ဖဲကီၢ်အဲကလံး အနီၢ်ပၤမုၣ် အဲလံးစဘဲး(England’s Queen Elizabeth) လဲၤပူၤကွံာ်ဟီၣ်ခိၣ် လၢလါစဲးပထ့ဘၢၣ်, ၂၀၂၂ နံၣ် ပှၤသုးဖိ လၢအကထိတဖၣ်အကထိ ဘၣ်တၢ်ဟ့ၣ်လီၤမူဒါလၢ အကလဲၤမၤလၤကပီၤ တၢ်ပာ်လီၤ နီၢ်ပၤမုၣ်အဒဲဟီၣ်ခိၣ် အတၢ်ရဲၣ်တၢ်ကျဲၤန့ၣ်လီၤ. အဝဲသ့ၣ် အနီၢ်တဂၤစုာ်စုာ်အလီၢ်အလၤတဖၣ် တမ့ၢ်တၢ်ကပာ်သူၣ်ပာ်သး လၢပှၤသုးဖိဂီၢ်မုၢ်ဂီၢ်ပၤအကျါဘၣ်ဆၣ်, ပှၤသုးဖိအါဂၤ ပာ်ကဖၢလၢအသး လၢတၢ်မၤအံၤအဂီၢ်န့ၣ်လီၤ. သုးဖိတဂၤစံးဝဲ “တၢ်မၤအံၤမ့ၢ်ခွဲးယာ်ဂ့ၤတမံၤလၢ တၢ်ကမၤလၢပှဲၤ ပမူဒါလၢခံကတၢၢ် လၢနီၢ်ပၤမုၣ်အံၤအဂီၢ်” န့ၣ်လီၤ. (သုဖိအံၤ)လၢအဂီၢ် တၢ်မၤလၢအမၤဝဲန့ၣ် တမ့ၢ်တၢ်လၢအကါဒိၣ်ဘၣ်, တၢ်အကါဒိၣ်ကတၢၢ်လၢအဂီၢ်န့ၣ် မ့ၢ်မၤဝဲမတၤတဂၤ အတၢ်မၤလဲၣ်န့ၣ်လီၤ.
ပှၤလ့ၤဝံဖိတဖၣ် အိၣ်ဒီးမူဒါလၢ တၢ်ကွၢ်ထွဲ ဒဲစီဆှံအပီးအလီတဖၣ် လၢအအိၣ်စ့ၢ်ကီးဒီး တၢ်တိာ်တမံၤဃီန့ၣ်လီၤ. တၢ်လၢအလီၤဂာ်ဒီး ပှၤလုၢ်တၢ်အဒိၣ်တဖၣ်န့ၣ် ၄ မိၤ ၃:၂၅-၂၆, ၂၈,၃၁,၃၆-၃၇, ပာ်ဖျါလၢ စီၤက့ရရှိၣ်, စီၤကဃးဒီး စီၤမရၤရံအဒူၣ်တဖၣ် ဘၣ်တၢ်ဟ့ၣ်မူဒါလၢ, တၢ်မၤကဆှဲကဆှီ ဒဲစီဆှံ အတၢ်ကျၢၢ်ဘၢ, ယၣ်နီၣ်ကျၢၢ်, မ့ၣ်အူဒၢ, နီၣ်တိ ဒီးအဆူၣ်, တၢ်ဂၢၤဝးတရံး အထူၣ်ဒီးအခီၣ်, ဒီးအတၢ်ကမိာ်ခံဒီး အပျံၤတဖၣ်, တၢ်မၤတဖၣ်အံၤဖျါ ဒ်တမ့ၢ်တၢ်အကါဒိၣ်ဘၣ်န့ၣ်လီၤ. ဘၣ်ဆၣ် ၃မိၤ ၃:၈ ပာ်ဖျါဝဲ တၢ်မၤလၢ အဝဲသ့ၣ်ကဘၣ်မၤတဖၣ်အံၤ ဘၣ်တၢ်ဟ့ၣ်လီၤလၢ ကစၢ်ယွၤလီၤတံၢ်လီၤဆဲး, ဒ်သိး “အကမၤ ဒဲအခ့အပှၤအတၢ်မၤ,” ဒီးပှၤကဟဲလၢခံသ့ၣ်တဖၣ်အဂီၢ် ဘၣ်တၢ်ကွဲးနီၣ်တ့ၢ်လၢ လံာ်စီဆှံအပူၤန့ၣ်လီၤ.
မ့ၢ်တၢ်ထံၣ်ဆိကမိၣ်တမံၤလၢ တၢ်န့ၢ်ဂံၢ်န့ၢ်ဘါတၢ်လီၤမးလဲၣ်. တနံၤအံၤ, ပဝဲအါဒံအါဂၤ ပမၤတၢ် လၢတၢ်မၤလီၢ်, လၢဟံၣ်လၢဃီ ဒီးလၢတၢ်အိၣ်ဖှိၣ်အပူၤတဖၣ်န့ၣ် ဖဲလၢဟီၣ်ခိၣ်တဘ့ၣ် လၢအပာ်လုၢ်ပာ်ပှ့ၤ လီၢ်လၤတဖၣ် ဒီးဘူးလဲၤအါအါဂီၢ်ဂီၢ်အပူၤ ဘၣ်သ့ၣ်သ့ၣ် ကဖျါဒ်တမ့ၢ်တၢ်လၢ အကါဒိၣ်ကဲာ်ဆိး ဘၣ်န့ၣ်လီၤ. ဘၣ်ဆၣ်, ကစၢ်ယွၤအတၢ်ထံၣ်န့ၣ် လီၤဆီဝဲဒၣ်ဒီး ပှၤဟီၣ်ခိၣ်ဖိအတၢ်ထံၣ်န့ၣ်လီၤ. ပမ့ၢ်မၤတၢ်ဒီး မၤကစၢ်ယွၤအခ့အပှၤအတၢ်မၤန့ၣ်ဒီး တၢ်မၤဆံးဆံးဖိဒၣ်လဲာ် လၢတၢ်မၤလၤကပီၤကစၢ်ယွၤ အဂီၢ် ပကဃုမၤအဂ့ၤကတၢၢ်န့ၣ်လီၤ. မ့ၢ်လၢပမၤ တၢ်ဒိၣ်ကစၢ်ယွၤအတၢ်မၤအဃိ ပတၢ်ဖံးတၢ်မၤတဖၣ် မ့ၢ်ဝဲ တၢ်လၢအကါဒိၣ်တဖၣ်န့ၣ်လီၤ.
