တၢ်နးန့ၢ်ဒံး တၢ်မၤအသး တၢ်ကဲထီၣ်လိၣ်ထီၣ်တၢ်လၢအဘၣ်ဆၢဘၣ်ကတီၢ်န့ၣ်တအိၣ်လၢၤဘၣ်န့ၣ်လီၤ. ခီဖျိလၢ တၢ်တ့တိၤတဖၣ်, တၢ်သ့ၣ်နီၣ်လၢၢ်ထူၣ်တဖၣ်, ဒီးတၢ်သူၣ်ထီၣ်ဖးဒိၣ်တဖၣ်အဃိ ဆံစၢ် (CESAR) ကဲထီၣ်ပှၤကဲဒိၣ်တဂၤဒီး အဲၣ်ဒိးစးထီၣ်မၤဝဲ တၢ်ဖံးတၢ်မၤအသီ တခါန့ၣ်လီၤ. လၢတၢ်န့ၣ်အဃိ, ဆံစၢ် ဆါကွံာ်ပနံာ်တၢ်ကၤတၢ်မၤလၢအမၤဝဲအခီၣ်ထံးတခါန့ၣ် ဒီးတချုးစးထီၣ်မၤတၢ်မၤအသီန့ၣ် အကျိၣ်စ့ တဖၣ်ဟ့ၣ်လီၤအးလီၤပာ်ဝဲလၢစ့တၢးပူၤန့ၣ်လီၤ. တယံာ်ဘၣ်န့ၣ် ကမျၢၢ်စ့တၢးတဖၣ်အပူၤ ကယဲၢ်တၢ်အိၣ်ခဲလၢာ်, ဘၣ်တၢ် ဟံးန့ၢ်ဆူၣ်လၢ ထံကီၢ်ပဒိၣ်အဃိ, တၢ်လၢဆံစၢ်ဃုပာ်ဖှိၣ်အစုလီၢ်ခီၣ်ခိၣ်ခဲလၢာ်လီၤမၢ်ကွံာ်ဝဲလၢ တၢ်တဖျးမဲာ်အတီၢ်ပူၤန့ၣ်လီၤ. တၢ်တတီတလိၤလၢအကဲထီၣ်အသးအံၤ ဆံစၢ်တထံၣ်ဝဲဒ်တၢ်တမံၤလၢ အကဘၣ်ကအုကစွါဝဲန့ၣ်ဘၣ်. ဖဲအလီၢ်န့ၣ် ဆံစၢ်ဃ့ယွၤလၢ အကနဲၣ်ဆှၢအီၤခါဆူညါအဂီၢ်န့ၣ်လီၤ. ဒီးအဝဲစးထီၣ်မၤကဒီးတၢ်အသီတဘျီန့ၣ်လီၤ.
တၢ်ဆၢကတီၢ်အၢအၢသီသီတကတီၢ်အပူၤ စီၤယိၤဘးအတၢ်လီၤမၢ်န့ၣ်တမ့ၢ်ဝဲထဲအတၢ်ထူးတၢ်တီၤတဖၣ်န့ၣ်ဘၣ်. ယိၤဘး ၁:၁၃-၂၂ ပာ်ဖျါဝဲ စီၤယိၤဘး အဖိတဖၣ်ဒီး အကုၢ်,အခ့အပှၤတဖၣ်ခဲလၢာ်ဃၣ်ဃၣ် တၢ်လီၤမၢ်ကွံာ်အဂ့ၢ်န့ၣ်လီၤ. ယိၤဘး ၂:၇-၈ အပူၤစံးဘၣ်ပှၤလၢ ဖဲအကတၢၢ်န့ၣ် စီၤယိၤဘးအတၢ်အိၣ်ဆူၣ်အိၣ်ချ့စ့ၢ်ကီး ဘၣ်ဒိဘၣ်ထံးဝဲဒၣ်န့ၣ်လီၤ. စီၤယိၤဘးစံးဆၢဝဲလၢ ဖဲယိၤဘး ၁:၂၀-၂၁ အပူၤ “ယဟဲထီၣ်လၢယမိၢ်အဒၢလီၢ်အပူၤန့ၣ်အိၣ်ဘ့ၣ်ဆ့, ဒီးအိၣ်ဘ့ၣ်ဆ့န့ၣ်ယကက့ၤက့ၤဖဲန့ၣ်လီၤ. ယွၤဟ့ၣ်လီၤတၢ်, ဒီးယွၤဟံးထီၣ်ကွံာ်တၢ်, မ်ယွၤအမံၤဘၣ်တၢ်ဆိၣ်ဂ့ၤအီၤတက့ၢ်” အံၤန့ၣ် မ့ၢ်တ့ၢ်လံတၢ်ဟ့ၣ်ဒိတမံၤလၢတၢ်ကိးဆၢကိးကတီၢ်ဒဲးအဂီၢ်န့ၣ်လီၤ. လံာ်စီဆှံအဆၢဒိၣ်ဖဲအံၤ ဘၣ်တၢ်မၤကတၢၢ်အီၤလၢ “လၢကယဲၢ်တၢ်အံၤအပူၤခဲလၢာ်န့ၣ် စီၤယိၤဘးတမၤတၢ်ဒဲးဘးဘၣ်, ဒီးတပာ်တၢ်ကမၣ်လၢယွၤအလိၤဘၣ်” န့ၣ်လီၤ.
ဒ်စီၤယိၤဘးအသိး ဆံစၢ်ဃုထၢလၢကနာ်ကစၢ်ယွၤ ဒီးတဘျုးနံၣ်အတီၢ်ပူၤန့ၣ် အဝဲသူၣ်ထီၣ်ပနံာ်တၢ်ကၤအတၢ်မၤအသီ လၢအကဲဘျုးဒိၣ်န့ၢ်ဒံး အခီၣ်ထံးတခါန့ၣ်လီၤ. ဆံစၢ်အတၢ်ဂ့ၢ်တၢ်ကျိၤန့ၣ်လီၤပလိာ်အသးဒီး စီၤယိၤဘးအတၢ်ဂ့ၢ်အကတၢၢ် ဖဲယိၤဘး ၄၂ အပူၤန့ၣ်လီၤ. ဆံစၢ်အတၢ်ဖံးတၢ်မၤတဖၣ်မ့ၢ်တကဲထီၣ်လိၣ်ထီၣ်သပှၢ်တၢၢ်လၢၤဘၣ်န့ၣ်ဒီး ဒ် မး ၆:၁၉-၂၀ ပာ်ဖျါဝဲအသိး အဝဲသ့ၣ်ညါလၢ အတၢ်ထူးတၢ်တီၤနီၢ်နီၢ်န့ၣ် တမ့ၢ်တၢ်လၢအဘၣ်ထွဲဒီးဟီၣ်ခိၣ်ချၢဘၣ်န့ၣ်လီၤ. ဆူညါကနာ်ဒံးဝဲ ကစၢ်ယွၤန့ၣ်လီၤ.
