီၢ်ခံန့ၣ် အထးခိၣ် ကပှဲၤဒီး လၢၢ်ပြံဧိၤလီၤ” န့ၣ်လီၤ. အခီၣ်ထံးန့ၣ် တၢ်လၢပမၤန့ၢ်အီၤ ခီဖျိလၢတၢ်လီတၢ်ဝ့ၤ ဒီးလၢကျဲတတီတလိၤတဖၣ်န့ၣ် ကဖျါဒ်တၢ်လၢအဆၢ- တစိာ်ဖိအဂီၢ်, ကပှဲၤဝဲဒီးတၢ်သူၣ်ဟူးသးဂဲၤ, ဒီးတၢ်သးခုန့ၣ်လီၤ. ဘၣ်ဆၣ်, အကတၢၢ်န့ၣ် တၢ်လၢအဝံာ်အဘဲတဖၣ် ကဟါမၢ်ကွံာ်, ဒီးပတၢ်လီတၢ်ဝ့ၤ ကဆှၢပှၤဆူ တၢ်သးကွံ ဒီးတၢ်ကီတၢ်ခဲအပူၤန့ၣ်လီၤ. တၢ်မၤကမၣ်တၢ်, တၢ်ပျံၤတၢ်ဖုး, ဒီးတၢ်ဒဲးဘး ပိာ်ထွဲထီၣ်အခံလၢတၢ်အခၣ်အံၤ အကတၢၢ်န့ၣ် ကမၤဟးဂီၤ ပတၢ်အိၣ်မူ, ဒီးပလီၢ်ပလၤန့ၣ်လီၤ. ကတိၤ ၂၀:၁၁ စံးဝဲ “ဖိသၣ်ဒၣ်လဲာ်န့ၣ် အမၤတၢ်ကဆှီဧါ, အမၤတၢ်လိၤဧါန့ၣ် ပှၤသ့ၣ်ညါအီၤလၢအမၤတၢ်လီၤ” န့ၣ်လီၤ. မ်ပတၢ်ကတိၤ, ဒီးပတၢ်မၤတဖၣ် ကပာ်ဖျါထီၣ် ပတၢ်သးကဆှီလၢယွၤအဂီၢ်- မ်အသုတမ့ၢ်တၢ်အခၣ် လၢအမ့ၢ် တၢ်အဲၣ်လီၤသး အတၢ်မိၣ်န့ၢ်သးလီၤတၢ်တဂ့ၤ.
ဖဲတၢ်လ့ပစီလီၤဘၣ်ပှၤအဆၢကတီၢ်, မ်ပကဃ့တၢ်လၢ ယွၤကဟ့ၣ်ဂံၢ်ဟ့ၣ်ဘါ ဒီးကမၤစၢၤပှၤ ဒ်သိးပကအိၣ်ဂၢၢ်ကျၢၤ တီတီလိၤလိၤလၢ ကစၢ်ယွၤအဂီၢ်န့ၣ်တက့ၢ်. ဖဲလၢ ယွၤကမၤစၢၤပှၤလၢပကကွၢ်ဆိ, ထံၣ်စိ တၢ်ဆၢတၢ်မုာ်တစိၢ်တလီၢ်ဖိအလီၢ်ခံ ဖဲလၢပလီၤဘၣ်တၢ်လ့ပစီအပူၤ, ဒီးကနဲၣ်လိပှၤ ဒ်သိးပကကွၢ်ထံဆိကမိၣ် တၢ်လၢ ပဃုထၢတဖၣ်အဃိ တၢ်အစၢလၢ ပကတူၢ်ဘၣ်ခီၣ်ဘၣ်တၢ်အယံာ်အထၢအဂီၢ်န့ၣ်လီၤ.
