ဖဲလၢနံၣ်ကယၤ ၁၄နံၣ်န့ၣ် ခဲသရ့(Catherine) လၢ စံၣ်ယဲနၣ်(Sienna) ကွဲးထါဖိတယုၢ်အပူၤ ဒီးစံးဝဲ “တၢ်ဆှုၣ်တဘိ ဆဲးဖျိနုာ်လီၤ ယခီၣ်ညါသးအဃိ, ဘၣ်ဟီၣ်ခူသူၣ်လၢ မုၢ်နၤကတီၢ်” န့ၣ်လီၤ. စံးကဒီးဝဲ “လၢဟီၣ်ခိၣ်အံၤ ပှၤအိၣ်ထဲတနီၤ လၢအသ့ထုးထီၣ်တၢ်ဆှုၣ်အံၤန့ၣ်လီၤ. တၢ်သ့ထုးထီၣ်တၢ်ဆှုၣ်အံၤ အဝဲသ့ၣ်မၤလိန့ၢ်ဝဲလၢ (ကစၢ်ယွၤ)အအိၣ်” န့ၣ်လီၤ. ခဲးသရ့ ဘၣ်လုၢ်ထီၣ်အသးသမူဒီစိၤ ဒ်သိးကဒိးန့ၢ် “တၢ်သ့တၢ်ဘၣ်” ဒ်သိးအံၤဒီး, မ့ၢ်လၢအဝဲအိၣ်ဒီးတၢ်သ့တၢ်ဘၣ် လၢအသ့ၣ်ညါနၢ်ပၢၢ်, ဒီးအဲၣ်သးကညီၤ ပှၤတူၢ်ဘၣ်ခီၣ်ဘၣ် တၢ်နးတၢ်ဖှီၣ်တဖၣ်အဂီၢ်အဃိ တုၤမုၢ်မဆါတနံၤအံၤဒၣ်လဲာ် ဘၣ်တၢ်သ့ၣ်နီၣ်အီၤန့ၣ်လီၤ.
တၤဆှုၣ်တၤမဲ ဆဲးဖျိနုာ်လီၤယိာ်ယိာ်လၢ ဘၣ်တူၢ်ခီၣ်တၢ်နးတၢ်ဖှီၣ်က့ၢ်ဂီၤအံၤ ဒုးနၢ်ပၢၢ်ယၤလၢ တၢ်ကခွဲးထုးထီၣ်အီၤအဂီၢ် လိၣ်ဘၣ်တၢ်အဲၣ်သးကညီၤတၢ်, ဒီးတၢ်သ့တၢ်ဘၣ်ဂ့ၤဂ့ၤန့ၣ်လီၤ. တၢ်သ့ၣ်ညါအံၤ အိၣ်စဲဘူးလၢယသးပူၤန့ၣ်လီၤ. က့ၢ်ဂီၤ ဒ်သိးအံၤ မ့ၢ်တၢ်ဒုးသ့ၣ်နီၣ်ထီၣ်ပှၤ လၢပဝဲပှၤဟီၣ်ခိၣ်ဖိတဖၣ် တူၢ်ဘၣ်ခီၣ်ဘၣ် တၢ်သဘံၣ်ဘုၣ်, ဒီးဘၣ်ဒိဘၣ်ထံးထဲလဲၣ်, ဒ်သိးတၢ်ကဒုးအိၣ်ထီၣ် တၢ်အဲၣ်သူၣ်ကညီၤ သးကညီၤတၢ်နီၢ်နီၢ် လၢပှၤဂုၤပှၤဂၤ ဃုာ်ဒီးပနီၢ်ကစၢ်ဒၣ်ဝဲအဂီၢ်န့ၣ် ပလိၣ်ဘၣ်လၢ တၢဆူၣ်တၤမဲတဖၣ် ကဘၣ်တၢ်ခွဲးဖျိးထုးထီၣ်အီၤယိာ်ယိာ်န့ၣ်လီၤ.
မ့တမ့ၢ်ဘၣ်ဒီး ကမ့ၢ်က့ၢ်ဂီၤလၢ အဒုးသ့ၣ်နီၣ်ပှၤလၢ ပကအဲၣ်ပှၤဂုၤပှၤဂၤ ဒ်ကစၢ်ယ့ၣ်ရှူးအဲၣ်အသိး တၢ်လိၣ်ဘၣ်ကမ့ၢ် ဒ်ပှၤတၢ်မၢဖိစီၤပီလူး ပာ်ဖျါလၢ ရိမ့ၤ ၁၂:၁၀ အပူၤအသိး “အဲၣ်လိာ်ကွံလိာ်သုသး ဒ်ဒီပုၢ်ဝဲၢ်တံၢ်တံၢ်အသိး” န့ၣ် ကဘၣ်အါန့ၢ်ဒံး တၢ်တိာ်လၢအဂ့ၤ ဒီးတၢ်သူၣ်အိၣ်သးအိၣ်တၢ်တဖၣ်န့ၣ်လီၤ. အဆၢဖိ ၁၂ န့ၣ်စံးဝဲ “လၢတၢ်မုၢ်လၢ်အပူၤန့ၣ် သးခု, လၢတၢ်နးတၢ်ဖှီၣ်အပူၤန့ၣ် ဝံသးစူၤ, လၢတၢ်ထုကဖၣ်အဂ့ၢ်န့ၣ် မၤသပှၢ်ပှၢ် ” န့ၣ်လီၤ. အဆၢဖိ ၁၅ န့ၣ် စံးဘၣ်ပှၤ တမ့ၢ်ထဲလၢပကဘၣ် “သးခုဃုာ်ဒီး ပှၤလၢအသးခု” တဖၣ်ဘၣ်. မ့မ့ၢ် ပကဘၣ် “သးအုးဃုာ်ဒီး ပှၤလၢအသးအုး” တဖၣ်န့ၣ်လီၤ. တၢ်အံၤမ့ၢ်တၢ်လၢ ပဝဲကိးဂၤလိၣ်ဘၣ်ဝဲဒၣ်န့ၣ်လီၤ.
ဟီၣ်ခိၣ်လၢအကၢ်ဘျဲးတဘ့ၣ်အပူၤ, ပှၤလၢအပူၤဒီးတၢ်ပူၤလီၢ်ပူၤကျဲတအိၣ်နီတဂၤဘၣ်- ပဘၣ်ဒိ ဘၣ်ထံး ဒီးပတၢ်ပူၤလီၢ်ပူၤကျဲတဖၣ် နုာ်လီၤအိၣ်လၢ ပဝဲတဂၤစုာ်စုာ်အပူၤ ယိာ်ယိာ်န့ၣ်လီၤ. ဘၣ်ဆၣ်, တုၤ မုၢ်မဆါတနံၤ, တၢ်အဲၣ်ပဃုထံၣ်န့ၢ်လၢကစၢ်ခရံာ်န့ၣ် ဒိၣ်ဝဲယိာ်ဝဲဒီး အဆၢဖိ ၁၄ ပာ်ဖျါဝဲ မ့ၢ်တၢ်အဲၣ် ကပုာ်လုးလၢ ကထုးထီၣ် တၤဆှုၣ်တၤမဲတဖၣ် ဃုာ်ဒီး တၢ်သူၣ်ကညီၤသးကညီၤ ကသံၣ်ဖှူဒီး, သးအိၣ်ဖိးဟုဃာ် တံၤသကိးဂ့ၤ ဒုၣ်ဒါဂ့ၤ ကဃုထံၣ်န့ၢ် တၢ်ယါဘျါအဂီၢ်န့ၣ်လီၤ.
