ဖဲယမၤဝံၤ တၢ်ဖံးတၢ်မၤတနံၤအဂီၢ်န့ၣ်ဒီး ယဆ့ၣ်နီၤအိၣ်ဂၢၢ်, အိၣ်ဃိကလာ်လၢ ယခီၣ်ဖၠူထၢၣ်ဆံးဖိအမဲာ်ညါန့ၣ်လီၤ. ယတၢ်မၤတဖၣ် ဝံၤလံအဃိ, ယကြၢးသးမုာ်သးဖှံဘၣ်ဆၣ် တၢ်တမၤအသးဒီးယၤဒ်န့ၣ်အသိးဘၣ်. ယလီၤဘှံးလၢ နီၢ်ခိဒီးနီၢ်သးန့ၣ်လီၤ. ယသးအတၢ်ဝံဃၢ ဘၣ်ထွဲဒီး တၢ်ဖံးတၢ်မၤအတၢ်ဂ့ၢ်ကီတမံၤအဃိ ယဖံဘၣ်ခိၣ်ခံခီ ဆါအ့ၣ်ထုး ဒီးယသးဘၣ်တံာ်တာ်လၢ တၢ်ရ့လိာ်ဘၣ်ထွဲသး အတၢ်ဂ့ၢ်ကီတမံၤအဃိန့ၣ်လီၤ. ယအဲၣ်ဒိးပူၤဖျဲးဒီးတၢ်သ့ၣ်တဖၣ်ခဲလၢာ်, ဒီးယကွၢ်ကွဲၤထံၣ်ဟူဒၣ်လဲာ် ယသးအတၢ်ဆိကမိၣ် လဲၤဆူန့ၣ် လဲၤဆူအံၤန့ၣ်လီၤ.

ယဘံၣ်လီၤယမဲာ်ချံ ဒီးစံးကသွံဒံဖိ “ကစၢ်ယွၤဧၢ,” ယလီၤဘှံးလီၤတီၤဒိၣ်မးအဃိ ယထးခိၣ်တထီၣ်ဖျဲးလၢၤဘၣ်. ယနီၢ်ခိနီၢ်သး အတၢ်လီၤဘှံးလီၤဘှါတဖၣ်ခဲလၢာ်န့ၣ် လဲၤကတၢၢ်ဒၣ်ဖဲ တၢ်ကတိၤဖိတဖျၢၣ်အံၤန့ၣ်လီၤ. တမံၤဂ့ၤတမၠိဂ့ၤ ယနီၢ်ခိနီၢ်သးတၢ်လီၤဘှံးလီၤဘှါတဖၣ် ကြၢးလဲၤဖဲလဲၣ်န့ၣ် ယသ့ၣ်ညါတဘျီဃီန့ၣ်လီၤ.

မး ၁၁:၂၈ အပူၤ ကစၢ်ယ့ၣ်ရှူးစံးဘၣ်ပှၤ “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ, ဟဲဆူယအိၣ်တက့ၢ်, ဒီးယကဒုးအိၣ်ဘှံးသုလီၤ” န့ၣ်လီၤ. တၢ်ဒုးအိၣ်ဘှံးတမံၤအံၤန့ၣ် တမ့ၢ်တၢ်မံဘၣ်ဂ့ၤဂ့ၤလၢ မုၢ်တနၤအဂီၢ်ဘၣ်. တမ့ၢ်တၢ်အိၣ်ဘှံးကွၢ်ကီ ကွဲၤထံၣ်ဟူ ဒ်သိးကပူၤဖျဲးတစိၢ်ဖိဒီး ဟီၣ်ခိၣ်တၢ်မၤအသးနီၢ်နီၢ်အဂီၢ်န့ၣ်ဘၣ်. မ့ၢ်တၢ်ဘှါဆှဲဝံၤ တၢ်ဂ့ၢ်ကီအဃိ ပသးဖှံထီၣ်အသိးဒၣ်လဲာ် တမ့ၢ်ဘၣ်န့ၣ်လီၤ. တၢ်အိၣ်ဘှံးဒ်သိးလၢထးအတၢ်ပာ်ဖျါတဖၣ် ဘၣ်သ့ၣ်သ့ၣ် ကမ့ၢ်တၢ်ဂံၢ်ခီၣ်ထံးအဂ့ၤလၢ ပတၢ်အိၣ်ဘှံးအိၣ်သါအဂီၢ် ဘၣ်ဆၣ်, တၢ်တဖၣ်န့ၣ် မ့ၢ်တၢ်တစိၢ်ဖိအဂီၢ်, ဒီးတၢ်အိၣ်အသး, မၤအသးတဖၣ်အဖီခိၣ်န့ၣ် ဆီတလဲအသးသ့ဝဲဒၣ်န့ၣ်လီၤ.

အတကပၤန့ၣ် တၢ်အိၣ်ဘှံးလၢ ကစၢ်ယ့ၣ်ရှူးဟ့ၣ်ဝဲဒၣ်န့ၣ် မ့ၢ်တၢ်အထူအယိာ် ဒီးဘၣ်တၢ်အၢၣ်လီၤ, မၤဂၢၢ်မၤကျၢၤအီၤလၢ ကစၢ်ယ့ၣ်ရှူး အတၢ်မ့ၢ်တၢ်လၢတၢ်ဆီတလဲ တအိၣ်ဘၣ်န့ၣ်လီၤ. ကစၢ်ယ့ၣ်ရှူးဂ့ၤဝဲထီဘိလီၤ. အဂ့ၢ်ဒ်အံၤ ပသ့ၣ်ညါလၢ ကယဲၢ်တၢ်ခဲလၢာ်န့ၣ် ကစၢ်ယ့ၣ်ရှူးပၢဆှၢဝဲအဃိ တၢ်ကီတၢ်ခဲအကတီၢ်ဒၣ်လဲာ် လၢသူၣ်လၢသးတကပၤ အဝဲဟ့ၣ်ပှၤတၢ်အိၣ်ဘှံးနီၢ်နီၢ်န့ၣ်လီၤ. တၢ်ဂံၢ်တၢ်ဘါ ဒီးတၢ်ဘှီဂ့ၤမၤဂ့ၤထီၣ်က့ၤပှၤန့ၣ် ဟဲခီဖျိသ့ဒၣ်ထဲ ကစၢ်ယ့ၣ်ရှူးတဂၤဧိၤအအိၣ်အဃိဒီး လၢတၢ်ကီတၢ်ခဲအပူၤဒၣ်လဲာ် ပတူၢ်ခီၣ်ကန့ၢ်, ဒီးပဂုာ်ကျဲးစၢၤအိၣ်မူအိၣ်ဂဲၤကန့ၢ်အဂီၢ် ပနာ်အီၤ, ဟ့ၣ်လီၤအးလီၤပသးသ့ဝဲဒၣ်န့ၣ်လီၤ.

ဟဲဆူယအိၣ်တက့ၢ်. ယ့ၣ်ရှူးစံးဘၣ်ပှၤ ဟဲဆူယအိၣ်တက့ၢ်.