လၢယနီၢ်ဆံးအဆၢကတီၢ်, ဒ်အမ့ၢ်ပိာ်ခွါဖိတဂၤအဂီၢ်, ကၠိကရၢၢ်မ့ၢ်တၢ်လီၢ်လၢ ပှၤမၤနၢၤအီၣ်တၢ်တဖၣ် မၤနၢၤမၤဃၣ်တၢ်အလီၢ်, ဒီးဖိသၣ်ဒ်သိးယၤတဖၣ်န့ၣ် တူၢ်ဘၣ်တၢ်မၤနၢၤအီၣ်ပှၤလၢ တၢ်ထီဒါ ဒီဒၣ်က့ၤပသး တန့ၢ်အါအါဘၣ်န့ၣ်လီၤ. လၢတၢ်မၤအၢမၤနးပှၤတဖၣ်အမဲာ်ညါ ဖဲပအိၣ်ဒီး တၢ်ပျံၤတၢ်ဖုးအဆၢကတီၢ်, တၢ်အနးကတၢၢ်တမံၤမ့ၢ်ဝဲလၢ အဝဲသ့ၣ်ကတိၤဆါပှၤ “နပျံၤတၢ်ဧါ. နပျံၤယၤ တမ့ၢ်ဘၣ်ဧါ. ဖဲအံၤပှၤလၢ အကဒီတဒၢနၤ တအိၣ်နီတဂၤဘၣ်” န့ၣ်လီၤ.
အါဘျီ လၢအကတီၢ်တဖၣ်အံၤန့ၣ် ယပျံၤတၢ်နီၢ်နီၢ်ဒိၣ်မး, ဒီးယဘၣ်ပျံၤတၢ်အဂ့ၢ်အိၣ်ဝဲဒၣ် န့ၣ်လီၤ. တၢ်လၢအပူၤကွံာ်န့ၣ်, ယဘၣ်တၢ်ဒိတီၢ်ယၤလၢစုခိၣ်အဃိဒီး, ယသ့ၣ်ညါလၢ ယတအဲၣ်ဒိး လဲၤခီဖျိ တၢ်ဒ်သိးအံၤလၢၤဘၣ်န့ၣ်လီၤ, ဖဲယသးပူၤအိၣ်ပှဲၤဒီး တၢ်ပျံၤတၢ်ဖုးအဆၢကတီၢ် မ့ၢ်ယမၤတၢ် မနုၤတမံၤကသ့လဲၣ်, ဒီးမ့ၢ်ယသန့ၤယသးလၢ မတၤတဂၤကသ့လဲၣ်. ဒ်နမ့ၢ် ဖိသၣ်ဃိးနံၣ်ဖိတဂၤ, ဒီးနဘၣ်တၢ်မၤနၢၤအီၣ်နၤ, လၢဖိသၣ်အသးပှၢ်န့ၢ်နၤ, ဒိၣ်န့ၢ်နၤ, ဒီးဂံၢ်ဘါဆူၣ်န့ၢ်နၤန့ၣ်ဒီး, တၢ်ပျံၤတၢ်ဖုးကအိၣ်ဝဲသပှၢ်ကတၢၢ်န့ၣ်လီၤ.
ပှၤကွဲးထါစံးထီၣ်ပတြၢၤ ၁၁၈ န့ၣ်ပာ်ဖျါဝဲ, ဖဲအဘၣ်ကွၢ်ဆၢၣ်မဲာ်ဒီး တၢ်မၤဒၢၣ်မၤဆါအီၤန့ၣ်, လၢတၢ်ပျံၤအလီၢ်န့ၣ် အဝဲစံးဆၢမၤဆၢက့ၤဝဲ လၢတၢ်နာ်န့ၢ်လီၤအသး, မ့ၢ်လၢအသ့ၣ်ညါ, တၢ်ကွၢ်ဆၢၣ်မဲာ်တၢ်မၤပျံၤမၤဖုးတဖၣ်အံၤန့ၣ် တမ့ၢ်ထဲအဝဲတဂၤဧိၤဘၣ်အဃိန့ၣ်လီၤ. စံး ၁၁၈:၆ အပူၤ ပကထံၣ်ဘၣ် “ယွၤအိၣ်လၢ ယအိၣ်တခီလီၤ. ပှၤကညီ ကမၤယၤ ဒ်လဲၣ်ဒ်လဲၣ်န့ၣ် ယတဘၣ်ယိၣ်ဘၣ်” န့ၣ်လီၤ. ဒ်ဖိသၣ်ပိာ်ခွါတဂၤအသိး တမ့ၢ်လၢယကနၢ်ပၢၢ် ပှၤကွဲးထါ အတၢ်နာ်န့ၢ်လီၤအသးအပတီၢ်ဘၣ်ဆၣ်, ဒ်ပှၤဒိၣ်တုာ်တဂၤအသိး, လၢယတၢ်လဲၤဒီးကစၢ်ယ့ၣ်ရှူး ခရံာ် လၢအနံၣ်တဖၣ်အနံၣ်အပူၤန့ၣ်, ယမၤလိန့ၢ်တ့ၢ်ယဲလၢ ကစၢ်ယ့ၣ်ရှူးခရံာ်န့ၣ် ဒိၣ်န့ၢ်ကယဲၢ် တၢ်မၤပျံၤမၤဖုးပှၤ တမံၤလၢ်လၢ်န့ၣ်လီၤ.
လၢပတၢ်အိၣ်မူအပူၤ, တၢ်မၤပျံၤမၤဖုးပှၤလၢ ပဘၣ်ကွၢ်ဆၢၣ်မဲာ်တဖၣ်န့ၣ် မ့ၢ်တၢ်နီၢ်နီၢ်ဘၣ်ဆၣ်, ပပျံၤတၢ်အလီၢ်တအိၣ်ဘၣ်. ပှၤလၢအတ့လီၤမူခိၣ်ကယၤတဂၤန့ၣ်အိၣ်ဒီးပှၤ, ဒီးအဝဲန့ၣ် လၢပှဲၤဝဲဒၣ်လၢပဂီၢ် အါန့ၢ်အန့ၣ်လီၤ.
