နိၣ်ရၣ် (Nora) လဲၤဝဲဆူ တၢ်ဒုးနဲၣ်ကမျၢၢ်တၢ်ဘၣ်သးလၢ တၢ်ကစုဒုအပူၤ မ့ၢ်လၢ အတၢ်သးဆူၣ်သးဂဲၤဒိၣ်မး လၢတၢ်မ့ၢ်တၢ်တီအဂီၢ်အဃိန့ၣ်လီၤ. ဒ်တၢ်သုးကျဲၤပာ်လီၤအသိး, တၢ်ဒုးနဲၣ်တၢ်ဘၣ်သးန့ၣ် လၢတၢ်ဘှ့ၣ်တၢ်ဘှီၣ်အပူၤန့ၣ်လီၤ. ပှၤဒုးနဲၣ်တၢ်ဘၣ်သးတဖၣ် ဟးဝဲလၢ တၢ်ဘှ့ၣ်တၢ်ဘှီၣ်လၢအသဟီၣ်ဒိၣ်အပူၤ လၢဝ့ၢ်ခၢၣ်သးန့ၣ်လီၤ.

တၢ်န့ၣ်ဝံၤ သိလ့ၣ်ခံခိၣ် ဟဲအိၣ်ကတီၢ်ဝဲန့ၣ်လီၤ. ပှၤအိၣ်လၢ ဝ့ၢ်အချၢတဖၣ်ကမၤတၢထီၣ်တၢလီၤတၢ်အဂီၢ် ဟဲတုၤဃီၤဝဲန့ၣ်လီၤ. တယံာ်ဘၣ်န့ၣ် တၢ်တၢထီၣ်တၢလီၤ အိၣ်ထီၣ်ဝဲဒၣ်န့ၣ်လီၤ. လၢတၢ်သးဘၣ်ဒိဖးဒိၣ်အပူၤ နိၣ်ရၣ် ဟးထီၣ်ကွံာ်ဝဲန့ၣ်လီၤ. အဝဲသ့ၣ်အတၢ်တိာ်ပာ်လၢ အဂ့ၤတဖၣ်န့ၣ် ဖျါလၢအဘျုးတအိၣ်လၢၤဘၣ်န့ၣ်လီၤ.

ဖဲတၢ်မၢဖိစီၤပီလူး လဲၤဆူ ဝ့ၢ်ယရူၤရှလ့ၣ် အတၢ်လုၢ်ဟံၣ်န့ၣ် ဘၣ်ကွၢ်ဆၢၣ်မဲာ်ဒီး ပှၤလၢအထီဒါအီၤတဖၣ်န့ၣ်လီၤ. မၤတၢ် ၂၁:၂၇ ပာ်ဖျါလၢ အဝဲသ့ၣ်မ့ၢ်, “ပှၤယူၤဒၤဖိလၢအၤစံတဖၣ်,” ဒီးထံၣ်ဝဲကစၢ်ယ့ၣ်ရှူး ဒ်အမ့ၢ်ပှၤမၤပျံၤမၤဖုး အဝဲသ့ၣ်အတၢ်အိၣ်မူအကျိၤအကျဲန့ၣ်လီၤ. အဆၢဖိ ၂၈-၂၉ န့ၣ် ပကထံၣ်ဘၣ် အဝဲသ့ၣ် ကိးထီၣ် စီၤပီလူး အတၢ်လီတၢ်ဝ့ၤဒီးတၢ်ပစိၣ်ပစ့ ဒီးဒုးအိၣ်ထီၣ် တၢ်သဘံၣ်ဘူၣ် အဆိအချ့န့ၣ်လီၤ. ပှၤဂီၢ်မုၢ်တၢထီၣ်တၢလီၤ ဒီးတွံၢ်ထုးထီၣ်စီၤပီလူးဆူ တၢ်လုၢ်ဟံၣ်အချၢ, ဒိအီၤတီၢ်အီၤဒီး, သုးဖိတဖၣ် ဟဲဃ့ၢ်တုၤဝဲဒၣ်န့ၣ်လီၤ.

အဆၢဖိ ၃၇-၃၈ ပာ်ဖျါဝဲ, ဖဲစီၤပီလူး ဘၣ်တၢ်ဖီၣ်အီၤအကတီၢ်, ဃ့ဝဲခွဲးယာ်လၢ ရိမ့ၤသုးခိၣ်အအိၣ် ဒ်သိးကစံးကတိၤလီၤတၢ်ဆူ ကမျၢၢ်န့ၣ်လီၤ. အဆၢဖိ ၄၀ န့ၣ် ပကထံၣ်ဘၣ် ဖဲအဝဲဒိးန့ၢ် ခွဲးယာ်န့ၣ်ဒီး ကတိၤလီၤတၢ်လၢ အဝဲသ့ၣ်အကျိာ်တၢ်ကတိၤအဃိ ကဲထီၣ်တၢ်ကမၢကမၣ်,ဒီးထုးန့ၢ်ကမျၢၢ်အသးန့ၣ်လီၤ. လၢတၢ်မၤအသးဒ်သိးအံၤန့ၣ်ဒီး, မၤတၢ် ၂၂:၂၀-၂၁ စံးဝဲလၢ စီၤပီလူးဆီတလဲ တၢ်သဘံၣ်ဘူၣ်ဆူ ခွဲးယာ်လၢကနီၤဟ့ၣ် တၢ်ဂ့ၢလၢ အဘၣ်တၢ်ထုးထီၣ်ကွံာ်အီၤလၢ တၢ်ဘူၣ်တၢ်ဘါအသံပူၤအဂ့ၢ်န့ၣ်လီၤ.

ပှၤတနီၤ အဲၣ်မၤစုဆူၣ်ခီၣ်တကး, ဒီးတၢ်လီၤမုၢ်လီၤဖးန့ၣ်လီၤ. တၢ်သးဟးဂီၤအလီၢ် တအိၣ်ဘၣ်. အဝဲသ့ၣ် တမၤနၢၤတၢ်ဘၣ်. ဒ်သိးကနီၤဟ့ၣ် အတၢ်ကပီၤ ဒီးတၢ်ဃူတၢ်ဖိး ဆူပဟီၣ်ခိၣ် လၢအလီၤဘၣ်ယိၣ်တဘ့ၣ်အံၤအဂီၢ်, ယွၤဃုပှၤစူၢ်က့ၤနာ်က့ၤတၢ်ဖိလၢ အသူၣ်ဒူသးဒူတဖၣ်န့ၣ်လီၤ. တၢ်ကဖျါလီၤဂာ်ဒ် တၢ်ဂ့ၢ်ကီတၢ်သဘံၣ်ဘုၣ်အံၤ ကမ့ၢ်ဝဲ ခွဲးယာ်တမံၤလၢ နကဒုးနဲၣ်ယွၤအတၢ်အဲၣ် ဆူပှၤတဂၤဂၤအဂီၢ်န့ၣ်လီၤ.