ပှၤကွဲးထါ ဝ့လယၢၣ် ခီဖၢၣ် (William Cowper) လၢအသးသမူပူၤ အါတက့ၢ်, ဘၣ်ဂဲၤလိာ်ဂဲၤပျုၢ်ဒီး တၢ်သးလၢာ်သးဟးဂီၤန့ၣ်လီၤ. ဖဲကူၣ်မၤသံလီၤအသးဝံၤန့ၣ် တၢ်ဆှၢလီၤအီၤဆူ ပှၤသးတဘၣ်လိာ်ဘၣ်စး တၢ်ဆါဟံၣ်န့ၣ်လီၤ. ဖဲန့ၣ် ခီဖျိလၢ ခရံာ်ဖိကသံၣ်သရၣ်တဂၤအဃိ, အဝဲအသးလၢၤထီၣ်က့ၤ ဒီးစူၢ်က့ၤနာ်က့ၤ ကစၢ်ယ့ၣ်ရှူး လၢတၢ်သးဆူၣ်န့ၣ်လီၤ. တၢ်န့ၣ်ဝံၤ တယံာ်ဘၣ် ခီဖၢၣ် ရ့လိာ်သး ဘူးဘူးတံၢ်တံၢ်ဒီး တၢ်အိၣ်ဖှိၣ်သရၣ်ဒီး ပှၤကွဲးထါ ကၠီ(န) နယူတၢၣ် (John Newton), လၢအဟ့ၣ်ဂံၢ်ဟ့ၣ်ဘါအီၤ ဒ်သိးကမၤသကိးထုးထီၣ် ထါသးဝံၣ်လၢ တၢ်အိၣ်ဖှိၣ်အဂီၢ်န့ၣ်လီၤ. ခီဖၢၣ် ကွဲးဝဲ ထါတၢ်သးဝံၣ်တဖၣ်အကျါတယုၢ် “ယွၤမၤတၢ်လၢကျဲပနၢ်တပၢၢ်အပူၤ” (ထါအသီ ၄၀၉) လၢအအိၣ်ဒီး ထါအဆၢ, “ပှၤစီဆှံဧၢ ပာ်ဆူၣ်သုသး, တၢ်အၢၣ်သူလၢသုပျံၤ လၢယွၤအဘျုးကဖိထီၣ်မး ကစူၤလီၤတၢ်ဆိၣ်ဂ့ၤ” န့ၣ်လီၤ. တၢ်သးဝံၣ်အဖျၢၣ်တဖၣ်အံၤ အိၣ်ဟဲဖျိးထီၣ်လၢ တၢ်လဲၤခီဖျိ နးနးကလဲာ် အပူၤန့ၣ်လီၤ.

ဒ် ခီဖၢၣ် အသိး, ပှၤယူဒၤဖိတဖၣ် လၢတၢ်တမုၢ်လၢ်, ဆိကမိၣ်ပာ်အပူၤန့ၣ် ထံၣ်ဘၣ်ယွၤ အတၢ်သးကညီၤန့ၣ်လီၤ. ဖဲဒုၣ်ဒါပာ်ဖှိၣ်ထီဒါတၢ်တဖၣ် ဟဲကဝီၤဃာ် ထံကီၢ်န့ၣ်ဒီး စီၤပၤယဟိရှၤဖး ကိးပာ်ဖှိၣ်အပှၤဂီၢ်မုၢ် လၢတၢ်ထုကဖၣ်အဂီၢ်န့ၣ်လီၤ. ၂ ကွဲးနီၣ်တၢ် ၂၀:၂၁ ပာ်ဖျါဝဲ, ဖဲယူဒၤအသုးမုၢ်ဟးထီၣ်ဒုးတၢ်န့ၣ်, ပှၤအိၣ်လၢ တၢ်မဲာ်ညါတဖၣ် စံးထီၣ်ပတြၢၤယွၤန့ၣ်လီၤ. သုးမုၢ်လၢ ဟဲကဝီၤဃာ်တၢ်တဖၣ်န့ၣ်မၤသံလိာ်သးကဒဲကဒဲ, ဒီးအဆၢဖိ ၂၄-၂၅ စံးဘၣ်ပှၤ, “ဒီးပှၤတပူၤတဖျဲးဘၣ် နီတဂၤဘၣ်… ဒီးမ့ၢ်တၢ်ဖိတၢ်လံၤအိၣ်အါဒီး, ထၢထီၣ်တၢ်ဂုာ်န့ၢ်သၢသီညါလီၤ” န့ၣ်လီၤ.

လၢလွံၢ်နံၤတနံၤန့ၣ် တၢ်လီၢ်လၢ ဒုၣ်ဒါအသုးမုၢ်အၢသီတဖၣ်လၢကထီဒါ ယွၤအပှၤဂီၢ်မုၢ်တဖၣ် ပာ်ဖှိၣ်ထီၣ်သးအလီၢ်န့ၣ် ဘၣ်တၢ်ယုၢ်က့ၤအမံၤဆူ ဘရၤကးအကစၢၢ်ကဆူး, အခီပညီလိၤလိၤမ့ၢ်, “တၢ်စံးထီၣ်ပတြၢၤအကစၢၢ်ကဆူး” မ့တမ့ၢ် “တၢ်ဆိၣ်ဂ့ၤ” န့ၣ်လီၤ. တၢ်လဲလိာ်လၢ အဂ့ၤလီၤဆီမးန့ၣ်လီၤ. ဖဲပဟ့ၣ်လီၤ ပကစၢၢ်ကဆူး အကီခဲကတၢၢ်တဖၣ်ဆူယွၤအစုပူၤန့ၣ်ဒီး ယွၤအတၢ်သးကညီၤကဆီတလဲဝဲဆူတၢ်လီၢ်လၢအပှဲၤဒီး တၢ်စံးထီၣ်ပတြၢၤန့ၣ်လီၤ.