ဖဲ ၁၉၅၀ အနံၣ်တဖၣ်အကတီၢ်, မိၢ်လၢဘၣ်ဆၢထၢၣ်အကစၢ်ဒၣ်ဝဲတဂၤ, လၢတၢ်အံးထွဲကွၢ်ထွဲ လုၢ်အီၣ်လုၢ်အီ အပှၤဟံၣ်ဖိဃီဖိအဂီၢ်, ဃုထၢတၢ်ဒိလံာ်ဒိလဲၢ် အတၢ်မၤန့ၣ်လီၤ. ထဲတၢ်ဂ့ၢ်ကီတမံၤ, လၢအတမ့ၢ် ပှၤဒိလံာ်လဲၢ်သ့ဂ့ၤဂ့ၤတဂၤဘၣ်, ဒီးဒိကမၣ်လံာ်မဲာ်ဖျၢၣ်တဖၣ် တၢ်တလီၢ်လီၢ်န့ၣ်လီၤ. အဝဲဃုကျဲတဖၣ် ဒ်သိးကကျၢၢ်ဘၢ တၢ်လၢအဒိကမၣ်လံာ်အဖျၢၣ်တဖၣ်, ဒီးတဆီဘၣ်တဆီ ဒုးအိၣ်ထီၣ်ဝဲတၢ်တမံၤလၢ ပှၤသ့ၣ်ညါအီၤ ဒ်အမ့ၢ် လ့းကွ့း ပ့ၤပၤ (Liquid Paper), တၢ်အထံအနိ လၢတၢ်ဘှီက့ၤတၢ်, ဒီးဘၣ်တၢ်စူးကါအီၤလၢ ကမၤဘၢလံာ်မဲာ်ဖျၢၣ် အကမၣ်တဖၣ်အဂီၢ်န့ၣ်လီၤ. တုၤမ့ၢ်ကသံၣ်ထံဃ့ထီထီၣ်န့ၣ်ဒီး, တၢ်ဒိဘၣ်က့ၤလံာ်လၢအဖီခိၣ်သ့ဝဲ, ဒီးကဖျါဒ်တၢ်အကမၣ် တအိၣ်နီတမံၤဘၣ်အသိးန့ၣ်လီၤ.
လၢတၢ်ဘှါဆှဲပတၢ်ဒဲးဘးအဂီၢ် ကစၢ်ယ့ၣ်ရှူး ဟ့ၣ်ပှၤကျဲ လၢအိၣ်ဒီးအစိကမီၤအါန့ၢ်အန့ၣ် လၢပှၤထိၣ်ဒွးအီၤတသ့, ဒီးလၢအကါဒိၣ်တမံၤန့ၣ်လီၤ. ကျဲအံၤ တမ့ၢ်တၢ်ကျၢၢ်ဘၢတၢ်ဒဲးဘးဘၣ်, မ့ၢ်မးလၢ တၢ်ပျၢ်ကွံာ်တၢ်ဒဲးဘးလၢာ်လၢာ်ဆ့ဆ့န့ၣ်လီၤ. တၢ်အဒိအဂ့ၤတထံၣ်လၢအဘၣ်ဃးဒီး တၢ်ဂ့ၢ်အံၤ ဖျါလၢ ယိၤဟၣ် ၈:၃-၄ အစးထီၣ်တတီၤ, ဖဲလၢပိာ်မုၣ်တဂၤဘၣ်တၢ်ဖီၣ်န့ၣ်အီၤ လၢအအဲၣ်ဘၢတၢ်အဖၢမုၢ်တဂၤအဂ့ၢ်န့ၣ်လီၤ. ဘၣ်ထွဲလၢပှၤပိာ်မုၣ်အံၤ, ဒီးအတၢ်ဒဲးဘးတဖၣ်အဂီၢ် တၢ်သိၣ်တၢ်သီအသရၣ်တဖၣ် အဲၣ်ဒိးလၢ ကစၢ်ယ့ၣ်ရှူး ကမၤတၢ်တမံၤမံၤန့ၣ်လီၤ. တၢ်သိၣ်တၢ်သီ စံးဝဲလၢ ပိာ်မုၣ်အံၤ ဂ့ၤတၢ်ကွံာ်သံအီၤလၢလၢၢ်ဘၣ်ဆၣ်, ကစၢ်ယ့ၣ်ရှူးခရံာ် တမၤတံာ်တာ်အသးဒီး တၢ်သိၣ်တၢ်သီ အတၢ်ပာ်ဖျါ, အဂ့ၢ်န့ၣ်ဘၣ်. အဝဲမၤသ့ၣ်နီၣ်ထီၣ်က့ၤထဲတၢ်တမံၤဧိၤ, မ့ၢ်မး ပဝဲကိးဂၤဒဲးန့ၣ် ပမၤတၢ်ဒဲးဘး (ကွၢ် ရိမ့ၤ ၃:၂၃), ဒီးစံးဝဲဒၣ်လၢ ယိၤ ၈:၇ အပူၤ “ပှၤလၢသုကျါ လၢအတၢ်ဒဲးဘးတအိၣ်ဘၣ်တဂၤန့ၣ်, ကကွံာ်ဆိအီၤလၢ လၢၢ်တဖျၢၣ်တက့ၢ်” န့ၣ်လီၤ. လၢၢ်လ့ တဖျၢၣ်ဒၣ်လဲာ် တဘၣ်တၢ်ကွံာ်ထီၣ်အီၤဘၣ်.
ပိာ်မုၣ်တဂၤအံၤ ကစၢ်ယ့ၣ်ရှူးဟ့ၣ်အီၤလၢ ကစးထီၣ်တၢ်အိၣ်မူအသီန့ၣ်လီၤ. အဆၢဖိ ၁၁ အပူၤ ယ့ၣ်ရှူးစံးဘၣ်အီၤဒီးသိၣ်သီအီၤလၢ “ယဲဒၣ်အံၤ, ယတစံၣ်ညီၣ်ဃၣ်စ့ၢ်ကီးဘၣ်နၤဘၣ်. က့ၤက့ၤ, ဒီးမၤလၢၤတၢ်ဒဲးဘးတဂ့ၤ” န့ၣ်လီၤ. ခရံာ်ဟ့ၣ်အီၤ “ကသံၣ်ထံ” လၢကပျၢ်ကွံာ် အတၢ်ဒဲးဘးအဂီၢ်, ဒီးလၢတၢ်အိၣ်မူအပူၤကွံာ်တဖၣ်အဖီခိၣ် “ကဒိတီၢ်ဝဲ, ကကွဲးဝဲ” တၢ်အိၣ်မူအိၣ်ဂဲၤကျိၤကျဲ အသီတဘိန့ၣ်လီၤ. တၢ်ဟ့ၣ်တမံၤဃီအံၤ ခီဖျိလၢယွၤအတၢ်ဘျုးတၢ်ဖှိၣ်န့ၣ်, ပမၤန့ၢ်အီၤသ့ဝဲဒၣ် န့ၣ်လီၤ.
