လၢကီၢ်အမဲရကၤ, ကီၢ်စဲၣ်အဲၣ်အိၣ်ဝၣ်(Iowa) အဖၠၣ်စိမိၤန့ၣ်, တၢ်မၤအသးတမံၤလၢ ဒုးအိၣ်ထီၣ် တၢ်သူၣ်ကိၢ်သးဝး အလုၢ်အလၢ် သ့ၣ်သ့ၣ်န့ၣ်လီၤ. စတဲး ဟံၣ်ဖိဃီဖိ ဖိသၣ်တၢ်ဆါဟံၣ် (Stead Family Children Hospital)န့ၣ် အိၣ်သဃၢၤလိာ်သးဒီး ကီၢ်စဲၣ် အဲၣ်အိၣ်ဝၣ် ခ့န့း အမဲရကၤ ဖျၢၣ်ထူပျီန့ၣ်လီၤ. တၢ်ဆါဟံၣ်အဖီခိၣ်ကတၢၢ် တကထြၢန့ၣ် ပှၤဒူၣ်အီၤလၢ မဲာ်ထံကလၤ အပှဲၤအဃိ ပှၤကွၢ်လီၤတၢ်ဆူ တၢ်လိာ်ကွဲပျီပူၤ န့ၢ်ဝဲဂ့ၤဂ့ၤန့ၣ်လီၤ. ဖဲပှၤလိာ်ကွဲတၢ်အဆၢကတီၢ် ပှၤဖိသၣ်လၢ အဆူးဆါတဖၣ် ဃုာ်ဒီးဟံၣ်ဖိဃီဖိတဖၣ် မၤပှဲၤတၢ် တၢ်လီၢ်အံၤ ဒ်သိးကကွၢ်ပှၤလိာ်ကွဲတၢ်န့ၣ်လီၤ. ဖဲပှၤလိာ်ကွဲ အခီၣ်ထံးတပတီၢ်ဝံၤန့ၣ် ပှၤလိာ်ကွဲတၢ်ဖိတဖၣ်, အပှၤနဲၣ်တၢ်တဖၣ်ဒီး ကမျၢၢ်လၢ အဟဲကွၢ် တၢ်လိာ်ကွဲလၢ အကထိတဖၣ် ကွၢ်ထီၣ် ဖိသၣ်လၢအဆူးဆါတဖၣ်ဒီး ဝံၣ်ဝၢ်အစုဒီး ဆၢဂ့ၤဆၢဝါဝဲဒၣ်န့ၣ်လီၤ. အကတီၢ်ဖိအံၤ မ့ၢ်အကတီၢ်ဖိလၢ ဖိသၣ်တဖၣ် အမဲာ်ချံကပီၤထီၣ်လၢ တၢ်သူၣ်ခုသးခုအပူၤန့ၣ်လီၤ. ဖဲပထံၣ်ဘၣ် ပှၤလိာ်ကွဲတၢ်ဖိတဖၣ်, ကမျၢၢ်လၢ ဟဲကွၢ်တၢ်တဖၣ်, ပှၤခိးကွၢ်တၢ်လၢ ကွဲၤထံၣ်ဟူတဖၣ် ပာ်ဖျါ တၢ်သူၣ်အိၣ်သးအိၣ်တၢ်လၢ ပှၤဆါဖိသၣ်တဖၣ်အံၤန့ၣ် မ့ၢ်တၢ်သးမံသးမုာ် ဒီးလၢအအိၣ်ပှဲၤဒီး အစိကမီၤန့ၣ်လီၤ.
ယွၤကလုၢ်ကထါသိၣ်လိနဲၣ်လိ ပှၤလၢအအိၣ်ဒီး အစိအကမီၤတဖၣ် (ပဝဲခဲလၢာ် ပအိၣ်ဒီး တၢ်စိတၢ်ကမီၤတမံၤစုာ်စုာ်) ကဘၣ် ကွၢ်ထွဲ ကဟုကယာ် ပှၤဂံၢ်စၢ်ဘါစၢ်, ကဘၣ်မၤဂ့ၤမၤစၢၤ ပှၤလၢ ဘၣ်ဂုာ်ကျဲးစၢၤ ဂဲၤလိာ်အသးတဖၣ် ဒီးကဘၣ်မၤဘျါပှၤလၢ အနီၢ်ခိ ဘၣ်ဒိဘၣ်ထံးတဖၣ်န့ၣ်လီၤ. ဘၣ်ဆၣ် ယဃ့း ၃၄:၆ ပာ်ဖျါဝဲလၢ ပလဲၤကပာ် ပှၤလၢအလိၣ်ဘၣ် တၢ်ကွၢ်ထွဲကဟုကယာ်အီၤတဖၣ် တလီၢ်လီၢ်န့ၣ်လီၤ. ဝံယဃ့းစက့လး ကတိၤဒုၣ်ဒွဲၣ် အံၣ်စရ့လးခိၣ်နၢ်တဖၣ် လၢအကွၢ်ဒၣ်ထဲ အဂီၢ်ဒၣ်ဝဲဒီး တကနၣ်ဃုာ် ပှၤလၢအလိၣ်ဘၣ် တၢ်မၤစၢၤ သပှၢ်တၢၢ်အဂီၢ်အဃိန့ၣ်လီၤ. ယွၤစံးကတိၤ ခီဖျိ ဝံယဃ့းစက့လးလၢ ယဃ့း ၃၄:၂,၄ အပူၤ “အံၣ်စရ့လးအပှၤကွၢ်သိလၢ အကွၢ်လီၤအသးတဖၣ်န့ၣ် ဘၣ်အဖှီၣ်လီၤ. တၢ်လၢအဂံၢ်စၢ်အဘါစၢ်န့ၣ် သုတဒုးဆူၣ်ထီၣ်ဘၣ်အီၤဘၣ်. ဒီးတၢ်လၢအဆါဝဲန့ၣ် သုတမၤဘျါဘၣ်အီၤဘၣ်. ဒီးတၢ်လၢ အဘၣ်တူၢ်န့ၣ်သု တဘိၣ်ထီၣ်ဘၣ်အီၤဘၣ်”န့ၣ်လီၤ.
ပမၤဆိတၢ်လၢ ပကစၢ်ဒၣ်ဝဲအဂီၢ်, တၢ်ကဲခိၣ်ကဲနာ် အတၢ်စူၢ်တၢ်နာ်အသနိလီၤဆီတဖၣ်ဒီး မုၢ်ကျိၤဝဲၤကွာ် တၢ်ဘျၢသနူတဖၣ်အဃိ မ့ၢ်ပလဲၤကပာ်ဘၣ် ပှၤလၢအသူၣ်ကၢ်သးလီၤဘှါတဖၣ်န့ၣ် ထဲလဲၣ်လံလဲၣ်. အဆၢဖိ ၁၁-၁၂ အပူၤ ယွၤဒုးနဲၣ်ပှၤကျိၤကျဲအဂၤတမံၤ, ဖဲလၢပှၤအိၣ်ဒီးအစိအကမီၤတဖၣ် ကဘၣ်ကွၢ်ထွဲမၤစၢၤပှၤဂံၢ်စၢ်ဘါစၢ်န့ၣ်လီၤ.
