မူခိၣ်ဖီကလံၤမုၢ်ဖးဒိၣ်လီၤဘၣ်လၢ ယအိၣ်ဆိးတၢ်ကီၢ်စဲၣ်, ကီၢ်အမဲရကၤ မုၢ်နုာ်တကပၤန့ၣ်, ယမိၢ် လၢအမ့ၢ်မုၣ်ကမဲန့ၣ်, ဒ်သိးကလဲၤခီဖျိလိာ်သး ဘှ့ၣ်မုၢ်ဖးဒိၣ်ဒီးပှၤအဂီၢ် အၢၣ်လီၤတူၢ်လိာ်ဝဲလၢ ကအိၣ်ဆိးဒီးပဟံၣ်ဖိဃီဖိန့ၣ်လီၤ. ဖဲဘှ့ၣ်မုၢ်ဖးဒိၣ်လီၤဝံၤန့ၣ်ဒီး, ယမိၢ်တက့ၤကဒါဆူအဟံၣ် လၢၤဘၣ်. စးထီၣ်ဖဲန့ၣ်ဒီးဆူညါ, ယမိၢ်န့ၣ်အိၣ်ဆိးဒီးပှၤ အသးသမူဒီစိၤန့ၣ်လီၤ. ယမိၢ်အတၢ်ဟဲ အိၣ်ဒီးပှၤအံၤ ဆီတလဲကွံာ်ပဟံၣ်ဒူၣ်ဃီထၢလၢ ကျဲဘၣ်ဘျုးအါမံၤန့ၣ်လီၤ. တနံၤဘၣ်တနံၤအဂီၢ် ယမိၢ်ဟ့ၣ်တၢ်ဆၢကတီၢ် လၢကသိၣ်လိပှၤ တၢ်ကူၣ်သ့, ဟ့ၣ်ကူၣ်ဟ့ၣ်ဖး ပဟံၣ်ဖိဃီဖိတဖၣ်, ဒီးဒုးသ့ၣ်ညါပှၤလၢ ပတၢ်ဟဲလီၤစၢၤ အဂ့ၢ်အကျိၤတဖၣ်န့ၣ်လီၤ. ယမိၢ်ဒီးယဝၤ ကဲထီၣ်တံၤသကိး အဂ့ၤကတၢၢ်တဖၣ်, ကတိၤသကိးတၢ်လီၤနံၤလီၤအ့, ဒီးအဲၣ်တၢ်လိာ်ခိၣ်လိာ်ကွဲအဂ့ၢ်တဖၣ်န့ၣ်လီၤ. ယမိၢ် တမ့ၢ်ပှၤတမှံၤတဂၤလၢၤဘၣ်. မ့မ့ၢ်ကဲထီၣ် ထီဘိဟံၣ်ဖိဃီဖိ, မ့ၢ်ပှၤအကါဒိၣ်လၢပဟံၣ်အဂီၢ်- ဆီတလဲပသူၣ်ပသးတဖၣ်ဒီစိၤ, တုၤဒၣ်လဲာ်ကစၢ်ယွၤကိးက့ၤအီၤဝံၤအလီၢ်ခံတစုန့ၣ်လီၤ.
တၢ်လဲၤခီဖျိအံၤ ဒုးသ့ၣ်နီၣ်ထီၣ်က့ၤယၤလၢ စီၤယိၤဟၣ်ပာ်ဖျါဝဲ ကစၢ်ယ့ၣ်ရှူးလၢ ယိၤ ၁:၁၄ အပူၤ ပှၤ “အိၣ်ဝဲဆိးဝဲ လၢပကျါ” တဂၤန့ၣ်လီၤ. မ့ၢ်တၢ်ပာ်ဖျါလၢ အထုးန့ၢ်ပသးဒိၣ်မးတမံၤ, အဂ့ၢ်ဒ်အံၤ, လံာ်မဲာ်ဖျၢၣ် အိၣ်ဆိး အံၤ အခီၣ်ထံးခီၣ်ဘိလၢဟ့းလ့ၣ်ကျိာ် အခီပညီမ့ၢ် “တၢ်သူၣ်ထီၣ် ဒဲတဖျၢၣ်” န့ၣ်လီၤ. တၢ်ကွဲးကျိာ်ထံအဂၤတမံၤမ့ၢ်, “ဟဲအိၣ်ဝဲဆိးဝဲလၢပသိးပကျါ” န့ၣ်လီၤ.
ခီဖျိလၢတၢ်နာ်န့ၣ်, ပဝဲစ့ၢ်ကီး ပဒိးန့ၢ်ကစၢ်ယ့ၣ်ရှူး ဒ်အမ့ၢ်ကစၢ်တဂၤလၢ အိၣ်ဝဲဆိးဝဲဒၣ် လၢပသးကံၢ်ပူၤန့ၣ်လီၤ. ဒ်စီၤပီလူးကွဲးဝဲလၢ အ့ဖ့း ၃:၁၆-၁၇ အပူၤ, “ဒ်သိးအကဟ့ၣ်လီၤသု ဒ်အလၤထူးအကပီၤတီၤအသိး, လၢသုနီၢ်လၢညါ ကန့ၢ်ဘၣ် အဂံၢ်ဆူၣ်အဘါဆူၣ် လၢသးအဃိ, ဒ်သိးခရံာ်ကအိၣ်ဝဲဆိးဝဲလၢသုသးအပူၤ လၢတၢ်နာ်အဃိ, ဒ်သိးသုဂံၢ်စဲၤလီၤ, ဒီးသုခီၣ်ထံး ပာ်ကျၢၤအသးလၢ တၢ်အဲၣ်တၢ်ကွံအပူၤ” အသိးန့ၣ်လီၤ.
ကစၢ်ယ့ၣ်ရှူးန့ၣ် တမ့ၢ်ပှၤတမှံၤလၢ အဟဲတဘျီတခီၣ်တဂၤန့ၣ်ဘၣ်, ကစၢ်ယ့ၣ်ရှူးမ့ၢ်ထီဘိ ဟံၣ်ဖိဃီဖိတဂၤ, လၢအဟ့ၣ်ဆူၣ်ထီၣ်ဂံၢ်ဘါဆူ ကယဲၢ်ပှၤလၢအပိာ်အခံတဂၤလၢ်လၢ်အဂီၢ်န့ၣ်လီၤ. မ်ပကအိးထီၣ် ပသးအတြဲၤတဖၣ်လဲၢ်လဲၢ် ဒီးတူၢ်လိာ်မုာ်အီၤတက့ၢ်.
