ကၠဲနဘံ (Genevieve)ကဲထီၣ် မဲာ်ချံတဖၣ်လၢအဖိသၢဂၤအဂီၢ်, မ့ၢ်လၢဖိတဂၤစုာ်စုာ် အိၣ်ဖျဲၣ်ထီၣ်ဃုာ်ဒီး မဲာ်ပှၤဖိထီၣ်ဝါအသးဒီး တထံၣ်ဘၣ်တၢ်အဃိန့ၣ်လီၤ. ဖဲအဝဲလဲၤကိးအဖိ တဖၣ်ဆူအသဝီ တဘျီလၢ်လၢ်, လၢကီၢ်ဘံၣ်န့ ( Benin )လၢ အဲဖြၤကၤမုၢ်နုာ်န့ၣ်, အဝဲပုထီၣ် အဖိဆံးဖိလၢအချၢ, ဒီးအစုခံခီန့ၣ် ဖီၣ်ဃာ်ဝဲအဖိ အဒိၣ်ခံဂၤအစု ဖျါဒ်သိးအကွဲမုာ်တၢ်ကဟဲမၤကီမၤခဲအဝဲသ့ၣ်န့ၣ်လီၤ. တၢ်ဆဲးတၢ်လၤစံးဝဲလၢ တၢ်မဲာ်တထံၣ်တၢ်မ့ၢ်တၢ်နါအတၢ်မၤလၢအဘၣ်တၢ်ဟိၣ်တၢ်ယီအဃိ, လၢတၢ်သးဟးဂီၤအပူၤ ကၠဲနဘံ ကိးပသူထီၣ် တၢ်မၤစၢၤ ဆူကစၢ်ယွၤအအိၣ်န့ၣ်လီၤ.
လၢခံ, ပိာ်ခွါလၢ အသဝီပူၤတဂၤ ဒုးသ့ၣ်ညါအီၤ တၢ်သးကညီကဘီတဖၣ် (Mercy Ships) အဂ့ၢ်, တၢ်သးခုကစီၣ်တၢ်မၤတမံၤလၢ အမၤစၢၤဆီၣ်ထွဲတၢ်ကွဲးကါ တၢ်ဆူးတၢ်ဆါ, လၢတၢ်မၤလၤကပီၤ ကစၢ်ယ့ၣ်ရှူး လၢအဟဲစိာ် တၢ်မုၢ်လၢ် ဒီးတၢ်မၤဘျါ ပှၤဖှီၣ်ဖိယာ်ဖိန့ၣ်လီၤ. အဝဲသ့ၣ် မၤစၢၤအီၤကန့ၢ်-တန့ၢ်န့ၣ် တလီၤတံာ်ဘၣ်ဆၣ်, ကၠဲနဘံ လဲၤဝဲဆူ အဝဲသ့ၣ်အအိၣ်န့ၣ်လီၤ. ဖိသၣ်တဖၣ်, ဖုသံနီၣ်က့ၤလၢ တၢ်ကွဲးကါ အဝဲသ့ၣ် အမဲာ်ချံဝံၤအလီၢ်ခံ, အဝဲသ့ၣ်ထံၣ်က့ၤတၢ်န့ၣ်လီၤ.
ကစၢ်ယွၤ အဂ့ၢ်အကျိၤထီဘိန့ၣ် ဟဲအိၣ်ထီၣ် ခီဖျိပှၤအိၣ်ဆိးလၢ တၢ်ခံးတၢ်နၤအကျါ ဒီးတၢ်ဟဲစိာ်န့ၢ် အတၢ်ကပီၤန့ၣ်လီၤ. ယရှါ ၄၂:၆ အပူၤ ဝံ ဘိးဘၣ်သ့ၣ်ညါဝဲလၢ ကစၢ်ယွၤကမ့ၢ် “တၢ်ကပီၤလၢ ပှၤကလုာ်တဖၣ်အဂီၢ်” န့ၣ်လီၤ. အဆၢဖိ ၇ န့ၣ် အဝဲ “ကအိးထီၣ် ပှၤမဲာ်ဘျီၣ်အမဲာ်,” တမ့ၢ်ကမၤဂ့ၤမၤဘၣ်က့ၤထဲနီၢ်ခိ အတၢ်ထံၣ်န့ၣ်ဘၣ်, မ့မ့ၢ် နီၢ်သးအတၢ်ထံၣ်စ့ၢ်ကီးန့ၣ်လီၤ. ဒီးအဆၢဖိ ၆ န့ၣ် ကစၢ်ယွၤအၢၣ်လီၤဝဲလၢ “ကဟံးဃာ် အဝဲသ့ၣ်(အပှၤဂီၢ်မုၢ်)အစု” န့ၣ်လီၤ. အဝဲဒုးထံၣ်က့ၤတၢ်လၢ ပှၤမဲာ်ဘျီၣ်, ဒီးဟ့ၣ်ထီၣ်တၢ်ကပီၤဆူ ပှၤအိၣ်ဆိးလၢတၢ်ခံးကျါအဂီၢ်န့ၣ်လီၤ.
နမ့ၢ်သးကလၢၢ်ဘၣ်လၢ တၢ်ခံးတၢ်နၤ ဒိၣ်စိလုၣ်ဘၢနၤန့ၣ်ဒီး, ဒ်နဖိးဃာ် တၢ်အဲၣ်ပၢ်ကစၢ်ယွၤ အတၢ်အၢၣ်လီၤအီလီၤတဖၣ်အပူၤ ဟံးဃာ်ဂၢၢ်ကျၢၤ တၢ်မုၢ်လၢ်, ဖဲနဃ့န့ၢ်အတၢ်ကပီၤ ဒ်သိးကမၤကပီၤထီၣ်တၢ်အဂီၢ်န့ၣ်တက့ၢ်.
