ယစံးလီၤက့ၤယသး, ဖဲလၢနကးတံာ် နထးခိၣ်ပူၤန့ၣ်ဒီး, နတမၤကမၣ်တၢ်နီတမံၤဘၣ်. ယဟံးက့ၤ ယတၢ်သးထီၣ်ဘၣ် ယတံၤသကိး လၢခိ, ဖဲယထုးထီၣ်ကမၣ် အတၢ်ကတိၤ အခီပညီ ဝံၤအလီၢ်ခံ န့ၣ်လီၤ. မ့ၢ်လၢပကဘၣ်ထံၣ်လိာ်သး ကိးမုၢ်နံၤဒဲးအဃိ, ယပာ်လီၤသးလၢ ယကပာ်ပနီၣ် ပတၢ်ဆဲးကျိး, မၤဘၣ်ထွဲလိာ်သးဒီးအီၤ ဖဲတၢ်လိၣ်အိၣ်အကတီၢ်န့ၣ်လီၤ. ယတၢ်အိၣ်ဘှ့ၣ်အိၣ်ဘှီၣ် တၢ်ပာ်သူၣ်ပာ်သးအံၤ ကမၣ်ကသ့ဒ်လဲၣ်.
မးသဲ ၁၅:၁၈-၂၀ အပူၤန့ၣ် ယ့ၣ်ရှူးစံးဝဲ တၢ်ဒဲးဘးစးထီၣ်လၢ ပသးပူၤန့ၣ်လီၤ. ယတၢ်အိၣ်ဘှ့ၣ်အိၣ်ဘှီၣ်န့ၣ် ကကဲထီၣ်တၢ်မၤပျုၢ်ပှၤကညီတဖၣ်လၢ ကဆိကမိၣ် တၢ်ခဲလၢာ်န့ၣ် ဂ့ၤဝဲဘၣ်ဆၣ်, ပလီကစၢ်ယွၤတန့ၢ်ဘၣ်. ကစၢ်ယွၤသ့ၣ်ညါ ယပာ်ခူသူၣ်ဃာ် သးတဖျၢၣ်လၢအပှဲၤဒီး တၢ်သးဒိၣ်သးထီၣ်တၢ်န့ၣ်လီၤ. ဒ်အဆၢဖိ ၈ ပာ်ဖျါဝဲအသိး ယလီၤဂာ်ဒီး ဖၤရံၤရှဲတဖၣ်လၢ အမၤလၤကပီၤယွၤ လၢအထးခိၣ်, မ့မ့ၢ် အသးတဖၣ်န့ၣ် အိၣ်ယံၤဒီးယွၤန့ၣ်လီၤ. ယတၢ်အိၣ်ဖျါလၢ ခိတဖၣ်န့ၣ် တပာ်ဖျါထီၣ် ယတူၢ်ဘၣ်ခီၣ်ဘၣ်တၢ်အမ့ၢ်အတီဒၣ်ကယၢာ်, တၢ်သးဆါတဖၣ် ဒိၣ်ထီၣ်အါထီၣ်လၢ ယသးပူၤန့ၣ်လီၤ. ထီဘိလၢယသးကလၢၢ်ဘၣ် တၢ်သးခု, ဒီးတၢ်အိၣ်ဘူးဘူး တံၢ်တံၢ်ဒီး ပၢ်ယွၤအိၣ်လၢမူခိၣ်တဖၣ်န့ၣ် ဟါမၢ်ကွံာ်ဝဲဒၣ်လံန့ၣ်လီၤ. တၢ်ဒုးဒိၣ်ထီၣ်, ဒီးပာ်ခူသူၣ် တၢ်ဒဲးဘးန့ၣ် ဒုးကဲထီၣ်တၢ်ဒ်သိးအံၤန့ၣ်လီၤ.
ခီဖျိလၢကစၢ်ယွၤအဘျုးအဖှိၣ်န့ၣ်, ယစံးဘၣ် ယတံၤသကိးလၢ ယသးပူၤန့ၣ် ယတူၢ်ဘၣ် ခီၣ်ဘၣ်တၢ်ဒ်လဲၣ်အဂ့ၢ် ဒီးယဃ့ကညးအီၤန့ၣ်လီၤ. အဝဲပျၢ်ယတၢ်ကမၣ်လၢတၢ်သးအိၣ်အပူၤ, ဒီးအကတၢၢ်န့ၣ်, ပကဲထီၣ် တံၤသကိးလၢ အဂ့ၤတဖၣ်န့ၣ်လီၤ. အဆၢဖိ ၁၉ အပူၤန့ၣ် ကစၢ်ယ့ၣ်ရှူး စံးဝဲဒၣ်, “တၢ်ကူၣ်အအၢအသီတဖၣ် အိၣ်ဟဲထီၣ်လၢ ပသးကံၢ်ပူၤလီၤ” န့ၣ်လီၤ. ပတၢ်ပာ်သူၣ် ပာ်သးအပတီၢ် မ့ၢ်တၢ်လၢအကါဒိၣ်, အဂ့ၢ်ဒ်အံၤ တၢ်အၢအိၣ်ဆိးလၢ ပသးပူၤတဖၣ် ဟဲပာ်ဖှိၣ် အါထီၣ်ဒီးယွၤလီၤဆူ ပတၢ်အိၣ်မူအပူၤ သ့ဝဲအဃိန့ၣ်လီၤ. တၢ်အိၣ်ဖျါလၢနီၢ်ခိမ့ၢ်ဂ့ၤ နီၢ်သးမ့ၢ်ဂ့ၤ ခံမံၤလိာ်န့ၣ် မ့ၢ်တၢ်လၢအကါဒိၣ်တဖၣ်န့ၣ်လီၤ.
