တၢ်စဲၤခံလံလၢ, ထီ(မ) (Tom) အဂီၢ်, ဖဲအသ့ၣ်ညါ တၢ်သီၣ် ‘ထဲး’ အကလုၢ် လၢအခီၣ်ဖံး (ဘူး)အဖီလာ် လၢပှၤသုးဖိသိးဝဲန့ၣ်ဒီး အစုခုၣ်ခီၣ်ခုၣ်ဘၣ်အသး, လၢသးသ့ၣ်ညါတၢ်အပူၤ အဝဲစံၣ်ဖုးခီယံၤထီၣ် အသးန့ၣ်လီၤ. မ့ၣ်ပိာ်လၢ အမၤသံတၢ်သ့လၢ အိၣ်ခူသူၣ်အသးလၢဟီၣ်ခိၣ်လာ်အံၤ တပိၢ်ဖးဘၣ် န့ၣ်လီၤ. လၢခံတၢ်လီၢ်ဖဲန့ၣ် ပှၤတဖုလၢ ကဘၣ်မၤပျီကွံာ် မ့ၣ်ပိာ်တဖၣ် ခူၣ်ထုးထီၣ် ဟီၣ်လာ်မ့ၣ်ပိာ် လၢအဃၢ ၈၀ ပီၣ် လၢတၢ်ပိၣ်ဖးအသဟီၣ်ဆူၣ်တဖျၢၣ်န့ၣ်လီၤ. ထီ(မ) သိးဝဲအသုးခိၣ်ဖံးဘူးန့ၣ်တုၤ အဟးဂီၤ ယာ်မူာ်ယာ်ဖျ့တစုန့ၣ်လီၤ. အဝဲစံးဝဲ “ယခီၣ်ဖံးဘူးလၢအမၤဂ့ၤယတၢ်ဘူၣ်တၢ်တီၢ်” န့ၣ်လီၤ.

ထီ(မ) ဟံးဃာ် တ့ၢ်ဝဲခီၣ်ဖံးဘူးအံၤ ဘၣ်သ့ၣ်သ့ၣ် ကမ့ၢ်တၢ်လၢ အဒုးကဲထီၣ် တၢ်သ့ၣ်နီၣ်တမံၤလၢ ဘၣ်ကွၢ်ဆၢၣ်မဲာ်တၢ်သံဘူးဘူးတံၢ်တံၢ်အဂီၢ်န့ၣ်လီၤ. ဘၣ်ဆၣ်တလီၢ်လီၢ်န့ၣ် ပှၤဟီၣ်ခိၣ်ဖိတဖၣ်ဘၣ် တၢ်လ့ပစီ ခီဖျိလၢဆိကမိၣ်တၢ်မၤအသးတမံၤမံၤန့ၣ် မ့ၢ်လၢ “အဘူၣ်အတီၢ်ဂ့ၤ” မ့တမ့ၢ် “တၢ်ဆိၣ်ဂ့ၤ” လၢနီၢ်သးတၢ်နာ်တကပၤန့ၣ်လီၤ. ဖဲပအၢၣ်လီၤတူၢ်လိာ် တၢ်လီၤပတြၢၤတမံၤမံၤ- တၢ်ပနီၣ်တထံၣ်ထံၣ် ဒၣ်လဲာ်, ဒ်အမ့ၢ် ယွၤအတၢ်ဆိၣ်ဂ့ၤအဂံၢ်ထံး န့ၣ်ဒီး, တၢ်ဂ့ၢ်ကီအိၣ်ထီၣ်ဝဲဒၣ်န့ၣ်လီၤ.

တၢ်ဂ့ၢ်အံၤ ပှၤအံၣ်စရ့လးဖိသ့ၣ်တဖၣ် မၤလိန့ၢ်ဘၣ်ဝဲ ကီကီခဲခဲန့ၣ်လီၤ. လၢတၢ်ဒုးတၢ်ယၤ အကတီၢ် ပှၤဖလ့ရှသးအသုးမုၢ် မၤနၢၤပှၤအံၣ်စရ့လးဖိန့ၣ်လီၤ. ပှၤအံၣ်စရ့လးဖိတဖၣ် ဖဲဆိကမိၣ်ထံ အတၢ်ဃၣ်ကွံာ်အသး လၢတၢ်လီၤမဲာ်ဆှးအံၤန့ၣ်ဒီး, ၁ ရှမူၤ ၄:၃ ပာ်ဖျါဝဲ ပှၤတဂၤအတၢ်ဆိကမိၣ် အိၣ်ထီၣ်ဝဲလၢ ကလဲၤစိာ် “ယွၤအတၢ်အၢၣ်လီၤအီလီၤ အတလါ” ဆူတၢ်ဒုးတၢ်ယၤပျီအဂီၢ်န့ၣ်လီၤ. အဆၢဖိ ၆-၉ စံးဝဲလၢ တၢ်ဂ့ၢ်အံၤဖျါဒ်တၢ်ဟ့ၣ်ကူၣ်လၢအဂ့ၤန့ၣ်လီၤ. နီၢ်နီၢ်န့ၣ် တၢ်အၢၣ်လီၤအီလီၤ အတလါ မ့ၢ်ဒၣ်တၢ်အပီးလီစီဆှံတမံၤန့ၣ်လီၤ.

ဘၣ်ဆၣ် ပှၤအံၣ်စရ့လးဖိတဖၣ်အိၣ်ဒီး တၢ်ထံၣ်လၢအကမၣ်န့ၣ်လီၤ. မ့မ့ၢ်ထဲတၢ်အၢၣ်လီၤအီလီၤ အတလါဒၣ်ဝဲန့ၣ် တဟဲစိာ်န့ၢ်တၢ်နီတမံၤလၢပှၤဂီၢ်မုၢ်တဖၣ်အဂီၢ်ဘၣ်. အဆၢဖိ ၁၀-၁၁ ပာ်ဖျါဝဲလၢ ပှၤအံၣ်စရ့လးဖိတဖၣ် ကဘၣ်အိၣ်ဂၢၢ်ဆိးကျၢၤ လၢယွၤအမ့ၢ်အတီတဂၤအမဲာ်ညါအလီၢ်န့ၣ်, မ့ၢ်လၢ အပာ်ဂံၢ်ပာ်ဘါတလါစီဆှံအဃိ, ဘၣ်တၢ်မၤနၢၤနးနးကလဲၣ်, ဒီးအဒုၣ်အဒါဂုာ်မၤန့ၢ် တလါစီဆှံန့ၣ်လီၤ.

တၢ်တမံၤမံၤလၢအဒုးသ့ၣ်နီၣ်ထီၣ်က့ၤပှၤ ဒ်သိးပဃ့ထုကဖၣ်တၢ်, မ့ၢ်ဂ့ၤ တၢ်စံးဘျုးစံးဖှိၣ် ကစၢ်ယွၤ အတၢ်ဂ့ၤတၢ်ဝါတဖၣ် မ့ၢ်ဂ့ၤန့ၣ် မ့ၢ်တၢ်လၢအဂ့ၤန့ၣ်လီၤ. ဘၣ်ဆၣ် တၢ်သ့ၣ်တဖၣ်အံၤ တမ့ၢ်တၢ်ဆိၣ်ဂ့ၤ အဂံၢ်ထံးန့ၣ်ဘၣ်. တၢ်ဆိၣ်ဂ့ၤအခီၣ်ထံးခီၣ်ဘိမ့ၢ်ဒၣ်ကစၢ်ယွၤ, ထဲယွၤတဂၤဧိၤန့ၣ်လီၤ.