လံာ်လၢအလီၤဆီလီၤလး “ဒွဲလၤကူၣ်သ့+တၢ်စူၢ်တၢ်နာ် – တၢ်တ့ဒုးအိၣ်ထီၣ်တၢ် အယွၤဂ့ၢ်ပီညါ” (Art + Faith : A Theology of Marking) တဘ့ၣ်အပူၤ, ပှၤအမံၤဟူသၣ်ဖျါလၢဒွဲလၤကူၣ်သ့, မၣ်ကိၣ်ထိၣ် ဖူၤကၠံၤမိၤရၤ (Makoto Fujimura) ကွဲးပာ်ဖျါဝဲ လၢပျၢၤပှၤယၣ်ပၣ်ဖိတဖၣ် အဒွဲလၤတကလုာ်, ဘၣ်တၢ်ကိးလၢ ခ့စူးကံၤ (Kintsugi) အဂ့ၢ်န့ၣ်လီၤ. လံာ်အံၤအပူၤန့ၣ် ပာ်ဖျါဝဲ ပှၤတ့တၢ်တဂၤ ဟံးထီၣ်ဟီၣ်ခိၣ်သပၢၤ လၢအသ့ၣ်ဖးတဖျၢၣ် (လၢအခီၣ်ထံးန့ၣ် လၣ်ဖးသပၢၤခွး) ဒီး က့ၤဆီထီၣ်ဖှီၣ်ထီၣ်တၢ်အက့အခီတဖၣ် လၢသ့ၣ်သူအထုး, ဒီးတွံၢ်လုၢ်ထူ လၢတၢ်တဲဖးအကျိၤတဖၣ် အပူၤန့ၣ်လီၤ. ဖူၤကၠံၤမိၤရၤ ဒုးနၢ်ပၢၢ်ဝဲဒၣ်လၢ “ခ့စူးကံၤ” န့ၢ် တမ့ၢ်ထဲလၢ တၢ်ဘှီက့ၤ မ့တမ့ၢ် မၤဂ့ၤက့ၤ သပၢၤသ့ၣ်ဖးတဖျၢၣ်န့ၣ်ဘၣ်, မ့ၢ်မး ကျိၤကျဲသနူတမံၤလၢ အမၤဃံလၤ သပၢၤလီခီသ့ၣ်ဖးတဖၣ်, အါန့ၢ်အခီၣ်ထံးတၢ်အိၣ်အသးန့ၣ်လီၤ. “ခ့စူးကံၤ” န့ၣ် စးထီၣ်အသးလၢ တၢ်ဒုးတၢ်ယၤကစၢ်တဂၤ (warlord) အလီခီ လၢအအဲၣ်လီၤဆီဝဲတဖျၢၣ်သ့ၣ်ဖးဟးဂီၤ, ဒီးဘၣ်တၢ်ဘှီဂ့ၤထီၣ်ကဒါက့ၤ ဃံဃံ လၤလၤ, ဒီးကဲထီၣ် ဒွဲလၤကူၣ်သ့တမံၤ လၢအဘၣ်တၢ်ပာ်လုာ်ပာ်ပှ့ၤအီၤ, ဒီးပှၤဘၣ်သူၣ်ဘၣ်သးအီၤ ဒိၣ်မးန့ၣ်လီၤ.
ဝံယရှါယၤ ပာ်ဖျါထီၣ် ကစၢ်ယွၤဘှီဂ့ၤဘှီဘၣ်က့ၤဟီၣ်ခိၣ် လၢကျိၤကျဲဒ်သိးအံၤ တကလုာ် န့ၣ်လီၤ. ပဟးဂူာ်ဟးဂီၤလၢ ခီဖျိလၢတၢ်ထီဒါယွၤ, ဒီးကၢ်လီၤသဘှံး လၢပတၢ်အဲၣ်လီၤက့ၤပသး ဘၣ်ဆၣ်, ယရှါ ၆၅:၁၇ အပူၤ ယွၤအၢၣ်လီၤဝဲ, “ယတ့လီၤမူခိၣ်အသီ, ဒီးဟီၣ်ခိၣ်အသီ” န့ၣ်လီၤ. ယွၤအတၢ်ပညိၣ်န့ၣ် တမ့ၢ်ထဲလၢ ကဘှီဂ့ၤက့ၤ ဟီၣ်ခိၣ်လီၢ်လံၤန့ၣ်ဘၣ်, မ့မ့ၢ်ကဒုးကဲထီၣ်အသီ လၢာ်လၢာ်ဆ့ဆ့, ကဟံးန့ၢ် ပတၢ်လၢအဟးဂူာ်ဟးဂီၤ, ဒီးကတ့ထီၣ်ဟီၣ်ခိၣ်လၢ အကပြုၢ်ကပြီၤ ဒီးတၢ်ဃံတၢ်လၤအသီ, ကဆှီဒီဖိန့ၣ်လီၤ. တၢ်ဘၣ်တ့အသီအံၤ ကမ့ၢ်တၢ်လီၤကမၢကမၣ် တုၤဒၣ်လဲာ် အဆၢဖိ ၁၆-၁၇ ပာ်ဖျါဝဲလၢ “တၢ်ကိၢ်တၢ်ဂီၤလၢအခီၣ်ထံးတဖၣ်န့ၣ်ဘၣ်တၢ်သးပ့ၤနီၣ်လံအီၤလံ” “ဒီးတၢ်အခီၣ်ထံးတဖၣ်န့ၣ် တၢ်တသ့ၣ်နီၣ်ထီၣ်က့ၤဘၣ်အီၤဘၣ်” န့ၣ်လီၤ. လၢတၢ်တ့အသီအံၤ အပူၤ, တမ့ၢ်ယွၤကကျီၣ်ကျဲကျၢၢ်ဘၢ ပတၢ်ကမၣ်တဖၣ်ဘၣ်, မ့မ့ၢ် ကပျဲပျၢ်လီၤအဂံၢ်သဟီၣ် လၢအတ့ဘှီဂ့ၤတၢ်, အသဟီၣ်အံၤ ဖဲလၢတၢ်လၣ်အၢတဖၣ်အလီၢ် ကဒုးကဲထီၣ်တၢ်ဃံတၢ်လၤ ဒီး တၢ်လၢအသံတဖၣ် ကသါနုာ်က့ၤတၢ်မူအသီန့ၣ်လီၤ.
ဖဲပကွၢ်ထံ ဆိကမိၣ်က့ၤ ပတၢ်အိၣ်မူ လၢအလီၤသဘှံးတဖၣ်န့ၣ်, တၢ်သးဟးဂီၤအလီၢ် တအိၣ်ဘၣ်. တၢ်ဘှီဂ့ၤထီၣ်က့ၤ အတၢ်မၤဃံလၤန့ၣ် ယွၤမၤဒံးဝဲ အဖၢမုၢ်လီၤ.
