ဒဲ(န)(Dan)န့ၣ် ဘၣ်တူၢ်ဘၣ်ခီၣ်ဘၣ်ဝဲ ပှၤပၢၤဃိာ်ဖိတဂၤ အတၢ်ဒိအီၤတီၢ်အီၤ ကိးမုၢ်နံၤဒဲးန့ၣ်လီၤ. ဒဲ(န) အသးကလၢၢ်ဘၣ်ဝဲလၢ ကစၢ်ယ့ၣ်ရှူးသဆၣ်ထီၣ်အီၤ ဒ်သိး ကအဲၣ်ပှၤလၢအဒိတီၢ်အီၤတဂၤအဃိ, ဘၣ်ဖဲမုၢ်တဂီၤ တချုးလၢ တၢ်ဒိတီၢ်အီၤ စးထီၣ်ဒ်ဘၣ်န့ၣ် ဒဲ(န) န့ၣ်စံးဘၣ်ပှၤလၢ အကဒိတီၢ်အီၤလၢ “သရၣ်ဧၢ, နမ့မ့ၢ် ပှၤလၢကထံၣ်လိာ်ဘၣ်သးကိးမုၢ်နံၤ လၢယသးသမူဒီတစိၤ လၢအိၣ်လီၤတဲာ်တ့ၢ်န့ၣ်ဒီး ပကကဲထီၣ် ဒီတံၤဒီသကိးဧၣ်”န့ၣ်လီၤ. ပှၤပၢၤဃိာ်တဂၤအံၤ စံးဆၢအီၤ “တန့ၢ်ဘၣ်, ယကကဲထီၣ် တံၤသကိးလ့တက့ၢ်န့ၣ် တသ့ဘၣ်”န့ၣ်လီၤ. ဒဲ(န)န့ၣ် စံးဘၣ်အီၤသပှၢ်ပှၢ် ဒီးယုၢ်ဃီၤလီၤအစု လၢတၢ်ဟံးစုကွၢ်မဲာ် လၢတၢ်ဘၣ်သူၣ်ဘၣ်သးအဂီၢ်န့ၣ်လီၤ.
ပှၤပၢၤဃိာ်တဂၤအံၤ ဆိကမိၣ်ထီၣ် တၢ်တစိၤဖိဒီး ဟံးစုကွၢ်မဲာ်ဝဲဒီး တပျဲဝဲ ဒဲ(န) အစုလၢဟံးဃာ်ဖီၣ်ဃးဝဲဒၣ်န့ၣ်လီၤ. အမဲာ်ထံယွၤလီၤဒီး စံးဝဲ “ဒဲ(န)ဧၢ, ယမံၤန့ၣ် ရိၣ်စီး(Rosoc)လီၤ. ယအဲၣ်ဒိးကဲထီၣ် တံၤသကိးဒီးနၤလီၤ” . စးထီၣ်ဖဲန့ၣ် အဝဲတဒိတီၢ်ဝဲ ဒဲ(န)လၢၤဘၣ်န့ၣ်လီၤ.
ကစၢ်ယွၤကလုၢ်ကထါ စံးဘၣ်ပှၤလၢ ကတိၤ ၂၅:၂၁-၂၂ အပူၤ “နဒုၣ်နဒါန့ၣ် တၢ်မ့ၢ်သၣ်ဝံၤအသးဒီး ဟ့ၣ်အီၣ်အီလၢကိၣ်တက့ၢ်. ဒီးတၢ်မ့ၢ်သူအသးလၢထံဒီး ဟံၣ်အီအီၤလၢထံတက့ၢ်. နကပာ်ဖှိၣ် မ့ၣ်အူကဖးလၢအခိၣ်ဖီခိၣ်, ဒီးယွၤကဟ့ၣ်လီၤနၤလၢ နဘူးနလဲလီၤ”န့ၣ်လီၤ. တၢ်ဟ့ၣ်ဒိ “မ့ၣ်အူကဖး” မ့ၢ်တၢ်ပာ်ဖျါက့ၤ ပှၤအဲၣ်ကူပတူးဖိတဖၣ် အလုၢ်အလၢ်ထူသနူတမံၤလၢအမ့ၢ် ပှၤမၤကမၣ်တၢ်တဂၤ ဘၣ်ပာ်ထီၣ် မ့ၣ်အူကဖးအလီခီ လၢအခိၣ်ဖီခိၣ် ဒ်သိးကပာ်ဖျါထီၣ် တၢ်ပီၢ်ယၢ်လီၤက့ၤသးအဂီၢ်န့ၣ်လီၤ. ဒ်န့ၣ်အသိး, ပတၢ်သူၣ်ကညီၤသးကညီၤတၢ်ဆူ ပဒုၣ်ပဒါတဖၣ်အအိၣ်န့ၣ် ဒုးကဲထီၣ်တၢ်မဲာ်ဆှးဒီး အမဲာ်သၣ်ကထီၣ်ဂီၤဒီး ဘၣ်သ့ၣ်သ့ၣ် ကနဲၣ်ဆှဲအဝဲသ့ၣ်ဆူ တၢ်ပီၢ်ယၢ်လီၤက့ၤသးန့ၣ်လီၤ.
နဒုၣ်နဒါန့ၣ် ကမ့ၢ်မတၤလဲၣ်. ပှၤလၢနကွၢ်အီၤတလိၤ, ပှၤလၢ တဘၣ်နသးတဖၣ် ကမ့ၢ်မတၤလဲၣ်. ဒဲ(န) ဃုထံၣ်န့ၢ်ဝဲ ကစၢ်ယ့ၣ်ရှူး အတၢ်သူၣ်ကညီၤသးကညီၤတၢ်န့ၣ် အဂံၢ်အဘါဆူၣ်ထီၣ်လၢလၢပှဲၤပှဲၤ ဒ်သိးကဆီတလဲကွံာ်, လဲလိာ်ကွံာ် အဒုၣ်အဒါတဖၣ်အသး, ဒီးအကစၢ်ဒၣ်ဝဲအသး ဒီးကယဲၢ်ပှၤအသးခဲလၢာ်န့ၣ်လီၤ.
